بۇل جونىندە سەنات توراعاسى facebook-تەگى پاراقشاسىنا جازدى. ماۋلەن اشىمباەۆ ءوز جازباسىندا پارلامەنتتىڭ وتكەن سەسسياداعى جۇمىسىنا توقتالىپ, قابىلدانعان كەيبىر نورمالارعا نازار اۋدارعان.
«وتكەن سەسسيادا پارلامەنت مەملەكەت باسشىسىنىڭ ەكونوميكانى قالپىنا كەلتىرۋ جانە پاندەميامەن كۇرەس جۇمىستارىنا قاتىستى بارلىق باستاماسىن زاڭنامالىق تۇرعىدان قامتاماسىز ەتكەنىن ەرەكشە اتاپ وتكەن ءجون», – دەدى سەنات توراعاسى.
سونداي-اق ول پارلامەنتتىك كانيكۋلعا شىققان سەناتورلاردىڭ ءوز وڭىرلەرىندە جانە ەلوردادا ىندەتپەن كۇرەس جۇمىستارىنا بەلسەنە اتسالىسىپ جۇرگەنىن ايتقان.
«بۇگىندە دەپۋتاتتار ءوز وڭىرلەرىندە جۇمىس ىستەۋدە. «پارلامەنتتىك كانيكۋل» دەگەنىمىز ءداستۇرلى دەمالىس ەمەس. بۇل – ەڭ الدىمەن, جۇمىستى پارلامەنت قابىرعاسىنان تىس جەردە جالعاستىرۋ دەگەن ءسوز. قازىردىڭ وزىندە سەناتورلار الداعى سەسسيادا قارالاتىن زاڭ جوبالارىمەن جەكە جۇمىس ىستەپ جاتىر», دەلىنگەن جازبادا.
ىندەتكە بايلانىستى قابىلدانعان شەكتەۋ شارالارى دەپۋتاتتاردىڭ ايماقتارداعى ساپارىنا دا ايتارلىقتاي اسەر ەتكەنىن ايتقان سەنات توراعاسى حالىقپەن كەزدەسۋلەردىڭ الداعى ۋاقىتتا وتكىزىلەتىنىنە نازار اۋدارعان.
«كارانتين كەزىندە ازاماتتارمەن جاپپاي كەزدەسۋدەن باس تارتۋعا تۋرا كەلدى. بىراق كارانتين اياقتالىپ, ەپيدەميالىق جاعداي جاقسارعان سوڭ حالىقپەن كەزدەسۋلەر مىندەتتى تۇردە وتكىزىلەدى. بۇگىندە ايماقتارعا بارعان سەناتورلار مەملەكەت باسشىسى بەرگەن تاپسىرمالاردىڭ ورىندالۋ بارىسىن قاداعالاپ, باقىلاۋ جۇرگىزۋدە. ءدارى-دارمەك پەن مەديتسينالىق قۇرالدار جەتىسپەي جاتسا, سول تۇيتكىلدى دەرەۋ كوتەرىپ, ورتالىق جانە جەرگىلىكتى مەملەكەتتىك ورگانداردى جۇمىلدىرۋ ارقىلى ماسەلەنىڭ وڭ شەشىلۋىنە سەپتىكتەرىن تيگىزىپ جاتىر», دەيدى ماۋلەن اشىمباەۆ.
سونىمەن قاتار ول ءوز جازباسىندا ىندەت كەزىندەگى قايىرىمدىلىق ىستەرگە دە توقتالىپ وتكەن. «دەپۋتاتتارىمىز حالىقپەن بىرگە ءوز قاراجاتتارى ەسەبىنەن ازاماتتاردىڭ جانە مەديتسينالىق مەكەمەلەردىڭ قاجەتتىلىگى ءۇشىن قولداۋ كورسەتۋدە. كوپشىلىگى بۇل ارەكەتتەرىن جاريا تۇردە جاساپ جاتقان جوق. جاساعان قايىرىمدى ىستەرىن جاريالاۋ نە جاريالاماۋ – اركىمنىڭ جەكە قالاۋى. دەگەنمەن, قازىرگىدەي جاعدايدا قايىرىمدىلىق پياردىڭ قۇرالىنا اينالىپ كەتپەۋى كەرەك دەپ ەسەپتەيمىن», دەگەن سەنات توراعاسى قۇربان ايت قارساڭىندا قولعا الىنعان جاڭا باستامانى دا تىلگە تيەك ەتكەن.
«قۇربان ايت قارساڭىندا سەناتورلار مەديتسينالىق قىزمەتكەرلەردى قولداۋعا باعىتتالعان اكتسياعا بەلسەندى قاتىسىپ جاتىر. بيىل قازاقستان مۇسىلماندارى ءدىني باسقارماسىنىڭ «زەكەت قورى» دەپۋتاتتارمەن جانە ەرىكتىلەرمەن بىرلەسىپ دارىگەرلەر مەن مەديتسينالىق قىزمەتكەرلەردىڭ وتباسىلارىنا ازىق-تۇلىك قورجىندارىن تاراتۋدى ۇيىمداستىرىپ وتىر. مەن بۇل ىزگى باستاما قازاقستاندىقتار تاراپىنان ۇلكەن قولداۋ تابادى دەپ ويلايمىن», دەيدى ماۋلەن اشىمباەۆ.
سونداي-اق سەنات توراعاسى پاندەميامەن كۇرەس جۇمىستارىنا ءار ازاماتتىڭ ۇلەس قوسۋ كەرەكتىگىن اتاپ وتكەن. «كوروناۆيرۋس ادامداردى الەۋمەتتىك مارتەبەسىنە, تۇرمىس جاعدايىنا, جىنىسىنا, ەتنوستىق سيپاتىنا قاراي بولمەيدى. سوندىقتان پاندەميامەن كۇرەس – جالپىۇلتتىق كۇرەس دەگەن ءسوز. وسى جاعدايدا سەناتورلار ازاماتتاردىڭ دەنساۋلىعىن قورعاۋعا جانە داعدارىستان كەيىنگى كەزەڭدە ەكونوميكانى قالپىنا كەلتىرۋگە باعىتتالعان جۇمىسىن جالعاستىرا بەرەدى. بارلىق مۇددەلى ازاماتتارمەن جانە ۇيىمدارمەن ىنتىماقتاسا جۇمىس ىستەپ, بىرلەسىپ ارەكەت ەتۋگە دايىنبىز», دەلىنگەن ماۋلەن اشىمباەۆتىڭ جازباسىندا.