قۇقىق قورعاۋ ورگاندارى ءمايىتحانالار مەن جەرلەۋ قىزمەتىنىڭ قۇنىن كوتەرگەندەردى تەكسەرۋگە كىرىستى. مۇنداي شارالار بارلىق وڭىردە ءجۇرىپ جاتىر, - دەپ حابارلايدى Egemen.kz قازاقستان ۇلتتىق ارناسىنا سىلتەمە جاساپ.
الماتىدا جاعا ۇستاتار جاعداي تىركەلدى. جەرلەۋ قىزمەتىنە جۇگىنگەن تۇرعىندار, ونىڭ اقىسىن ەستىپ ەسەڭگىرەپ قالعان. بىراق شاراسىزدىقتان 80 مىڭنان باستاپ, كەيبىرى ءتىپتى 1 ملن تەڭگەگە دەيىن تولەۋگە ءماجبۇر بولدى. مۇنداي باسسىزدىققا شىداماعاندار پوليتسيا دەپارتامەنتىنە شاعىمداندى. ال قايعىدان قارجى تابۋعا قىسىلماعان پىسىقايلار قاماۋعا الىندى.
قالالىق ءىىد رەسمي وكىلى سالتانات ازىربەكتىڭ ايتۋىنشا, نەگىزى ارنايى كاسساعا 54 مىڭ تەڭگە كولەمىندەگى اقشا تولەنەدى ەكەن. بۇل بەلگىلەنگەن سوما.
ازىرگە ءراسىمدى اتقارۋدىڭ ناقتىلانعان باعاسى جوق. ءار وڭىردە ءار ءتۇرلى. بىراق شەكتى باعانى بەكىتۋ جۇمىستارى جۇرگىزىلىپ جاتىر.
سوڭعى ەكى اپتادا ءمايىتتى تاسىمالداۋ جانە جەرلەۋ اقىسى اسپانداپ كەتتى. سوندىقتان قاسىم-جومارت توقاەۆ اكىمدەرگە ءبىر كۇن ىشىندە باعانى كوتەرگەندەردى جونگە كەلتىرۋدى تاپسىرعان ەدى.
قازىر ىشكى ىستەر مينيسترلىگى مەن كوررۋپتسياعا قارسى قىزمەت بىرلەسىپ باعانى بەتىمەن جىبەرگەندەردىڭ سوڭىنا شام الىپ ءتۇستى. بەلگىلەنگەن سومادان ءبىر تيىن ارتىق سۇراسا ساباسىنا ءتۇسىرۋ ءۇشىن قۇزىرلى ورگانداردى حاباردار ەتۋ كەرەك.