پرەمەر-مينيستر اسقار ءماميننىڭ توراعالىعىمەن وتكەن ۇكىمەت وتىرىسىندا بيولوگيالىق قاۋىپسىزدىك سالاسىنداعى عىلىمي-زەرتتەۋ قىزمەتى تۋرالى ءبىلىم جانە عىلىم ءمينيسترى اسحات ايماعامبەتوۆ باياندادى, - دەپ حابارلايدى Egemen.kz.
ا. ايماعامبەتوۆتىڭ ايتۋىنشا, قازاقستاندا بيولوگيالىق قاۋىپسىزدىك جانە بيوتەحنولوگيا سالاسىندا جۇيەلى تۇردە عىلىمي زەرتتەۋلەر جۇرگىزىلەدى. سالادا 12 عىلىمي ۇيىم, 2,5 مىڭعا جۋىق ادام جۇمىس ىستەيدى. بۇگىنگى تاڭدا ەلىمىزدىڭ 19 جوعارى وقۋ ورنىندا سالانىڭ 4 مىڭعا جۋىق بولاشاق مامانى ءبىلىم الۋدا.
ۇلتتىق بيوتەحنولوگيا ورتالىعى — بيولوگيالىق بەيىندەگى ءىرى عىلىمي ۇيىمداردىڭ ءبىرى. ورتالىق 25 سەرتيفيكاتتالعان عىلىمي زەرتحانادان تۇرادى.
"پاندەميانىڭ باستاپقى كەزەڭىندە, ەلىمىزگە تەست-جۇيەلەرى ءالى اكەلىنبەگەن كەزدە, وسى مەكەمەنىڭ ماماندارى 6 كۇن ىشىندە جاساندى سينتەزدى پايدالانا وتىرىپ, SARS COVID-2 ءتىرى شتاممى بولماعان كەزدە, كوروناۆيرۋستى دياگنوستيكالاۋ ءۇشىن سەنىمدى پتر تەست-جۇيەسىن ازىرلەدى. وسى جۇيەنىڭ ارقاسىندا ىندەتتىڭ العاشقى كۇندەرىندە جالپى دياگنوستيكا جۇزەگە اسىرىلدى. كەيىنىرەك الىنعان شەتەلدىك دياگنوستيكالارمەن سالىستىرا وتىرىپ, وسى جۇيەنىڭ جوعارى سەزىمتالدىعى دالەلدەندى", — دەدى مينيستر.
بۇگىندە ۇلتتىق بيوتەحنولوگيا ورتالىعى دەنساۋلىق ساقتاۋ مينيسترلىگىنىڭ تاپسىرىسى بويىنشا 11 مىڭ تەست-جۇيەسىن ازىرلەدى.
وسى سالاداعى تاعى ءبىر ماڭىزدى ۇيىم — بيولوگيالىق قاۋىپسىزدىك پروبلەمالارىنىڭ عىلىمي-زەرتتەۋ ينستيتۋتى. ينستيتۋتتىڭ 13 زەرتحاناسىندا قاۋىپتى ينفەكتسيالارمەن جۇمىس جۇرگىزىلۋدە. ينستيتۋت ددسۇ-مەن دەنساۋلىق ساقتاۋ سالاسىنىڭ قاجەتتىلىگى ءۇشىن اسا قاۋىپتى ينفەكتسيالارعا قارسى ۆاكتسينالاردى ازىرلەۋگە كەلىسىمشارت جاساستى. ينستيتۋت جۇمىسى مەديتسينادا جانە اۋىل شارۋاشىلىعىندا ۆاكتسينالاردىڭ جاڭا تۇرلەرىن ازىرلەۋگە, يممۋنوبيولوگيالىق پرەپاراتتاردى وندىرۋگە باعىتتالعان. بارلىعى ۇيىم قاۋىپتى جانە اسا قاۋىپتى ينفەكتسيالارعا قارسى وتاندىق ۆاكتسينالاردىڭ 67 ءتۇرىن ازىرلەدى.
سونىمەن قاتار ينستيتۋت عالىمدارى ءۇش پلاتفورمادا كۆي-عا قارسى بەس ۆاكتسينا ازىرلەنۋدە.
"العاشقى يناكتيۆاتسيالانعان ۆاكتسينا – ۆيرۋس حيميالىق زاتتاردىڭ اسەرىنەن بەيتاراپتاندىرىلعان. ددسۇ بەلسەندىلىگى جويىلعان كانديداتتىق ۆاكتسينانى ازىرلەۋ حاتتاماسىن تەكسەرىپ, 2020 جىلعى 15 مامىردا ءوز تىزىمىنە قوستى", — دەدى مينيستر.
2020 جىلعى 15 مامىردا كانديداتتىق يناكتيۆاتسيالانعان ۆاكتسيناعا كلينيكاعا دەيىنگى سىناقتار باستالدى: جەلىلىك تىشقاندارداعى قاۋىپسىزدىك پەن يممۋنوگەندىگى تەكسەرىلدى.
2020 جىلعى 10-23 ماۋسىمدا كانديداتتىق ۆاكتسينانىڭ ۋىتتىلىعى مەن اللەرگيالىق قاسيەتتەرى زەرتتەلدى, سونداي-اق وسى جىلدىڭ ماۋسىم-شىلدە ايلارىندا زەرتتەۋلەر ءارتۇرلى جانۋارلاردا, سونىڭ ىشىندە پريماتتا جاسالادى, يممۋنوگەندىگى زەرتتەلەدى.
قىركۇيەك ايىندا كلينيكالىق سىناقتارعا شىعۋ جوسپارلانعان.
ءمينيستردىڭ ايتۋىنشا, اتالعان سىناق كەزەڭدەرى ءساتتى بولعان جاعدايدا ۆاكتسينانىڭ تيىمدىلىگى مەن زيانسىزدىعىن تەكسەرۋدىڭ كەلەسى كەزەڭدەرىنە ءوتۋ مۇمكىندىگى پايدا بولادى.