قاۋىپتى ىندەتتىڭ تىركەلۋىنەن الدىڭعى ورىنعا شىققان اتىراۋعا جەدەل جاردەم بەرۋگە رەسەيلىك دارىگەرلەر دە بەت بۇردى. الدىمەن كورشى ەلدەن التى دارىگەر كەلگەن ەدى. ولاردى وبلىس اكىمى ماحامبەت دوسمۇحامبەتوۆ قابىلداپ, اتىراۋدا قالىپتاسىپ وتىرعان ەپيدەميالىق احۋالدى ءتۇسىندىردى.
– ەلىمىزدە قازىر كوروناۆيرۋسپەن بىرگە پنەۆمونيا دەرتى دە ۋشىعىپ تۇر. وسى ايدا وبلىستىق اۋرۋحانا جانىنان 400 ورىندىق ينفەكتسيالىق ستاتسيونار اشىلادى. ال قۇرمانعازى اۋدانىندا قوسىمشا ورىندار جاساقتالىپ جاتىر. ءبىز قاجەتتى ستاتسيونارلىق ورىنمەن, ءدارى-دارمەكپەن, قۇرال-جابدىقپەن تولىقتاي قامتاماسىز ەتەمىز. بىزگە اشىلىپ جاتقان ستاتسيونارلىق ورىنداردا ناۋقاستاردى ەمدەيتىن تاجىريبەلى دارىگەرلەر كەرەك. جىلدار بويى ءتۇيىندى ماسەلەگە اينالعان مەديتسينالىق مامانداردىڭ تاپشىلىعى قازىرگى كەزدە انىق بايقالدى. سوعان قاراماستان, قازىر ءبىزدىڭ دارىگەرلەرىمىز الدىڭعى شەپتە ايانباي ەڭبەك ەتۋدە. دەگەنمەن ءبىرازى قاۋىپتى ىندەتتى جۇقتىردى, قالعانى ىندەتپەن كۇرەسۋ ۇستىندە. اتقارار جۇمىس كوپ. بىزگە سىزدەردىڭ تاجىريبەلەرىڭىز, بىلىمدەرىڭىز بەن بىلىكتەرىڭىز قاجەت بولىپ تۇر, – دەدى وبلىس اكىمى.
وتكەن اپتادا ءوڭىر باسشىسى ماحامبەت دوسمۇحامبەتوۆ رەسەيدەگى استراحان وبلىسىنىڭ گۋبەرناتورى يگور بابۋشكينمەن مەديتسينا قىزمەتكەرلەرىن اتىراۋعا شاقىرۋ تۋرالى كەلىسىم جاساعان بولاتىن. مۇنايلى وڭىرمەن قوڭسى قونعان استراحاننان كەلگەن بەس دارىگەردى جالاقىمەن, جاتىن ورنىمەن, تاماقپەن قامتۋ, ءجۇرىپ-تۇرۋ ماسەلەلەرى تولىق شەشىمىن تاپتى. قازىر ولار دا قاۋىپتى ىندەتتى جۇقتىرعان ناۋقاستاردى ەمدەۋگە كىرىستى. وبلىستىق دەنساۋلىق ساقتاۋ باسقارماسى باسشىلارىنىڭ ايتۋىنشا, رەسەيلىك دارىگەرلەردىڭ كەيبىرى اۋداندارعا جىبەرىلۋى مۇمكىن.
استراحاندىق دارىگەر اننا چەپەلدىڭ ايتۋىنشا, اتىراۋدا الاڭسىز جۇمىس ىستەۋگە بارلىق جاعداي جاسالدى. سول سەبەپتەن, ولار اتىراۋدىق ارىپتەستەرىنە كوروناۆيرۋس ينفەكتسياسىن ەمدەۋگە كومەكتەسۋگە بارىن سالعالى وتىر. رەسەيدەگى كورولەۆ قالاسىنان كەلگەن دارىگەر ۆەرونيكا بوگومازوۆانىڭ پىكىرىنە سۇيەنسەك, ەكى ەلدىڭ كوروناۆيرۋس ينفەكتسياسىن ەمدەۋ تاسىلىندە ايتارلىقتاي وزگەرىس جوق. ءتىپتى بىردەي دەۋگە بولادى.
– بۇل ىندەتتى جەڭۋ – بارشا دارىگەردىڭ ارمانى. ناۋقاستاردى ەمدەۋ بارىسىندا قازاقستاندىق, نە رەسەيلىك ءتاسىلدى قولدانۋ قاجەت دەگەن پىكىرتالاس بولماۋى قاجەت. الايدا الەۋمەتتىك جەلىلەردە ەكى ەل دارىگەرلەرىنىڭ اراسىنا الاۋىزدىق تۋدىراتىنداي پىكىرلەر كەزدەسىپ جاتادى. ماسەلەن, مەنىمەن بىرگە كەلگەن رەسەيلىك دارىگەرلەردىڭ ەشقايسىسى «قازاقستانداعى كوروناۆيرۋستى ەمدەۋ تاكتيكاسى دۇرىس ەمەس» دەگەن مالىمدەمە جاساعان جوق. ارينە بولماشى ايىرماشىلىقتار كەزدەسەتىن شىعار. بىراق نەگىزگى تەراپيا رەسەيدەگى حاتتاماعا سايكەس كەلەدى. سوندىقتان الەۋمەتتىك جەلىلەردە تاراپ جاتقان جاڭساق پىكىرلەرگە سەنبەگەن ءجون, – دەيدى ول.
اتىراۋ وبلىسى