پرەمەر-مينيستر اسقار ءماميننىڭ توراعالىعىمەن وتكەن ۇكىمەت وتىرىسىندا ەلەكتروندى ساۋدانى دامىتۋ ماسەلەسى قارالدى, - دەپ حابارلايدى Egemen.kz.
بۇل باعىتتا اتقارىلىپ جاتقان جۇمىس تۋرالى ساۋدا جانە ينتەگراتسيا ءمينيسترى ب. سۇلتانوۆ جانە تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى مىندەتىن ۋاقىتشا اتقارۋشى ب. مۋسين باياندادى.
بيىل ءبىرىنشى جارتىجىلدىقتا قازاقستاندا ەلەكتروندى ساۋدانىڭ بولشەك تاۋار اينالىمىنداعى كولەمى ءبىر جارىم ەسەدەن اسا ءوستى.
پرەمەر-مينيستر ەلەكتروندى ساۋدانىڭ پەرسپەكتيۆاسى زور ەكەنىن, ءارى ەكونوميكانىڭ ىلەسپە سەكتورلارى – لوگيستيكاعا, كونتەينەرلىك تاسىمالداۋعا, كۋرەرلىك قىزمەتتەرگە, تسيفرلىق سەرۆيستەر مەن قىزمەتتەرگە, قولما-قول اقشاسىز اينالىمعا, ەڭبەك نارىعىنا جانە تاعى باسقالارعا مۋلتيپليكاتيۆتى اسەرىن تيگىزەتىنىن اتاپ ءوتتى.
ء"بىزدىڭ الدىمىزدا ەلەكتروندى ساۋدا راسىمدەرىن جەڭىلدەتىپ, قارجىلاندىرۋعا جول اشاتىن, ينتەرنەت ارقىلى مامىلە جاساۋعا سەنىمدىلىكتى نىعايتاتىن, سونداي-اق كيبەرقىلمىستارعا قارسى ارەكەت ەتۋگە مۇمكىندىك بەرەتىن ءتيىمدى شارالاردى قالىپتاستىرۋ مىندەتى تۇر", - دەدى ا. مامين.
ۇكىمەت باسشىسى 2025 جىلعا قاراي, قر-نىڭ ەلەكتروندى ساۋدا سەكتورىندا ارالاس سالالاردى ەسكەرە وتىرىپ, شامامەن 300 مىڭنان اسا جاڭا جۇمىس ورنى مەن ماماندىعى اشىلاتىنى بولجانىپ وتىرعانىن جەتكىزدى. وسى رەتتە, پرەمەر-مينيستر ساۋدا مينيسترلىگىنە ەڭبەك مينيسترلىگىمەن, "اتامەكەن" ۇكپ-مەن جانە ءىرى ينتەرنەت-دۇكەندەرمەن بىرگە كاسىپكەرلەردى ونلاين-ساۋدانى ءتيىمدى جۇرگىزۋگە وقىتۋ بويىنشا ارنايى باعدارلاما ازىرلەۋدى, سونىڭ ىشىندە, وسى باعدارلاماعا جاستاردى بەلسەندى تارتۋدى تاپسىردى.
ساۋدا لوگيستيكاسىن ودان ءارى ءتيىمدى دامىتۋ ماقساتىندا ساۋدا, تسيفرلىق دامۋ مينيسترلىكتەرىنە فۋلفيلمەنت-ورتالىقتار جەلىسىن جانە قازىرگى تاڭدا قۇرىلىپ جاتقان ۇلتتىق تاۋار وتكىزۋ جۇيەسىن دامىتۋ بويىنشا جوسپاردى ۇيلەستىرۋ, ال قازاقستاننىڭ دامۋ بانكىمەن بىرلەسىپ ونلاين-ساۋدادا جاڭا نەسيەلەندىرۋ ونىمدەرىن قاراستىرۋ ماسەلەسىن پىسىقتاۋ تاپسىرىلدى.
"يننوۆاتسيالىق تەحنولوگيالىق شەشىمدەردى قولدانۋ وسى سالاداعى زاڭناماعا وزگەرىستەر مەن تولىقتىرۋلار ەنگىزۋدى تالاپ ەتەدى", - دەپ ا. مامين, تسيفرلىق دامۋ مينيسترلىگىنە ءتيىستى زاڭ جوباسىن ازىرلەۋدى جەدەلدەتىپ, ۇكىمەتتىڭ قاراۋىنا اعىمداعى جىلى ۇسىنۋدى جۇكتەدى.
ۇكىمەت باسشىسى ء"بىر تەرەزە" قاعيداتى بويىنشا ونلاين ساۋداداعى تۇتىنۋشىلاردىڭ شاعىمدارى مەن ۇسىنىستارىن قابىلداۋدىڭ بىرىڭعاي پلاتفورماسىن ىسكە قوسۋ جۇمىسىن جانداندىرىپ, ءتيىمدى كەرى بايلانىستى جولعا قويۋدى تاپسىردى.
ا. مامين ەلەكتروندى ساۋدانى دامىتۋدىڭ 2023 جىلعا دەيىنگى جول كارتاسىن جانداندىرۋ مىندەتىن قويدى.