ەلوردادا «قازمەديا ورتالىعى» عيماراتىندا اقپارات جانە قوعامدىق دامۋ ءمينيسترى ايدا بالاەۆانىڭ قاتىسۋىمەن بۇقارالىق اقپارات قۇرالدارىنىڭ قىزمەتكەرلەرى كۇنىنە ارنالعان سالتاناتتى جيىن ءوتتى.
سالالىق مەملەكەتتىك ورگاننىڭ قىزمەتكەرلەرى مەن وتاندىق باق وكىلدەرى قاتىسقان شارا ەلدەگى ەپيدەميالىق جاعداي تالاپتارىنا بايلانىستى ونلاين-فورماتتا ءوتتى. اقپارات جانە قوعامدىق دامۋ ءمينيسترى بارلىق جۋرناليستەر مەن باق قىزمەتكەرلەرىن كاسىبي مەرەكەسىمەن قۇتتىقتادى. «جۋرناليستەر – قوعامنىڭ جاناشىرى. قوعام تىرشىلىگىندەگى كەز كەلگەن قيىندىققا ءبىرىنشى بولىپ ءۇن قاتىپ, تىعىرىقتان شىعار جول ىزدەيتىن دە جۋرناليستەر قاۋىمى. راسىندا دا, جۋرناليستيكا – شىعارماشىلىق ءورىستى عانا ەمەس, كاسىبي ورشىلدىك پەن اسا تەرەڭ مادەنيەتتىلىكتى, جان-جاقتى بىلىمدىلىك پەن ىشكى تاربيەلىكتى قاتار تالاپ ەتەتىن كىرپياز ماماندىق. ويتكەنى عۇلاما عالىممەن دە, ءبىرتۋار دارىنمەن دە, قاراپايىم قاۋىممەن دە تەڭ سويلەسىپ, تامىرىن تابۋ – ەكىنىڭ بىرىنە بۇيىرا بەرمەيتىن دارا قاسيەت, اسقاق ابىروي», دەدى ايدا بالاەۆا.
مينيستر شىنايى اقپارات جەتكىزۋگە اتسالىسقان بارلىق سالا قىزمەتكەرلەرىنە اۋىر دا ابىرويلى ەڭبەگى ءۇشىن رياسىز العىسىن جەتكىزدى.
سالتاناتتى شارادا جوعارى كاسىبي شەبەرلىگى ءۇشىن ەلىمىزدىڭ بارلىق ايماقتارىنان ونداعان مەديا قىزمەتكەر اقپارات جانە قوعامدىق دامۋ مينيسترلىگىنىڭ قۇرمەت گراموتاسىمەن جانە وتاندىق جۋرناليستيكانى دامىتۋعا ايرىقشا ۇلەس قوسقان مەديا مايتالماندار «اقپارات سالاسىنىڭ ۇزدىگى» توسبەلگىسىمەن ماراپاتتالدى. سانيتارلىق-ەپيدەميالىق جاعدايعا بايلانىستى ماراپات تەك «Qazaqstan» جانە «حابار 24» تەلەارنالارىنىڭ جۋرناليستەرى ماقپال ۋكەنوۆا مەن قانات بازىلحانوۆ, «Aiqyn» جانە «كازاحستانسكايا پراۆدا» گازەتتەرىنىڭ جۋرناليستەرى ايتجان مۇرجانوۆ پەن اسقار بەيسەنباەۆقا تابىستالدى. «Egemen Qazaqstan» گازەتىندەگى ارىپتەستەرىمىزدەن الەكساندر تاسبولات, بەكەن قايرات, جاقىندا عانا جامبىل وبلىستىق «اق جول» گازەتىنىڭ باس رەداكتورى بولىپ تاعايىندالعان ورالحان ءداۋىت, سونداي-اق گۇلناز ايمۇحامبەتوۆا, گۇلماريا قۇداباەۆا سالا ۇزدىكتەرىنىڭ قاتارىنان تابىلدى.
سونىمەن قاتار بيىل العاش رەت بەلگىلى جۋرناليست جانە قوعام قايراتكەرى, قازاقستان پرەزيدەنتى سىيلىعىنىڭ لاۋرەاتى بەيسەن قۇرانبەك اتىنداعى «جىگەر» سىيلىعى تاعايىندالدى. ءتورت اتالىم بويىنشا كونكۋرسقا قاتىسۋ ءۇشىن وتىنىمدەر 26 مامىر مەن 15 ماۋسىم ارالىعىندا قابىلداندى. سىيلىقتىڭ العاشقى يەگەرلەرى شارا بارىسىندا بەلگىلى بولدى. «الەۋمەتتىك تاقىرىپتاعى ۇزدىك تۆ سيۋجەت» اتالىمى بويىنشا «حابار 24» تەلەارناسىنىڭ قىزمەتكەرى مەرەي شوحمانوۆا, «الەۋمەتتىك تاقىرىپتاعى الەۋمەتتىك جەلىدەگى ەڭ ۇزدىك جاريالانىم» اتالىمى بويىنشا اقجەلەڭ راحاتدينقىزى, «الەۋمەتتىك تاقىرىپتاعى ۇزدىك فوتوسۋرەت» اتالىمىندا ولگا بۋگاەۆا جانە «الەۋمەتتىك تاقىرىپتاعى ۇزدىك ماقالا» اتالىمىندا «ەگەمەننىڭ» شىعىس قازاقستان وبلىسىنداعى مەنشىكتى ءتىلشىسى ازامات قاسىم جەڭىسكە جەتتى.
