"كازحروم" ترانس ۇلتتىق كومپاينياسىنىڭ باستى قۇرىلىمدىق بولىمشەسى – اقتوبە فەررو قورىتپا زاۋىتى ىندەت كەزىندە مەديتسينا مەكەمەلەرىنە تەڭدەسى جوق كومەگىن تيگىزۋدە. كۆي مەن پنەۆمونيا دەرتى قوس وكپەدەن قىسقاندا ادامنىڭ تىنىس الۋى قيىنداپ, وتتەگى جەتپەي قالاتىنى بەلگىلى بولىپ وتىر. وسى ورايدا اتالعان زاۋىت ماماندارىنىڭ شىلدەنىڭ 28 جۇلدىزىنان باستاپ وتتەگى باللوندارىن شىعارۋدى قولعا الدى. ءسويتىپ بۇگىنگى كۇنگە دەيىن ولار وبلىس اۋماعىنداعى اۋرۋحانالار مەن پروۆيزورلىق گوسپيتالدارعا التى مىڭ دانادان استام وتتەگى باللوندارىن جەتكىزگەن.
مۇنداي ءوتىنى-تىلەك زاۋىتتىقتارعا اقتوبەلىك دارىگەرلەر تاراپىنان بىلدىرىلگەن ەكەن. ءسويتىپ بۇرىننان ءوز ىسىمەن قالىپتاسقان ماشىعى بار ءىس قايتادان قولعا الىنىپ, وعان قاجەتتى جۇمىس كۇشى مەن كولىك تارتىلعان. سول كەزدە ءبىر ايدا نە ءبارى وتىز وسى تەكتەس ءونىم جاسالسا, بۇگىنگى كۇنى تەك ءبىر تاۋىلىكتىڭ ىشىندە وتتەگى باللونىنىڭ ءۇش ءجۇزى ەمدەۋ مەكەمەلەرىنە جول تارتۋدا.
- كومەكتەرى ىندەت جۇقتىرعاندارعا قاجەت ەكەنىن سەزىنۋ وتتەگى ۋچاسكەسىنىڭ مامان-قىزمەتكەرلەرىنە جاڭا سەرپىن مەن جىگەر بەردى دەپ سەنىممەن ايتا الامىن. ولار تاۋىلىك بويى جۇمىس ىستەۋ ءتارتىبىن وزدەرى اتتاي قالاپ الدى. ءبىز سوعان سۇيسىندىك. بۇل ءىستىڭ جاۋاپكەرشىلىگى وتە جوعارى. سوندىقتان دا ونىڭ تازا ءارى ساپالى بولۋى مۇقيات قاداعالانادى. ادام ءومىرى ءۇشىن ايقاس ۋاقىت كۇتتىرمەيدى. سوندىقتان اۋرۋحۋنادان تۇسكەن سۇرانىستاردى تولىقتاي وتەۋگە ۇمتىلىپ كەلەمىز, - دەدى بۇل جونىندە گازەت تىلشىسىنە "كازحروم تۇك" اق-نىڭ پرەزيدەنتى ارمان ەسەنجولوۆ.
- ءوز كەزەگىندە ىندەتپەن ارىستانشا ارپالىسىپ جۇرگەن دەنساۋلىق ساقشىلارى دا وندىرىسشىلەرگە شەكسىز العىستارى مەن ريزاشىلىعىن جەتكىزۋدە. مىسالى «دارۋ» ەمدەۋ-ساۋىقتىرۋ كليننيكاسىنىڭ باس دارىگەرى يزولدا كالانديا زاۋىت ماماندارىنىڭ ەڭبەگى ناۋقاستاردى اجالدان اراشالاپ الىپ قالىپ جۇرگەن دارىگەرلەردەن ءبىر مىسقال كەم تۇسپەيتىنىن ايتىپ بەردى.
سونداي-اق تۇك باسشىسىنىڭ ايتۋىنشا اقتوبە مەديتسينالىق ورتالىعى (امو) ۇجىمىنىڭ تاراپىنان بوبروۆ اپپاراتىنا وتتەگىنى دىمقىلداندىرۋ ءۇشىن قاجەتتى ارنايى شتۋتسەر-تەتىكتى اىرلەۋ جونىندە وتە كۇردەلى ۇسىنىس-تىلەك ءتۇسىپتى. بۇل جولى كومپانياداعى جوندەۋ-مەحانيكالىق تسەحىنىڭ ماماندارى ون ويلانىپ, ءجۇز تولعانىپ, ءجۇز جەتى رەت ولشەپ, ءبىر رەت كەسىپ سول قاجەتتى قوندىرعىنى جاساپ شىعارىپتى.
