اتىراۋدا كارانتيندىك شەكتەۋ شارالارى قايتادان كۇشەيتىلدى. نەگە؟ مۇنىڭ بىرنەشە سەبەبى بار. بىرىنشىدەن, ماۋسىم ايىنا دەيىن قاۋىپتى ىندەتتى جۇقتىرعاندار «تەڭىز» كەنىشىندەگى مەردىگەر كومپانيالاردىڭ جۇمىسشىلارىنان عانا انىقتالىپ ەدى. ەكىنشىدەن, اتىراۋ قالاسى مەن اۋدانداردا بۇل ىندەتكە شالدىققاندار كوپ كەزدەسپەگەن بولاتىن. الايدا ماۋسىمنان بەرى احۋال باسقاشا قالىپتاسىپ وتىر.
ماسەلەن, «ەمبىمۇنايگاز» اق قوعاممەن بايلانىس قىزمەتىنىڭ حابارلاۋىنشا, ماۋسىمنىڭ باسىنان بەرى جىلىوي اۋدانىنداعى تەرەڭ-وزەك, قيسىمباي, قىزىلقوعا اۋدانىنداعى كەنباي كەن ورىندارىندا «ەمبىمۇنايگازدىڭ» 62 جانە مەردىگەر كومپانيالاردىڭ 55 قىزمەتكەرىنەن كوروناۆيرۋس انىقتالىپ وتىر. بۇعان قوسا, مىندەتتى سكرينينگ كەزىندە «ەمبىمۇنايگازدىڭ» 19 جۇمىسشىسىنان دا ۆيرۋس جۇقتىرۋ جاعدايى تىركەلدى. بارلىق جۇمىسشىلار قاجەتتى ەم الۋ ءۇشىن قۇلسارى جانە اتىراۋ قالالارىنداعى جۇقپالى اۋرۋلار اۋرۋحانالارىنا جاتقىزىلدى. سيمپتومسىز اۋىرىپ جاتقان جۇمىسشىلار وتباسىنىڭ وزگە مۇشەلەرىنەن وقشاۋلانىپ, ءۇي كارانتينىنە ورنالاستىرىلىپتى. ال ۇيدە وقشاۋلاۋ تالاپتارىن ساقتاۋعا مۇمكىندىگى جوق ادامدار اتىراۋ قالاسىنىڭ بەرەكە شاعىن اۋدانىنداعى ارنايى جابدىقتالعان ۇيلەردە كارانتيندە جاتىر. پتر-تەستەرى تەرىس ناتيجە كورسەتكەن جۇمىسشىلار جۇمىس ورىندارىندا باقىلاۋعا الىندى.
وسىنداي دەرەكتەردىڭ تىركەلۋىمەن قىزىلقوعا اۋدانىنداعى ميالى اۋىلىندا كارانتين, مۇقىر اۋىلىنا شەكتەۋ ەنگىزىلدى. ال جىلىوي اۋدانىندا كارانتين مەرزىمى 2 شىلدەگە دەيىن سوزىلدى. قۇرمانعازى اۋدانىنىڭ اقكول اۋىلى دا كارانتينگە جابىلدى. ءتىپتى اتىراۋ قالاسىندا ىندەتتى جۇقتىرۋشىلار قاتارى كوبەيىپ بارادى. قازىر كوروناۆيرۋس ينفەكتسياسى اتىراۋ قالاسى مەن بارلىق اۋداندا تىركەلىپ, جالپى سانى 1362-گە جەتتى.
قاۋىپتى ىندەت ادامنىڭ جاسىنا دا, اتقاراتىن جۇمىسىنا دا قارامايتىنى اڭعارىلىپ وتىر. وسىعان دالەل رەتىندە بىرنەشە مىسالدى العا تارتۋعا بولادى. بىرىنشىدەن, اتىراۋلىقتاردى ساقتىق شارالارىن قاتاڭ ساقتاۋعا ۇندەگەن بۇرىنعى باس مەملەكەتتىك سانيتارلىق دارىگەر تەمىربەك مۇساعاليەۆتىڭ ءوزى دە كوروناۆيرۋستىڭ «قاقپانىنا» تۇسكەنىن الەۋمەتتىك جەلى ارقىلى حابارلادى. ول قازىر ۇلتتىق ساراپتاما ورتالىعىنىڭ اتىراۋ وبلىستىق فيليالىن باسقارادى.
– مەن تاپسىرعان پتر-تەست قورىتىندىسى وڭ ناتيجە كورسەتتى. مەن سانيتارلىق قورعانىس تالاپتارىن قاتاڭ ساقتاپ, ماسكا تاقتىم, قولعاپ كيدىم. قولىما دەزينفەكتسيا جۇرگىزدىم. سىزدەر سەكىلدى كوروناۆيرۋستىڭ مەنى اينالىپ وتەتىنىنە سەنىمدى ەدىم. بىراق ولاي بولماي شىقتى. ۆيرۋس قالاعا كىردى, – دەپ جازدى تەمىربەك مۇساعاليەۆ.
