ەكىباستۇز قالاسىندا ەكىنشى حالىققا قىزمەت كورسەتۋ ءبولىمى اشىلدى, دەپ حابارلايدى رavlodarnews.kz.
جەرگىلىكتى تۇرعىندار ءۇشىن مۇندا مەملەكەتتىك قىزمەتتەردى الۋعا كومەكتەسەتىن وپەراتسيالىق زال مەن دايىن قۇجاتتاردى بەرۋ سەكتورى جۇمىس ىستەيدى. "ازاماتتارعا ارنالعان ۇكىمەت" مەملەكەتتىك كورپوراتسياسى پاۆلودار وبلىستىق فيليالىنىڭ ديرەكتورى فارحات ءالىموۆتىڭ ايتۋىنشا, 130 مىڭنان استام تۇرعىنى بار شاھار ءۇشىن تاعى ءبىر ءبولىم اشۋ قاجەتتىلىگى بۇرىننان تۋىنداعان. جارتى جىل ىشىندە ەكىباستۇزدىقتارعا 63 مىڭ مەملەكەتتىك قىزمەت كورسەتىلگەن. "ەكىباستۇز ءۇشىن ءبىر حقو جەتكىلىكسىز بولدى. قالا تۇرعىندارىنىڭ سانى ارتىپ كەلەدى, سونداي-اق ءبىزدىڭ قىزمەتكەرلەرىمىز كولىكتى تىركەۋ جانە جۇرگىزۋشى كۋالىگىن اۋىستىرۋ سياقتى اۆتوقىزمەتتەردى دە قوسىمشا كورسەتىپ كەلەدى. ءبولىمنىڭ اشىلۋىنا جەرگىلىكتى كاسىپكەر قولعابىس ەتىپ, وسى عيماراتتى بىزگە وتەۋسىز پايدالانۋعا بەردى. وسى رەتتە, وعان ۇلكەن ريزاشىلىعىمىزدى بىلدىرەمىز", - دەدى فارحات ءالىموۆ.جاڭا بولىمدە قۇجاتتاندىرۋ (جەكە كۋالىك جانە پاسپورت بەرۋ) جانە ترانسپورتقا قاتىسى جوق بارلىق مەملەكەتتىك قىزمەتتەردى الۋعا بولادى. ءبولىمنىڭ اۋلاسىندا كولىككە ارنالعان اۆتوتۇراق قاراستىرىلعان.