بۇگىنگى تاڭدا جامبىل وبلىسىنىڭ مەديتسينالىق ۇيىمدارىندا كوروناۆيرۋس ينفەكتسياسىمەن جانە پنەۆمونيا ىندەتىمەن اۋىرعان ناۋقاستاردى ەمدەۋگە ارنالعان ءدارى-دارمەكتەردىڭ ءۇش اپتالىق قورى قالىپتاستى, - دەپ جازادى Egemen.kz
وبلىستىق دەنساۋلىق ساقتاۋ باسقارماسىنىڭ باسشىسى مارات جۇمانقۇلوۆ جۇقپالى جانە پروۆيزورلىق اۋرۋحانالاردا ءدارى-دارمەكتەر مەن مەديتسينالىق قۇرالداردىڭ جەتكىلىكتى ەكەنىن ايتىپ وتىر. ونىڭ ىشىندە 50,2 مىڭ تابلەتكا جانە 67,8 مىڭ فلاكون انتيبيوتيكتەر, 9,8 مىڭ دانا شپريتس, دەنە قىزۋىن تۇسىرەتىن 2 مىڭ شيشا, ۆيرۋسقا قارسى 15 مىڭ تابلەتكا بار. «سك-فارماتسيا» مەكەمەسى ارقىلى جالپى قۇنى 1,2 ميلليارد تەڭگەگە ءدارى-دارمەك ساتىپ الۋعا قوسىمشا وتىنىمدەر بەرىلگەن. بۇگىندە سول قاراجاتتىڭ ەسەبىنەن 471 ميلليون تەڭگەگە دارىلەر ساتىپ الىنىپ, وبلىسقا جەتكىزىلدى.
سونىمەن قاتار, وزبەكستان مەملەكەتىنەن ءدارى-دارمەك ساتىپ الۋعا جەرگىلىكتى بيۋدجەتتەن 544 ميلليون تەڭگە بولىنگەن. بۇگىنگى تاڭدا وزبەكستاننان 24 ميلليون تەڭگە كولەمىندەگى ءدارى-دارمەكتەردىڭ العاشقى پارتياسى كەلىپ, اۋرۋحانالارعا تاراتىلدى. بۇل رەتتە مارات جۇمانقۇلوۆ ءدارى-دارمەكتەرگە دەگەن سۇرانىس ءالى ازايماي وتىرعانىن, سوندىقتان دا وتىنىمدەردى تىركەۋ جانە جاڭا زاتتاردى ءتۇسىرۋ, جەتكىزۋ جۇمىستارى شاپشاڭدىقتى تالاپ ەتۋدە ەكەنىن جەتكىزدى. سونداي-اق, ءوڭىردىڭ باس دارىگەرى مەديتسينالىق مەكەمەلەردىڭ قاجەتتىلىكتەرىنە سايكەس ءدارى-دارمەكتەردىڭ ۋاقىتىلى كەلۋى مەن دۇرىس تاراتىلۋىنا قاتاڭ باقىلاۋ جاسالاتىنىن ايتتى.
تاعى ءبىر ايتا كەتەرلىگى, جەرگىلىكتى كاسىپكەرلەر دە كوروناۆيرۋسپەن كۇرەستە شەت قالماي, ءوز ۇلەستەرىن قوسۋدا. اتاپ ايتساق, كاسىپكەرلەر از قامتاماسىز ەتىلگەن وتباسىلارعا ءدارى-دارمەك الۋعا 48 ميلليون تەڭگە ءبولىپتى. جالپى, وبلىس كاسىپكەرلەرى 338 ميلليون تەڭگە جيناعان. سونىمەن قاتار, بۇگىندە جامبىل وبلىسىنا كاتار, قىتاي, وزبەكستان, تۇركيا, بىرىككەن اراب امىرلىكتەرى سىندى بىرقاتار مەملەكەتتەردەن 45 مىڭ جەكە قورعانىس قۇرالدار جيىنتىعى, 1 مىڭ ەكسپرەسس-تەست, 220 ليتر انتيسەپتيك, 11,2 مىڭ پاكەت, ۆيرۋسقا قارسى پرەپاراتتار, 235 پاكەت انتيبيوتيكتەر, 8 مىڭ پاكەت جانە باسقا دا قاجەتتى دارىلەر كەلىپ جەتتى.
جامبىل وبلىسى