مينيسترلىك ماماندارىمەن بىرگە جۋرناليستەر مەن بلوگەرلەر رۇقسات ەتىلمەگەن قوقىستاردى انىقتاپ, سۋرەتكە ءتۇسىرىپ, بەينەتۇسىرىلىم جاسادى, - دەپ حابارلايدى Egemen.kz.
بۇعان دەيىن ەكولوگيا مينيسترلىگى ەلدەگى ستيحيالىق قوقىس پروبلەمالارى جانە رۇقسات ەتىلمەگەن جەرلەرگە قوقىس تاستايتىن ەل ازاماتتارى مەن كومپانيالاردىڭ سانادان تىس ارەكەتى تۋرالى حابارلادى. جاقىندا ەل پرەزيدەنتى قاسىم-جومارت توقاەۆ تا حالىقتىڭ ەكولوگيالىق مادەنيەتى مەن مەكتەپتەردە ءتيىستى ءپان ەنگىزۋ قاجەتتىلىگى تۋرالى ايتقان بولاتىن.
تاعى ءبىر ۇلكەن پروبلەما - ششۋچينسك, بۋراباي جانە باسقا دا ەلدىمەكەندەردىڭ, ءىرى دەمالىس ورىندارىنىڭ جانىندا رۇقسات ەتىلگەن پوليگونداردىڭ بولماۋى. قر ەگترم ەكولوگيالىق رەتتەۋ جانە باقىلاۋ كوميتەتىنىڭ توراعاسى زۇلفىحار جولداسوۆتىڭ ايتۋىنشا, قولدانىستاعى پوليگوندار كوبىنەسە زاڭسىز, سانيتارلىق نورمالارعا سايكەس كەلمەيدى, جول بويىندا ءجيى ورنالاسادى, ورتەنىپ جاتادى. سونىمەن قاتار, حالىقتان قوقىس شىعارۋ ءۇشىن جينالعان اقشانىڭ قايدا كەتەتىنى بەلگىسىز, دەدى كوميتەت باسشىسى. 2015 جىلى ەكولوگيا مينيسترلىگى ۇلكەن ايىپپۇل سالا وتىرىپ, بۋراباي ماڭىنداعى رۇقسات ەتىلمەگەن پوليگوننىڭ قىزمەتىن توقتاتتى.
"جەرگىلىكتى اكىمدىك باسقا اۋىلدىق وكرۋگتە جاڭا پوليگون سالۋعا ۋادە بەردى. بىراق بۇل ماسەلەنىڭ شەشىمى كەشەۋىلدەۋدە", - دەدى ز. جولداسوۆ.
سونداي-اق, ونىڭ ايتۋىنشا, كەيبىر ەلدىمەكەندەر مەن دەمالىس بازالارىندا تازارتۋ قوندىرعىلارى جوق بولعاندىقتان, ەكولوگيالىق جاعداي ناشارلاۋدا. سونىڭ ءبىرى – قازاقستانداعى ەڭ كورىكتى جەردىڭ ءبىرى – بۋراباي.
"بۋراباي, زەرەندى جانە ششۋچە اۋىلدارىندا تازارتۋ قوندىرعىسى سالىنعانمەن, پايدالانۋعا بەرىلمەگەن. جالپى, بۇل ستيحيالىق قوقىستاردىڭ پايدا بولۋىنا اكەلىپ سوعادى. حالىق قالدىقتاردى دالاعا تاستاۋعا ءماجبۇر", - دەدى كوميتەت باسشىسى.
"ەكولوگيا مينيسترلىگى بۇل ماسەلەنى جەرگىلىكتى اكىمدىكتەردىڭ الدىنا قويىپ, قابىلدانعان ستاندارتتارعا سايكەس كەلەتىن جاڭا پوليگوندار مەن تازارتۋ نىساندارىن سالۋ تۋرالى وڭ شەشىم ىزدەۋدە.
سونىمەن بىرگە, مينيسترلىك بىرنەشە رەت دابىل قاعىپ, ازاماتتاردى دەمالىس ورىندارىندا قوقىس تاستاماۋعا, ونى ستيحيالىق قوقىس ورنىنا تاستاماي, وزدەرىمەن بىرگە الىپ كەتۋگە شاقىرعان ەدى.
ەكولوگيا مينيسترلىگىنىڭ قر ءىىم ماماندارىمەن, قورعالاتىن تابيعي اۋماق ينسپەكتورلارىمەن, قوعام بەلسەندىلەرىمەن جانە جۋرناليستەرمەن بىرلەسكەن دەمالىس ورىندارىنا رەيدتەرى بۇكىل قازاقستان بويىنشا جازدىڭ سوڭىنا دەيىن دەمالىس كۇندەرى, تۋريستەردىڭ جاپپاي كەلۋ ماۋسىمىندا جالعاسادى. سونىمەن بىرگە, ەگەر ەكولوگيالىق زاڭنامانىڭ بۇزىلۋى انىقتالسا, زاڭبۇزۋشىلارعا ايىپپۇل سالۋعا دەيىن قاتاڭ شارالار قولدانىلادى, دەپ حابارلادى مينيسترلىك.