ستۋدەنتتەر ءۇيىنىڭ ىرگەتاسى قالاندى

جاڭا جاتاقحانانىڭ ىرگەتاسىن قالاۋ راسىمىنە ۋنيۆەرسيتەت باسشىلىعى, ينۆەستور مەن قۇرىلىس كومپانيالارىنىڭ وكىلدەرى, ۋنيۆەرسيتەت وقىتۋشىلارى مەن ستۋدەنتتەرى قاتىستى.

سالتاناتتى شارادا ءسوز العان قازۇۋ رەكتورى, اكادەميك عالىم مۇتانوۆ ستۋدەنتتەردى تۇرعىن ۇيمەن قامتاماسىز ەتۋ ماسەلەسىن شەشۋگە مەملەكەت ەرەكشە كوڭىل ءبولىپ وتىرعانىن اتاپ ءوتتى. بۇل ماڭىزدى مىندەتتى بەس الەۋمەتتىك باستامانى جۇزەگە اسىرۋ اياسىندا تۇڭعىش پرەزيدەنت ن.نازارباەۆ قويعان بولاتىن. ۋنيۆەرسيتەت وسى باعىتتا دايەكتى جۇمىس ىستەۋدە. جاڭا ستۋدەنتتەر ءۇيىنىڭ قۇرىلىسىن ءبىر جىلدان كەيىن اياقتاۋ جوسپارلانىپ وتىر. ونىڭ قۇرىلىسى مەملەكەت-جەكەمەنشىك ارىپتەستىك نەگىزىندە جۇزەگە اسىرىلۋدا, ينۆەستور – «Baikadam» كومپانيا­سى, ال قۇرىلىسشى كومپانيا «سك سامۇرىق-قۇرىلىس» جشس. جالپى كولەمى 22,5 مىڭ شارشى مەتردى قۇرايتىن توعىز قاباتتى عيماراتتا اسحانا, كومپيۋتەرلىك سىنىپتار, دەمالىس ورىندارى, مادەني-تۇرمىستىق نىساندار بولادى. ستۋدەنتتەر اجەتحانا جانە سەبەزگىمەن جابدىقتالاتىن ەكى ورىندى بولمەلەردە تۇرادى.

سوڭعى جىلدارى قازۇۋ QS جاھاندىق رەيتينگىسىندە 165-ورىندى يەلەنىپ, الەمنىڭ ەڭ ۇزدىك 200 جوو-نىڭ قاتارىنا كىردى. بۇل كۇندە ۇلتتىق ۋنيۆەرسيتەتتە ءبىلىم العىسى كەلەتىن تۇلەكتەردىڭ سانى دا ارتىپ كەلەدى, ولاردىڭ قاتارىندا شەتەل ازاماتتارى دا بار. كوپتەگەن ستۋدەنتتەر تۇرعىن ۇيگە مۇقتاج, ال جاڭا جايلى جاتاقحانا سالۋ بۇل ماسەلەنى شەشۋگە مۇمكىندىك بەرەدى.

الماتى