قاۋىپتى ىندەتتىڭ تارالۋىن تەجەۋ ءۇشىن اتىراۋعا 20 توننا مەديتسينالىق پرەپاراتتار جەتكىزىلدى, دەپ حابارلايدى Egemen.kz
وبلىس اكىمىنىڭ ورىنباسارى ەرجان ءابىلحانوۆتىڭ مالىمدەۋىنشە, ونىڭ ىشىندە اسپيرين, ازيتروميتسين, تسەفازولين, تسەفترياكسون, سيستەما قويۋعا ارنالعان سۇيىقتىق, وفلوكساتسين جانە وزگە دە ءدارى-دارمەكتەر بار.
"سوڭعى ەكى اپتادا وڭىرگە 80 توننادان استام ءدارى-دارمەك جەتكىزىلگەن ەدى. بىراق, ء دارىحانالاردا قاۋىپتى ۆيرۋسقا قارسى, سونداي-اق, قىزۋ تۇسىرەتىن دارىلەردىڭ ءالى دە جەتىسپەيتىنىن انىقتادىق. وسىعان وراي وبلىس اكىمىنىڭ تاپسىرماسىمەن "اتىراۋ" الەۋمەتتىك-كاسىپكەرلىك كورپوراتسياسى" اق تاراپىنان ارنايى قاراجات ءبولىندى. بۇل كاسىپورىن بولىنگەن قارجىعا رەسەيدەگى نيجني نوۆگورود قالاسىنان 20 تونناعا جۋىق مەديكامەنتتى ساتىپ الىپ, "تەڭىزشەۆرويلدىڭ" ۇشاعىمەن جەتكىزىپ بەردى", دەدى ەرجان ءابىلحانوۆ.
وبلىس اكىمدىگىنىڭ ۇيىمداستىرۋىمەن الداعى ءۇش-ءتورت كۇندە تاعى دا 40 توننا ءدارى-دارمەك اكەلىنبەك.