ا. مامين "جاسىل ەكونوميكاعا" كوشۋ جونىندەگى كەڭەس وتىرىسىن وتكىزدى

قازاقستاننىڭ "جاسىل ەكونوميكاعا" كوشۋى جونىندەگى 2013-2020 جىلدارعا ارنالعان تۇجىرىمدامانىڭ ءىس-شارالار جوسپارىن ىسكە اسىرۋ اياسىندا تۇراقتى جانە ونىمدىلىگى جوعارى اۋىل شارۋاشىلىعىن دامىتۋ تۋرالى قر ەكولوگيا, گەولوگيا جانە تابيعي رەسۋرستار ءمينيسترى م. مىرزاعاليەۆ, اۋىل شارۋاشىلىعى ءمينيسترى س. وماروۆ, وڭىرلەردە ەكولوگيالىق جاعدايدى جاقسارتۋ جانە "جاسىل ەكونوميكانى" دامىتۋ جونىندەگى شارالار تۋرالى اقتوبە وبلىسىنىڭ اكىمى و. ورازالين, ماڭعىستاۋ وبلىسىنىڭ اكىمى س. ترۇموۆ, نۇر-سۇلتان ق. اكىمى ا. كولگىنوۆ جانە الماتى ق. اكىمىنىڭ ءبىرىنشى ورىنباسارى ە. قوجاعاپانوۆ باياندادى. سونىمەن قاتار بۇۇ دامۋ باعدارلاماسىنىڭ قر-داعى تۇراقتى وكىلى يا. بەريش تۇسىنىكتەمە بەرىپ ءوتتى.

"جاسىل ەكونوميكاعا" كوشۋ اياسىندا زاماناۋي سۋارۋ جۇيەلەرىن ەنگىزۋدى ىنتالاندىرۋ ماقساتىندا اوك سۋبەكتىلەرىنە ينفراقۇرىلىمدى جەتكىزۋ جانە سۋارۋ جۇيەلەرىن ساتىپ الۋ شىعىندارىنىڭ 50%-ىن وتەۋ, نەسيەلەر مەن ليزينگ بويىنشا سىياقى مولشەرلەمەسىنىڭ 10%-ىن سۋبسيديالاۋ بويىنشا شارالار قابىلداندى. 2022 جىلعا قاراي سۋارمالى جەرلەردىڭ كولەمىن 2 ملن گا دەيىن جەتكىزۋ جوسپارلانعان. بۇعان قوسا كۇرىش پەن ماقتا سياقتى سۋدى كوپ تالاپ ەتەتىن داقىلداردىڭ القاپتارىن ازايتۋ جۇمىسى جالعاسادى.

فەرمەرلەردىڭ وزىق جىلىجاي تەحنولوگيالارىن ەنگىزۋىن ىنتالاندىرۋ ماقساتىندا جابدىقتاردىڭ ءتيىستى جۇيەلەرىن جانە كەشەندى شەشىمدەردى ساتىپ الۋدى كوزدەيتىن ارنايى ينۆەستيتسيالىق پاسپورت ازىرلەندى. جىلىجاي كەشەندەرىن سالۋ جانە ولاردى كەڭەيتۋ شىعىندارىنىڭ 30%-ىن وتەۋمەن ينۆەستيتسيالىق سۋبسيديالار ەنگىزىلدى. جىلىجاي ءوندىرىسى نارىعىنىڭ كولەمى 2,4 ەسە — 90 مىڭ توننادان 216,9 مىڭ تونناعا دەيىن, ال جىلىجاي شارۋاشىلىقتارىنىڭ اۋدانى 2,1 ەسە — 575,9 گا-دان 1236,7 گا دەيىن ۇلعايدى.

قازىرگى تاڭدا 180,1 ملن گا جايىلىم جەرلەرىنىڭ 106,2 ملن گا (59%) جەرى سۋلاندىرىلدى. جايىلىم جەرلەرىن دامىتۋدى ىنتالاندىرۋ ءۇشىن سۋلاندىرۋ ينفراقۇرىلىمىن قۇرۋ شىعىندارىنىڭ 80%-نا دەيىن ينۆەستيتسيالىق سۋبسيديالاۋ ەنگىزىلدى. 2014-2019 جىلدار كەزەڭىندە جايىلىمداردى سۋلاندىرۋ ءۇشىن 5978 قۇدىق سالىندى, ال جوسپارلانعان كورسەتكىش — 3633.

"ۇلتتىق اگرارلىق عىلىمي-ءبىلىم بەرۋ ورتالىعى" كەاق ءبىلىم بەرۋ ورتالىقتارىندا جانە الدىڭعى قاتارلى اۋىل شارۋاشىلىعى كاسىپورىندارىنىڭ بازاسىندا اوك دامىتۋدىڭ بارلىق باعىتتارى, ونىڭ ىشىندە "جاسىل" اۋىل شارۋاشىلىعى قاعيداتتارىن ەنگىزۋ بويىنشا 25 مىڭنان استام تىڭداۋشىنىڭ قاتىسۋىمەن 1400-گە جۋىق سەمينار وتكىزىلدى. 

وتىرىسقا قاتىسۋشىلار قالدىقتاردى باسقارۋ جۇيەسىن جاقسارتۋ, جاڭارتىلاتىن ەنەرگيا كوزدەرىن دامىتۋ, ەلدى مەكەندەردى گازداندىرۋ جانە "تازا" كولىكتى دامىتۋ ارقىلى اۋانىڭ لاستانۋىن تومەندەتۋ ماسەلەلەرىن قارادى.

كەڭەس نۇر-سۇلتان جانە الماتى قالالارىنىڭ ەكولوگيالىق پروبلەمالارىن كەشەندى تۇردە شەشۋ جونىندەگى جول كارتاسىنىڭ جوباسىن بەكىتتى. قۇجات الماتى قالاسىنىڭ 2-جەو مەن 3-جەو جاڭعىرتۋدى, نۇر-سۇلتان قالاسىنىڭ 1-جەو مەن 2-جەو-عا جەتكىزۋشى گاز قۇبىرلارىن سالۋدى, سۋ جىلىتاتىن جانە ەنەرگەتيكالىق قازاندىقتاردى گازعا اۋىستىرۋدى, اعاشتاردى كەسۋگە قاتىستى رۇقسات بەرۋ راسىمدەرىن كۇشەيتۋدى, جاسىل جەلەكتەر الاڭىن ۇلعايتۋدى, قوعامدىق كولىكتى, كوممۋنالدىق قىزمەت كولىكتەرىن گازعا جانە ەلەكتر ەنەرگياسىنا اۋىستىرۋدى, سونداي-اق باسقا دا شارالاردى قاراستىرادى.