قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان ءابىش ۇلى نازارباەۆتىڭ سارابدال ساياساتىنىڭ ناتيجەسىندە سارىارقا تورىندە تاۋەلسىز ەلىمىزدىڭ تاريحىنداعى جاڭا, كورىكتى ەلوردامىز بوي كوتەرگەنى بارىمىزگە ءمالىم. ەلوردا ەگەمەندىككە قول جەتكىزگەن كۇللى قازاقتىڭ تىلەگى ەدى. سول تىلەگىمىز قابىل بولىپ, باس قالامىز تىرەگىمىزگە اينالدى.
بۇگىندە تالاي تاعدىرلار توعىسقان نۇر-سۇلتان شاھارى - الەمنىڭ ەڭ ادەمى استانالارىنىڭ ءبىرى, ونىڭ كورىكتى كەلبەتىنە تاڭقالمايتىن جان تابىلماس. ارايلى استانا تاقىرىبىندا قانشاما جۇرەكجاردى ولەڭدەر, اۋەزدى اۋەندەر, اسەم اندەر جازىلدى. كۇننەن كۇنگە دامىپ كەلە جاتقان الاشتىڭ استاناسى - ەلدىگىمىزدىڭ نىشانى. سان مىڭداعان ادام وسى قالامەن بولاشاعىن بايلانىستىرعىسى كەلەتىنى جاسىرىن ەمەس. ءيا, استانا ارمانداردىڭ قالاسى. ەڭسەلى ەلوردامىزدا كوپتەگەن جاستارىمىز باعىن تاۋىپ, باقىتىن ەسەلەدى. بۇل جاستاردىڭ جۇماق مەكەنى. جانعا سايا ساياباقتار, گۇلدەنگەن گۇلزارلار, عاجايىپ سۋبۇرقاقتار, اسپانمەن تالاسقان بيىك-بيىك عيماراتتار - ءبارى دە باس شاھاردىڭ شىرايىن كىرگىزىپ, جان بىتكەندى بولاشاققا جەتەلەيدى.
اسقارالى الاتاۋ بوكتەرىنەن استانا ارقا توسىنە كوشىرىلەدى دەگەندە كوبىسى كۇمانمەن قاراعانى تاريحي شىندىق. الايدا, قازىر ارقا بويىندا تەڭدەسى جوق جاڭا قالا بوي كوتەرگەنىنە بارلىعىمىز كۋا بولىپ وتىرمىز.
"جاڭا استانا – ەجەلگى قازاق جەرىنىڭ ءتورى. استانا كەلبەتى – ۇلت كەلبەتى. استانا – وتانىمىزدىڭ جۇرەگى, تاۋەلسىزدىگىمىزدىڭ تىرەگى. جاڭا استانا – تاۋەلسىز قازاقستان ءۇشىن جارقىن كەلەشەكتىڭ نىشانى" - دەپ, ەلباسىنىڭ ەلورداعا باعا بەرۋى, كوڭىلگە قۋانىش ۇيالاتادى. قازاقستان رەسپۋبليكاسىنىڭ پرەزيدەنتى, مەملەكەت باسشىسى قاسىم-جومارت كەمەل ۇلى توقاەۆ ەلىمىزدىڭ يگىلىگى ءۇشىن كوپتەگەن جۇمىستار اتقارۋدا. باس قالامىزدى جان-جاقتى دامىتۋ باعىتتارىن ايقىنداپ, بۇدان دا كورىكتەنە تۇسۋىنە قولداۋ كورسەتۋدە. ال, ونەر قايراتكەرلەرى, تالاپتى دا تالانتتى جاستار ءوز شىعارماشىلىعى ارقىلى استانانىڭ سۇلۋ كەلبەتىنە ءۇن قوسىپ, ادەمىلىگىن اسپەتتەپ, مادەنيەت پەن وركەنيەتىمىزدىڭ وركەندەۋىنە زور ۇلەس قوسىپ كەلەدى. ماسەلەن, بيىلعى استانانىڭ تۋعان كۇنىنە وراي, نۇر-سۇلتان قالاسى اكىمدىگى مەملەكەتتىك اكادەميالىق فيلارمونياسىنىڭ ونەرپازدارى قالا تۇرعىندارى مەن قوناقتارىنا ارناپ ەرەكشە فورماتتا ءىس-شارالار ۇيىمداستىردى (ەلدەگى جاعدايعا بايلانىستى بارلىق سانيتارلىق تالاپتاردى ساقتاي وتىرىپ). شىعارماشىلىق ۇجىمدار كەمە ۇستىندە جانە ەكى قاباتتان تۇراتىن اۆتوبۋسپەن شاھار ءىشىن ارالاپ, تاڭعاجايىپ تۋىندىلارىن حالىققا تارتۋ ەتتى. سونىمەن قاتار, «ۇلتتىق دومبىرا كۇنىن» اتاپ ءوتىپ, ۇرپاق ءۇشىن قاجەتتى تىڭ اقپاراتتارمەن ءبولىسىپ, ونەرلەرىن ورتاعا سالدى.
ءيا, ونەر – حالىقتىڭ رۋحاني ازىعى, جانى, جۇرەگى, تۋلاعان قانى. ارايلى استانانىڭ مادەنيەتىن كوتەرۋگە ات سالىسۋ كەز كەلگەن قازاق ونەرپازىنىڭ پارىزى دەپ ەسەپتەيمىن. سەبەبى, بارلىق يگى باستامالار استانادان باستالادى. شىندىعىندا ەلوردا – ەلدىڭ جۇرەگى. ەندەشە, ەل جۇرەگى توقتاماسىن! تۋعان كۇنىڭمەن, استانا! ەرلان داكەنوۆ نۇر-سۇلتان قالاسى اكىمدىگىنىڭ
"مەملەكەتتىك اكادەميالىق فيلارمونيا" مكقك باس ديرەكتورى