بۇگىن پارلامەنتتىڭ التىنشى شاقىرىلىمىنىڭ بەسىنشى سەسسياسى اياقتالدى. وسىعان وراي سەنات توراعاسى ماۋلەن اشىمباەۆ facebook-تەگى پاراقشاسىنا ارنايى جازبا جازىپ, اتقارىلعان جۇمىستار جونىندە مالىمدەدى, - دەپ جازادى Egemen.kz
سەنات توراعاسىنىڭ ايتۋىنشا, بۇل سەسسيادا دەپۋتاتتار اۋقىمدى جۇمىس اتقارىپ, 98 زاڭ قابىلداعان.
"ولاردىڭ ارقايسىسى مۇقيات قارالىپ, جان-جاقتى تالقىلانىپ, پىسىقتالدى. پاندەميا كەزىندە دەپۋتاتتىق كورپۋس مەملەكەت باسشىسىنىڭ حالىقتى الەۋمەتتىك قولداۋعا جانە داعدارىستىڭ سالدارىن جويۋعا ارنالعان باستامالارىن زاڭنامالىق تۇرعىدان قامتاماسىز ەتتى. پارلامەنت ەكونوميكالىق ءوسىمدى قالپىنا كەلتىرۋ جونىندەگى كەشەندى جوسپار اياسىندا بىرقاتار زاڭعا ەنگىزىلگەن تولىقتىرۋلاردى قابىلدادى. ولار ەڭبەكاقى تولەۋ قورىنان ۇستالاتىن سالىقتان جانە الەۋمەتتىك تولەمدەردەن بوساتۋعا, سونداي-اق, م ۇلىككە, كولىككە جانە جەرگە سالىناتىن سالىقتار بويىنشا ازاماتتاردىڭ ايىپپۇلدارى مەن ءوسىمپۇلدارىن كەشىرۋگە ارنالعان. ودان بولەك, حالىق پەن بيزنەستى قولداۋ ماقساتىمەن قولعا الىنعان باسقا دا شارالار بار", دەيدى سەنات توراعاسى.
سونىمەن قاتار ماۋلەن اشىمباەۆ مەملەكەت باسشىسىنىڭ ساياسي رەفورمالارى دا زاڭمەن بەكىتىلگەنىنە نازار اۋدارعان.
"سونىڭ اياسىندا ساياسي پارتيالاردى تىركەۋ ءۇشىن قاجەتتى مۇشەلەر سانى ەكى ەسەگە قىسقاردى. پارلامەنتتىك وپپوزيتسيا ينستيتۋتى قالىپتاسۋدا. پارتيالىق سايلاۋ تىزىمدەرىنە ايەلدەر مەن جاستار ءۇشىن 30 پايىزدىق مىندەتتى كۆوتا ەنگىزىلدى. بەيبىت جينالىستار مەن ميتينگتەر وتكىزۋ ءۇشىن ەسكەرتۋ ءتارتىبى بەكىتىلدى جانە جالا جابۋ تۋرالى باپ قىلمىستىق كودەكستەن الىندى. قوعامعا قاۋىپ توندىرەتىن اۋىر قىلمىستار – پەدوفيلدەر, ەسىرتكى ساتۋ, ادام ساۋداسى, ايەلدەر مەن بالالارعا قاتىستى زورلىق جانە براكونەرلىك ءۇشىن جازا كۇشەيتىلدى", دەيدى ماۋلەن اشىمباەۆ.
سونداي-اق, سەنات توراعاسى ۇستازداردىڭ جۇكتەمەسىن ازايتۋعا جانە ولاردى الەۋمەتتىك قورعالۋىنا مۇمكىندىك بەرەتىن "پەداگوگ تۋرالى" جاڭا زاڭ قابىلدانعانىن ايتىپ, بۇل قۇجات مۇعالىمدەر ءۇشىن, سونىڭ ىشىندە اۋىلدىق جەرلەردەگى ماماندارعا ارنالعان جاڭا الەۋمەتتىك كەپىلدىكتەر مەن ىنتالاندىرۋ تەتىكتەرىن قاراستىراتىنىن جەتكىزگەن.
