قازىر اتىراۋ وبلىسىندا پاتەر كەزەگىندە 28 مىڭنان استام تۇرعىن تۇر. بيىل سولاردىڭ 7 مىڭعا جۋىعىنىڭ باسپانا ماسەلەسى شەشىلەدى, دەپ حابارلادى يدم ءباسپاسوز قىزمەتى.
وسى ماقساتتا اعىمداعى جىلدىڭ 5 ايىندا قارجىلاندىرۋدىڭ بارلىق كوزدەرى ەسەبىنەن ءۇي قۇرىلىسىنا 12,9 ملرد تەڭگە ينۆەستيتسيا باعىتتالدى.
"نۇرلى جەر" تۇرعىن ءۇي-كوممۋنالدىق دامىتۋ مەملەكەتتىك باعدارلاماسى شەڭبەرىندە بيىل وڭىردە ساتىپ الۋ قۇقىعىنسىز 157 پاتەر جالعا بەرىلەدى. مۇنداي مۇمكىندىك حالىقتىڭ از قامتىلعان وسال توپتارى مەن كوپ بالالى وتباسىلارىنا ارنالعان. ال كرەديتتىك تۇرعىن ۇيگە بيىل 500-گە جۋىق تۇرعىن قول جەتكىزبەك. بۇل باعىتتاعى باسپانا قۇرىلىسىنا 5 ملرد تەڭگە قاراجات قاراستىرىلعان.
بۇدان باسقا "نۇرلى جەر" مەملەكەتتىك باعدارلاماسى اياسىندا 2%-دىق نەسيە بەرىلەتىن "باقىتتى وتباسى" باعدارلاماسىن ىسكە 2020 جىلى رەسپۋبليكالىق بيۋدجەتتەن 239 تۇرعىن ءۇي قارىزىنا 2,4 ملرد تەڭگە بولىنەدى.
ال تۇرعىن ءۇي قۇرىلىسى اۋداندارىنا ينجەنەرلىك-كوممۋنيكاتسيالىق ينفراقۇرىلىم جۇرگىزۋ ءۇشىن 39 جوبانى ىسكە اسىرۋ كوزدەلىپ وتىر. بۇل ماقساتقا 10,3 ملرد تەڭگە قاراجات ءبولىندى.
سونىمەن قاتار بيىل اتىراۋ وبلىسىندا باسپانا قۇرىلىسى جۇمىستارىنا 2 مىڭعا جۋىق ادامدى تارتۋ جوسپارلانعان. جالپى جىل باسىنان وڭىردە 1 467 تۇرعىن ءۇي پايدالانۋعا بەرىلدى, ونىڭ – 975 جەكە ءۇي.