قازىر بۇل فيليالدا ديرەكتوردان وزگە تاعى 13 ادامنىڭ ىندەتكە شالدىققانى انىقتالدى. ولاردىڭ ءبارى اكىمشىلىك پەرسونالدا جۇمىس ىستەگەندىكتەن, وسىنداعى زەرتحاناعا قاتىسى جوق بولىپ شىقتى. ال ورتالىق عيماراتتا دەزينفەكتسيا جۇرگىزىلىپ, زەرتحانا قالىپتى رەجىمدە جۇمىسىن جالعاستىرۋدا.
وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى گۇلنافيس تاڭباەۆانىڭ ءمالىم ەتۋىنشە, 180 كەرەۋەتكە ەسەپتەلگەن ينفەكتسيالىق ستاتسيوناردا 193 پاتسيەنت ەم الىپ جاتىر. جانساقتاۋ بولىمىندە جاتقان جەتى پاتسيەنتتىڭ ۇشەۋىنىڭ جاعدايى اۋىر دەپ باعالانىپ وتىر.
– قازىر №2 وبلىستىق ينفەكتسيالىق اۋرۋحاناداعى ينفەكتسيالىق ستاتسيونار ناۋقاستارعا تولىپ بولدى. سول سەبەپتەن, كەلەسى اپتادا ماحامبەت اۋدانىنان ينفەكتسيالىق ستاتسيونار اشۋدى جوسپارلاپ وتىرمىز, – دەيدى گۇلنافيس تاڭباەۆا.
سوڭعى ءبىر اپتادا قاۋىپتى ىندەتكە شالدىققان بەس ادام كوز جۇمدى. جالپى, قايتىس بولعاندار – 8 ادام. مىنە, وسىنداي سەبەپتەر اتىراۋ قالاسى مەن اتىراۋ وبلىسى اۋماعىندا كارانتيندىك شەكتەۋ شارالارىنىڭ قولدانىلۋى ەپيدەميالىق جاعداي تولىق تۇراقتانعانعا دەيىن سوزۋعا سەبەپ بولىپ وتىر.
اتىراۋ وبلىسىنىڭ باس مەملەكەتتىك سانيتارلىق دارىگەرى امانتاي جۇماعاليەۆ قول قويعان قاۋلىعا سايكەس, ەندى تۇرعىندار مەن جەكە كولىكتەردىڭ تۇنگى ساعات 23:00-دەن تاڭعى 06:00-گە جۇرۋىنە بولمايدى. سونداي-اق ويىن-ساۋىق, سپورتتىق جانە باسقا دا بۇقارالىق ءىس-شارالاردى, وتباسىلىق, ەسكە الۋ شارالارىن (بانكەتتەر, ۇيلەنۋ تويلارى, مەرەيتويلار, اس بەرۋلەر), سونىڭ ىشىندە ۇيدە جانە ادامدار كوپ جينالاتىن وزگە دە ءىس-شارالاردى وتكىزۋگە, قوعامدىق ورىندارعا, ونىڭ ىشىندە الاڭدارعا, ساياباقتارعا, جاعالاۋلارعا بارۋعا, مەنشىك نىسانىنا قاراماستان بارلىق مەكتەپكە دەيىنگى بالالار ۇيىمدارىنىڭ قىزمەتىنە تىيىم سالىنىپ وتىر. قالا سىرتىنداعى ساۋىقتىرۋ ورتالىقتارىنىڭ جانە مەكتەپ جانىنداعى لاگەرلەردىڭ, كينوتەاترلاردىڭ, تەاترلاردىڭ, كورمەلەردىڭ, ينتەرنەت پەن كومپيۋتەرلىك ويىن كلۋبتارىنىڭ جانە ادامدار كوپ شوعىرلاناتىن باسقا دا نىسانداردىڭ قىزمەتى توقتاتىلدى. سونىمەن بىرگە ءدىني نىساندار قىزمەتىنە جانە حالىقتىڭ وندا بارۋىنا تىيىم سالىندى.
ازىرگە ەپيدەميالىق احۋالدىڭ قاشان تۇراقتالاتىنى, سوعان وراي كارانتيندىك شەكتەۋ شارالارىنىڭ قاشانعا دەيىن سوزىلاتىنى بەلگىسىز. ويتكەنى تۇرعىندار اراسىندا قاۋىپتى ىندەتكە شالدىعۋ توقتار ەمەس. ال تۇرعىنداردىڭ وزدەرىنەن ءالى دە ساقتىق شارالارىنا نەمقۇرايدى قاراۋ مەن بەيقامدىق بايقالادى. تەگىندە جاقىنىڭا جاناشىر بولۋ قاجەتتىگىن اركىمنىڭ ۇعىنعانى ءجون عوي.
اتىراۋ وبلىسى