ەلىمىزدە پوليتسەيلەر 20 كۇن بويى ءدارى الىپساتارلارىنا تەكسەرىس جۇرگىزدى. ناتيجەسىندە, 604 دەرەك تىركەلىپتى. جارتىسىنا جۋىعى مەديتسينا سالاسىنىڭ قىزمەتكەرلەرى. ولار پرەپاراتتاردى الەۋمەتتىك جەلى ارقىلى نارىق باعاسىنان الدەقايدا قىمباتقا ساتىپ كەلگەن, - دەپ حابارلايدى Egemen.kz.
تۇركىستان وبلىسىنىڭ جەتىساي قالاسىندا بازاردان زاڭسىز ءدارىحانا اشىپ العاندار انىقتالدى. دارىلىك زاتتاردىڭ 558 وراماسى تاركىلەندى. سونداي-اق ءوز ۇيىندە كولەڭكەلى ساۋدا جاساعان ارىس قالاسىنىڭ تۇرعىنى ۇستالعان. باتىس قازاقستاندا دا دارىگەر ءوز باسپاناسىندا ءدارى وتكىزگەن. ەلوردادا باعانى كوتەرگەن 13 ءدارىحانا بەلگىلى بولدى.
ءتارتىپ ساقشىلارى رەيد كەزىندە ميلليونعا جۋىق ءدارى-دارمەك, 500 مىڭداي ماسكا جانە 36 مىڭنان اسا قورعانىس قۇرالىن تاركىلەدى.
مۇنداي دەرەك الماتىدا دا تىركەلدى. تۇرعىندى تەكسەرۋ بارىسىندا 100 توننا جاساندى دارىلىك زات تابىلعان.
بۇعان بايلانىستى سەنات دەپۋتاتى مۇحتار قۇل-مۇحاممەد باس پروكۋرورعا حات جولداپ, فارماتسەۆتيكالىق قويمالار مەن ءدارىحانالاردى تەكسەرۋدى ۇسىندى. سونداي-اق, جاساندى دارىلىك پرەپاراتتاردى دايارلاۋعا قاتىستى جازانى قاتايتۋ قاجەت دەپ سانايتىنىن جەتكىزدى.