باقىتجان ساعىنتاەۆ الماتىداعى ەپيدەميولوگيالىق جاعدايدى باياندادى

قالا اكىمى باقىتجان ساعىنتاەۆ قالاداعى جاعدايدى تۇراقتاندىرۋ ءۇشىن كەشەندى جۇمىستار جۇرگىزىلىپ جاتقانىن حابارلادى. وسىلايشا, اۋىرعان ادامداردىڭ ەم الۋلارى ءۇشىن قوسىمشا جاتاتىن ورىندار قورىن قۇرۋ, زەرتحانالاردىڭ وتكىزۋ مۇمكىندىگىن ۇلعايتۋ, ستاتسيونارلى اۋرۋحانالاردى قاجەتتى قۇرالدارمەن قامتاماسىز ەتۋ جانە ءدارىحانالاردا ءدارى-دارىمەكتىڭ بار-جوعى مەن باعالارىنا مونيتورينگ جۇرگىزىلۋدە.

بۇگىنگى جاعدايدى جانە جۇقتىرۋ بولجامدارىن ەسكەرە وتىرىپ, دارىگەرلەردىڭ, ورتا جانە كىشى بۋىن مەديتسينالىق قىزمەتكەرلەرىنىڭ قوسىمشا بريگادالارى قۇرىلدى. بىلىكتىلىكتى ارتتىرۋدىڭ ونلاين-كۋرستارى وتكىزىلەدى. قالادا ۆولونتەرلەردى قوسىمشا قابىلداۋ جانە قاجەت بولعان جاعدايدا بەيىندى ەمەس مەديكتەردى تەز قايتا وقىتۋ جۇزەگە اسىرىلادى.

"بۇگىنگى تاڭدا الماتى قالاسى بويىنشا ەپيدەميولوگيالىق جاعداي كۇردەلى, بىراق باقىلاۋدا. بىزدە الماتى قالاسى اۋماعىندا كوروناۆيرۋستىڭ تارالۋىنىڭ الدىن الۋ جانە وعان قارسى ارەكەت ەتۋ بويىنشا جاسالعان ءىس-شارالار جوسپارى بار, ونى ءبىز باقىلاپ وتىرمىز", - دەدى باقىتجان ساعىنتاەۆ.

قالا اكىمى ونلاين بريفينگ وتكىزىپ جاتقان كەزدە الماتىدا ىندەت جۇقتىرعانداردىڭ ناقتى سانى – 6202-گە جەتىپ, كوروناۆيرۋستىڭ كۇن سايىنعى ءورشۋى 1,1 پايىزدى قۇرادى. بۇل كۇندەرى ينفەكتسيالىق ستاتسيونارلاردا 1772 ادام ەمدەلىپ جاتىر. مەگاپوليستەگى ناۋقاستاردىڭ 349-ىنىڭ جاعدايى اۋىر بولسا, 24-ءى ءحال ۇستىندە. 1264 ناۋقاستىڭ دەنساۋلىعى ورتاشا دەپ باعالانسا, 135 ادام ءتاۋىر بولىپ كەلەدى. دەگەنمەن, جاعدايى قيىن جانە اۋىر پاتسيەنتتەردىڭ سانى ارتىپ بارادى. ءوز كەزەگىندە پنەۆمونيا كەسەلىنە شالدىققان الماتىلىقتار قاتارى كۇرت كوبەيگەن. وتكەن جىلدىڭ وسى ۋاعىمەن سالىستىرعاندا تىنىس جولى اۋرۋلارىنان كوز جۇمعاندار سانى 68,6 پايىزعا ءوسىپتى.

الماتى