جىل باسىنان بەرى باتىس قازاقستان وبلىسىندا 10 ادام سۋعا كەتتى, دەپ حابارلايدى Egemen.kz
ورال پوليتسيا باسقارماسى ءباسپاسوز قىزمەتىنىڭ اقپاراتى بويىنشا, 2020 جىلدىڭ باسىنان بەرى 10 سۋعا باتۋ فاكتىسى تىركەلگەن, ونىڭ 7-ەۋى 6 مەن 17 جاس ارالىعىنداعى بالالار.
ولاردىڭ قازا بولۋىنىڭ نەگىزگى سەبەبى, بەيقامدىق, بەلگىلەنبەگەن جەرلەردە سۋعا شومىلۋ, اتا-اناسىنىڭ قاراۋىنسىز قالدىرۋ جانە ەرەسەكتەردىڭ نەمقۇرايدىلىعىنان بولىپ وتىر. ولار بالالارىنىڭ سۋ ايلاعىنا جالعىز كەلگەنىن كورسە دە, شارا قولدانبايدى جانە پوليتسياعا قوڭىراۋ شالمايدى.
پوليتسيا قىزمەتكەرلەرى تۇراقتى تۇردە بقو تجد وكىلدەرىمەن بىرلەسىپ, سۋعا شومىلۋشىلاردىڭ جينالاتىن ورىندارى بويىنشا رەيدتىك ءىس-شارالار وتكىزدى. سۋعا شومىلۋعا ارنالعان ورىندار مەن "جابايى" جاعاجايلاردى قامتي وتىرىپ, ولارعا ارنايى ەسكەرتۋلەر ايتىلدى.
سۋعا تۇسۋشىلەرگە كوپشىلىك دەمالاتىن ورىنداردا ءوزىن ءوزى ۇستاۋ ەرەجەلەرى ءتۇسىندىرىلدى, سۋداعى قاۋىپسىز ءجۇرىس-تۇرىس جانە العاشقى جەدەل كومەك كورسەتۋ تۋرالى جادىنامالار تاراتىلدى.