ارينە بۇل ارادا ولار اقتوبە مەديتسينا ورتالىعىندا دارىگەرلەرمەن كەڭەسىپ, ولاردىڭ بىلدىرگەن ۇسىنىس تىلەكتەرىن نازارعا العانى ايتپاسا دا تۇسىنىكتى. اق حالاتتىلار ماماندارعا بۇل دەتالدىڭ ۇلگى-ءپىشىمى قانداي بولۋى كەرەكتىگى جونىندە ەگجەي-تەگجەيلى ايتىپ بەرىپتى. سودان سوڭ ولار قايتادان زاۋىتتارىنا ورالىپ, ونىڭ ەسكيز-نوبايىن جاساپ شىعارادى. ونىڭ العاشقىسى سىناما تۇرىندە بولسا, كەيىنگىسى كوزدەگەن ناتيجەگە قول جەتكىزگەن. ءسويتىپ, زاۋىت جاڭاشىلدارى ونىڭ قىرىز جيىنتىعىن شىعارىپ امو-عا جەتكىزگەن.
ءساتىن سالعاندا "كازحرومنىڭ" بۇل تەتىگى پايدالانىلۋ كەزىندە تولىقتاي وڭ ناتيجە كورسەتكەن. جوندەۋ-مەحانيكالىق تسەح باستىعىنىڭ ورىنباسارى تەمىرباي مامىرباەۆ ايتىپ بەرگەن بۇل اڭگىمە زاۋىت شەبەرلەرىنىڭ بىلىكتىلىگى مەن كاسىبي شەبەرلىگىن, ءارى تىڭ ىزدەنىستەرگە بوي ۇرا الاتنىن تاعى ءبىر مارتە ايقىنداي العانى انىق. بۇل جولى اقتوە مەديتسينالىق ورتالىعىنىڭ باس دارىگەرى رۇستەم يساەۆ زاۋىت تاپقىشتارىنىڭ وي سۇزگىسىنەن شىققان دەتال ارنايى مەديتسينالىق قۇرال-جابدىقتار جاسايتىن ماماندار قىزمەتىنىڭ قاتارىنا قويىپتى.
سونىمەن بىرگە كازحرومدىقتار دارىگەرلەرگە قولداۋىن ەلىمىزدە COVID-19 دەرتىنىڭ ەڭ العاش تىركەلگەن كەزىنەن كورسەتە باستاعانىن ايتا كەتكەن ورىندى. ءسويتىپ ولار ءساۋىر ايىندا ء"بىز بىرگەمىز" اكتسياسى اياسىندا ەرىكتى تۇردە ەكى ميلليون تەڭگە جيناپ مەديتسينا مەكەمەسىنىڭ ەسەبىنە اۋدارعان. ونىڭ تەڭ جارتىسى كىشى مەديتسينالىق قىزمەتكەرلەرگە ماتەريالدىق قولداۋ رەتىندە بەرىلگەن. سونداي-اق اتالعان كومپانيانىڭ ينجەنەر-تەحنيك قىزمەتكەرلەرى مەن بارلىق جۇمىسشىلارى مەتاللۋرگ ماماندىعىنىڭ يەلەرى بولىپ تابىلادى. ولار تاياۋدا وتكىزىلگەن كاسىبي مەرەكەلەرى – مەتاللۋرگ كۇنى قارساڭىندا وزدەرى مەن وزدەرى مارە-سارە بولۋدى قالاماي اقتوبە, حرومتاۋ جانە اقسۋ قالالارىنداعى مەديتسينا مەكەمەلەرى ۇجىمدارىنا جەمىس-جيدەكتەر مەن ءتاتتى تاعامدار جيىنتىعىن جەتكىزىپ بەرگەن ەكەن.
ەندەشە "جارايسىڭدار, كازحرومدىق جىگىتتەر!" دەۋدىڭ ابدەن ءجونى بار ەمەس پە؟!
اقتوبە