بەلگىلى جازۋشى, قازاقستان جازۋشىلار وداعىنىڭ مۇشەسى جانات احمادي دۇنيەدەن وزدى. بۇل تۋرالى قازاقستان جازۋشىلار وداعى باسقارما توراعاسىنىڭ ورىنباسارى, اقىن باقىت بەدەلحان ۇلى Facebook پاراقشاسىندا جازدى.
"21 عاسىردىڭ مايقى ءبيى – دەپ مارتەبە تۇتىپ جۇرگەن جانات احمادي اعامىز دا پانيدەن باقيعا جول سالىپتى. قازىنالى قاريا بولادى-اۋ – دەپ جۇرگەندە, بۇ كەتكەنى نە ەتكەنى؟! قازاق قالامگەرلەرى مەن قابىرعالى قالىڭ جۇرتقا قايعىرا كوڭىل ايتامىن. بالاداي جەتەلەپ, داناداي قۇرمەتتەپ, قادىر-قاسيەتىن قايماقتاي قالقىتىپ جۇرگەن جەڭگەمىزگە قۇداي قۋات بەرسىن", – دەپ جازدى باقىت بەدەلحان ۇلى.
جانات احمادي 1943 جىلى 15 قازاندا شىعىس تۇركىستاننىڭ قۇلجا گۋبەرنياسى, قازىرگى ىلە قازاق وبلىسىنا قاراستى قورعاس اۋدانىندا ءۇش اقسۋ–مازى دەگەن جەردە دۇنيەگە كەلگەن. قۇلجا قالاسىنداعى 3 جىلدىق شارۋامالدارىگەرلىك مەكتەبى دەپ اتالاتىن تەحنيكۋمنىڭ زووتەحنيكالىق ءبولىمىن 1961 جىلى تامامدايدى.
1962 جىلى اتامەكەنى – قازاقستانعا كەلەدى. مەملەكەتتىك ورتالىق ۇلتتىق مۇراعاتىندا كىشى عىلىمي قىزمەتكەر, اعا عىلىمي قىزمەتكەر بولىپ قىزمەت ىستەگەن. 1995 جىلدان بەرى تازا شىعارماشىلىقپەن اينالىسىپ ەدى.
2006 جىلى شىعىس تۇركىستان, ءۇرىمشى قالاسى "جاس ورەندەر" باسپاسىنان اراب ارپىمەن "ەسەنگەلدى بي" تاريحي رومانى, 2008 جىلى "كىتاپ" باسپاسىنان "جارىلعاپ بي" تاريحي رومانى, 2009 جىلى "كىتاپ" باسپاسىنان "قارادان تۋعان حان نۇراباي" تاريحي رومانى, "ادەمپرينت" باسپاسىنان "ۋاقىت ىرعاعى" اتتى رەتسەنزيا, ادەبي سىن ماقالالار كىتابى جارىق كورگەن.
حالىقارالىق "الاش" ادەبي سىيلىعىنىڭ لاۋرەاتى.