مەملەكەت باسشىسىنىڭ جارلىعىمەن اتىراۋ قالالىق پوليتسيا باسقارماسىنىڭ ۋچاسكەلىك پوليتسيا ينسپەكتورلارى, پوليتسيا كاپيتانى قۋاندىق سۇيىندىكوۆ پەن پوليتسيا اعا لەيتەنانتى تيمۋر بالماعانبەتوۆ «ەرلىگى ءۇشىن» مەدالىمەن ماراپاتتالدى.
...وقىس وقيعا بيىلعى 4 قاڭتاردا بولدى. سول كۇنى ەكى پوليتسيا قىزمەتكەرى بىرگە كەزەكشىلىكتە بولاتىن. كەشكى ساعات 19:40-تا كەزەكشى بولىمىنەن جايىق وزەنىنە ءتورت بالانىڭ سۋعا باتقانى جونىندە شۇعىل حابار ءتۇستى. ولار دەرەۋ قىزمەتتىك كولىگىمەن جايىق وزەنىنىڭ جاعاسىنا جەتتى. كەشكى مەزگىل بولعاندىقتان, اينالانى قاراڭعىلىق تۇمشالاعان. ونىڭ ۇستىنە اسپان مەن جەردىڭ اراسىن قالىڭ تۇمان بۇركەپ تۇردى. وزەن ۇستىنەن ەشتەڭە كورىنبەيدى. تەك بالالاردىڭ «قۇتقارىڭدار» دەگەن جان داۋسى عانا ءۇزىلىپ ەستىلەدى.
– داۋىس شىققان جاققا باعىت الدىق. تەز جەتكىمىز-اق كەلەدى. بىراق مۇزدىڭ ۇستىمەن جۇگىرۋگە بولمايدى. ويتكەنى جۇقا مۇز ويىلىپ كەتۋى مۇمكىن. سول سەبەپتەن, مۇز ۇستىمەن ەڭبەكتەپ جۇرۋگە تۋرا كەلدى, دەپ ەسكە الادى سول كۇنگى وقيعانى قۋاندىق سۇيىندىكوۆ. – بالالار مۇز ۇستىندە ويناپ ءجۇرىپ, جاعادان 15 مەترگە دەيىن الىستاعان. جۇقا مۇز ويىلىپ, تورتەۋى دە سۋعا ءتۇسىپ كەتكەن. بىرەۋى 102 نومىرىنە تەلەفون شالىپ, حابار بەرىپتى. بالالاردىڭ بىرەۋى ءوز بەتىمەن مۇز ۇستىنە شىعىپ ۇلگەرگەن. ال بىرەۋى سۋعا باتىپ, ونى قۇتقارۋعا ۇلگەرە المادىق.
پوليتسيا قىزمەتكەرلەرى بالالاردىڭ داۋىسى شىققان تۇسقا كەلگەندە, مۇزدان ەكى بالانىڭ باسى كورىنىپ تۇردى. بىراق بالالارعا ەكەۋى بىردەي جاقىنداي المادى. سەبەبى ولاردىڭ سالماعىمەن مۇز ودان سايىن ويىلىپ كەتۋى مۇمكىن ەدى. سوندىقتان تيمۋر قۋاندىقتىڭ اياعىنان ۇستاپ, ال ول بالالارعا قولىن سوزدى. اۋەلى بىرەۋىن, كەيىن ەكىنشىسىن سۋدان شىعارىپ الدى.
– قاۋىپ-قاتەرگە باس تىكتىك. بىراق سول ساتتە بالالاردى قۇتقارۋدان باسقا ەشتەڭە ويلاپ ۇلگەرمەدىم. كەيىن تيمۋردان دا سۇرادىم. ول دا تەك بالالاردى قۇتقارۋدى ويلاپتى. ويتكەنى ءبىز پوليتسيا قىزمەتكەرلەرىمىز عوي. كەز كەلگەن ۋاقىتتا كومەك بەرۋگە دايىن بولۋىمىز كەرەك. بۇل – ءبىزدىڭ مىندەتىمىز, – دەيدى پوليتسيا كاپيتانى قۋاندىق سۇيىندىكوۆ.
قوعامدىق ءتارتىپ كۇزەتشىسى بولۋ – ەكەۋىنىڭ دە بالا كۇننەن بەرگى ارمانى. سوندىقتان قۋاندىق سۇيىندىكوۆ 2014 جىلى وسى سالاعا جۇمىسقا ورنالاسىپ, سودان بەرى پوليتسيا قاتارىندا قىزمەت اتقارىپ ءجۇر. ال, ارىپتەسى تيمۋر بالماعانبەتوۆ بۇل سالاعا 2018 جىلى كەلدى.
– ءبىزدى بەيبىت كۇندە ەرلىك جاساعان باتىر دەپ جاتادى. شىن مانىندە ءبىز ەرلىككە جاتقىزاتىنداي ەرەكشە ارەكەت جاساعان جوقپىز عوي. ءبىزدىڭ ورنىمىزدا وزگە ادامدار بولسا, سولار دا ءبىز سەكىلدى ارەكەت ەتەر ەدى, – دەيدى قۋاندىق پەن تيمۋر.
اتىراۋ وبلىسى