ودان بولەك, جازبادا: "ساراپشىلاردىڭ قاتىسۋىمەن بولعان جان-جاقتى قوعامدىق تالقىلاۋلاردان كەيىن "حالىق دەنساۋلىعى جانە دەنساۋلىق ساقتاۋ تۋرالى كودەكسكە" تۇزەتۋلەر مەن تولىقتىرۋلار ەنگىزىلىپ, قول قويۋ ءۇشىن مەملەكەت باسشىسىنا جولداندى. قۇجاتتا مەديتسينا قىزمەتكەرلەرىنىڭ مارتەبەسىن كوتەرۋ ماقساتىمەن ارنايى جاڭا كەپىلدىكتەر, جەڭىلدىكتەر جانە ىنتالاندىراتىن تولەمدەر قاراستىرىلعان. اتالعان زاڭ حالىققا مەديتسينالىق قىزمەت كورسەتۋ ساپاسىن ارتتىرۋ, مەديتسينا تەحنولوگياسىن دامىتۋ جانە وسى سالاداعى باقىلاۋدى جەتىلدىرۋ ماسەلەلەرىن دە قامتيدى. تەمەكى ونىمدەرىن قولدانۋعا قاتىستى شەكتەۋلەر قابىلداندى.
ۇلى جەڭىستىڭ 75 جىلدىعى قارساڭىندا "ارداگەرلەر تۋرالى" زاڭ قابىلداندى. وندا ارداگەرلەردىڭ ساناتى ناقتى سارالانىپ, جەڭىلدىكتەر مەن الەۋمەتتىك كەپىلدىكتەر ءۇشىن قۇقىقتىق نەگىزدەر بەلگىلەنگەن بولاتىن.
قابىلدانعان اكىمشىلىك پروتسەستىك كودەكس بيلىك ورگاندارى مەن ازاماتتاردىڭ اراسىندا تۋىنداعان داۋلاردى قاراۋ كەزىندە ازاماتتاردىڭ قۇقىعىن قورعاۋ مەحانيزمىن بەكىتەدى. كودەكس مەملەكەتتىك ورگانداردىڭ جاۋاپكەرشىلىگىن ارتتىرىپ, ازاماتتار مەن مەملەكەتتىڭ اراسىنداعى كونسترۋكتيۆتى ديالوگتىڭ نىعايا تۇسۋىنە مۇمكىندىك بەرەدى. بۇل «حالىق ۇنىنە قۇلاق اساتىن مەملەكەت» قاعيداسىمەن ۇندەسەدى.
پارلامەنت وتكەن سەسسيادا وسىنداي جانە وزگە دە زاڭداردى قابىلداۋ ارقىلى مەملەكەت باسشىسىنىڭ سايلاۋ الدىنداعى باعدارلاماسىندا جانە جولداۋىندا ايتىلعان تاپسىرمالاردىڭ ساپالى ءارى ۋاقتىلى ىسكە اسىرىلۋىنا جول اشتى. سونىمەن قاتار ەلىمىزدىڭ داعدارىستان كەيىنگى دامۋ ستراتەگياسىن زاڭنامالىق تۇرعىدان قامتاماسىز ەتۋگە جاعداي جاسادى.
الداعى ايلاردا دەپۋتاتتار وڭىرلەرگە بارىپ, حالىقپەن كەزدەسەدى. كەزدەسۋلەردىڭ فورماتى مەن كەستەسى ەلىمىزدەگى جانە جەكەلەگەن ەلدىمەكەندەردەگى ەپيدەميالىق جاعدايلارعا بايلانىستى بولادى.
پارلامەنت دەپۋتاتتارى الداعى ۋاقىتتا ەلباسى ساياساتىنىڭ ساباقتاستىعىن ساقتاۋعا جانە مەملەكەت باسشىسىنىڭ ەلدى جاڭعىرتۋ باعدارىن ىسكە اسىرۋعا باعىتتالعان زاڭداردى ۋاقتىلى جانە جەدەل قابىلداۋ جولىنداعى بەلسەندى جۇمىسىن جالعاستىرا بەرەدى", – دەلىنگەن.