سالتاناتتى شارا كەزىندە ارىپتەستەرىن بەينەبايلانىس ارقىلى شەتەلدىك بولىمشەلەردە جۇمىس ىستەيتىن وتاندىق باق جۋرناليستەرى قۇتتىقتادى. قاتىسۋشىلار 2020 جىل قازاقستاندىق جۋرناليستەر ءۇشىن تەك كوروناۆيرۋس پاندەمياسىمەن كۇرەسپەن عانا ەمەس, سونىمەن قاتار جۇزدەگەن ناعىز كاسىبي شەبەرلەردىڭ ادال ەڭبەگى مەن ماڭداي تەرىنىڭ ارقاسىندا جەتكەن جەتىستىكتەرمەن ەستە قالاتىنىن اتاپ ءوتتى. سونداي-اق بيىل رەسپۋبليكالىق «كازاحستانسكايا پراۆدا» گازەتى مەن «قازينفورم» حالىقارالىق اقپارات اگەنتتىگى 100 جىلدىق مەرەيتويىن اتاپ وتۋدە, ال «حابار اگەنتتىگى» اق-تىڭ مەديا نارىققا شىققانىنا 25 جىل تولىپ وتىر.
اقپارات جانە قوعامدىق دامۋ ءمينيسترى ايدا بالاەۆا جۋرناليست ماماندىعىن بويىندا ايرىقشا ازاماتتىق ۇستانىمى, كەڭ دۇنيەتانىمى مەن جوعارى ادامگەرشىلىك قۇندىلىقتارى بار ادامدار عانا الىپ جۇرەتىنىن اتاپ ءوتىپ, بارلىق باق قاۋىمداستىعى وكىلدەرىنە زور دەنساۋلىق, وتباسىلارىنا اماندىق, باقىت پەن بەرەكە تىلەدى. مەرەكەلىك شارا سوڭىندا جۋرناليستەر مەرەكەسىنە ارنايى جازىلعان ءاننىڭ تۇساۋى كەسىلدى.
ايتا كەتەيىك, مەرەكە قاراساڭىندا باس باسىلىم – «Egemen Qazaqstan» گازەتىنىڭ كوپتەگەن قىزمەتكەرى پارلامەنتتىڭ, ورتالىق مەملەكەتتىك ورگانداردىڭ, وبلىستار مەن قالالار اكىمدىكتەرىنىڭ, ءتۇرلى سالاداعى قۇرىلىمدار مەن ۇكىمەتتىك ەمەس ۇيىمداردىڭ ارنايى ماراپاتتارىنا يە بولدى, سونداي-اق بىرقاتار كونكۋرستىڭ جەڭىمپازى, جۇلدەگەرى اتاندى. ماسەلەن, پرەزيدەنتتىڭ جارلىعىمەن تاعايىندالعان «حالىق العىسى» مەدالىن گازەتتىڭ ماڭعىستاۋ وبلىسىنداعى مەنشىكتى ءتىلشىسى گۇلايىم شىمتەمىرقىزى كەۋدەسىنە تاقتى. باسىلىمنىڭ اقتوبە وبلىسىنداعى مەنشىكتى ءتىلشىسى, ارداگەر جۋرناليست تەمىر قۇسايىن پارلامەنت ءماجىلىسىنىڭ ءداستۇرلى كونكۋرسى – «پارلامەنت ءسوزى» سىيلىعىنىڭ لاۋرەاتى اتانسا, پارلامەنت سەناتى ۇيىمداستىرعان «تۋعان ەل» بايقاۋىنىڭ باس جۇلدەسىن گازەتتىڭ شىعىس قازاقستان وبلىسىنداعى مەنشىكتى ءتىلشىسى ازامات قاسىم يەلەندى. بۇعان قوسا Nur Otan پارتياسىنىڭ جىل سايىنعى «نۇر سۇڭقار» رەسپۋبليكالىق كونكۋرسىنىڭ «ۇشقىر قالام» اتالىمىن گازەتتىڭ شولۋشىسى ايگۇل حالىقوۆا جەڭىپ الدى. سونداي-اق گازەتتىڭ پاۆلودار وبلىسىنداعى مەنشىكتى ءتىلشىسى فاريدا بىقايدى وبلىس اكىمى «پاۆلودار وبلىسى الدىندا سىڭىرگەن ەڭبەگى ءۇشىن» مەدالىمەن ماراپاتتادى.