كەنشىلەر استاناسىنداعى وبلىستىق كلينيكالىق اۋرۋحانانىڭ بولىمشە مەڭگەرۋشىسى بايانبەك اسپاندياروۆتىڭ ءۇي بەتىن كورمەگەنىنە ءتورت اي بولىپتى. ارقا توسىنە «جامان تۇماۋ» قالاي اياق باستى, سول كەزدەن باستاپ بۇگىنگە دەيىن ينفەكتسيالىق گوسپيتالدا كوروناۆيرۋسپەن كۇرەستىڭ قالىڭ ورتاسىندا ءجۇر.
«مەنىڭ زايىبىم دا دارىگەر, پەدياتريا سالاسىنىڭ مامانى. قازىر ۇيدە بالا باعىپ, دەكرەتتىك دەمالىستا وتىر. ءبىزدىڭ سالانىڭ مامانى بولعان سوڭ ول كىسى بارىنە دە تۇسىنىستىكپەن قارايدى», دەيدى كەيىپكەرىمىز. بايانبەك اسپاندياروۆ – پاۆلودار وبلىسىنداعى باياناۋىل توپىراعىنىڭ تۋماسى. مەكتەپ بىتىرگەن سوڭ اجەسىنىڭ اقىلىمەن دارىگەر ماماندىعىن تاڭداپتى. قاراعاندى مەملەكەتتىك مەديتسينا ۋنيۆەرسيتەتىنىڭ جالپى مەديتسينا فاكۋلتەتىندە 2009-2014 جىلدار ارالىعىندا وقىعان. ودان كەيىن پەدياتريا ينتەرناتۋراسىن ءبىتىرىپ, 2016-2018 جىلدارى جۇقپالى اۋرۋلار رەزيدەنتۋراسىندا ءبىلىمىن جەتىلدىرىپتى.
جۇقپالى اۋرۋلار دارىگەرى سودان بەرى وبلىستىق كلينيكالىق اۋرۋحانادا ابىرويمەن جۇمىس ىستەپ كەلەدى. جاس تا بولسا قارىم-قابىلەتى باعالانىپ, اتالعان مەكەمە ديرەكتورىنىڭ ورىنباسارى قىزمەتىن دە ءبىراز ۋاقىت اتقارعان ەكەن. قازىرگى ۋاقىتتاعى ونىڭ قىزمەتى – وسى اۋرۋحاناداعى جەدەل ىشەك ينفەكتسياسى بولىمشەسىنىڭ مەڭگەرۋشىسى.
– وتكەن جىلدىڭ جەلتوقسان ايىندا قىتايداعى كوروناۆيرۋس پاندەمياسى تۋرالى اقپارات تاراعاننان-اق ءبىزدىڭ ەلىمىزدە ساقتىق شارالارى قولعا الىنا باستادى. ال ناۋرىز ايىندا الماتى مەن نۇر-سۇلتان قالالارىندا ناۋقاستار انىقتالعان كەزدە قاراعاندى وبلىسىندا پروۆيزورلىق گوسپيتالدار قۇرىلا باستادى. ول جەرلەرگە العاشقى پاتسيەنتتەر جاتقىزىلا باستاعاندا وبلىستاعى بارلىق جۇقپالى اۋرۋلار دارىگەرلەرى پروۆيزورلىق گوسپيتالدارعا جۇمىس ىستەۋگە جىبەرىلدى, – دەيدى ب. اسپاندياروۆ.
ب.اسپاندياروۆ ءساۋىر ايىنىڭ باسىنان باستاپ ينفەكتسيالىق گوسپيتالداعى ۆاحتالىق كەزەكشىلىككە, ياعني كوروناۆيرۋسپەن كۇرەستىڭ العى شەبىنە ءوز ەركىمەن اتتانىپتى. گوسپيتالدا بۇلار ەكى بريگاداعا ءبولىنىپ, كەزەكپەن جۇمىس ىستەيدى. ماسەلەن, ءبىر بريگادا 14 كۇن ۆاحتالىق رەجىمدە جۇمىس ىستەگەننەن كەيىن دەمالىسقا كەتەدى دە, ولاردىڭ ورنىن ەكىنشى بريگادا باسادى.
– ءبىزدىڭ كوماندادا ەكى دارىگەر, ءۇش مەدبيكە جانە ەكى سانيتار بار. كۇنىنە التى-سەگىز ساعات ناۋقاستاردى قاراپ ەمدەيمىز, ودان كەيىن قۇجاتتاردى تولتىرامىز دا, دەمالۋعا كەتەمىز. پاتسيەنتتەرگە باراردا قاجەتتى ەپيكيروۆكانى – ىندەتكە قارسى كوستيۋم, قالپاق, رەسپيراتور, كوزىلدىرىك, ەكى قابات بيالاي, ارنايى اياققاپتاردىڭ بارلىعىن تولىق كيەمىز, – دەيدى بايانبەك.
ۆاحتالىق تاسىلمەن جۇمىس ىستەيتىن بايانبەك سياقتى مەديتسينا قىزمەتكەرلەرى ءۇشىن اۋرۋحانا اۋماعىنىڭ ماڭىنان بولەك كورپۋس قاراستىرىلعان. وسى جەردەگى قايتا جابدىقتالعان پالاتالاردا ولار تاماعىن ءىشىپ, دەمالىپ, ءتىپتى ءبىرازى وسىندا تۇرىپ جاتىر. ۆاحتا بىتكەننەن كەيىن بايانبەكتەرگە ۇيگە قايتۋ جوق. ولار كۆي-عا تەكسەرىلىپ, گوسپيتالدا 14 كۇن بويى كارانتيندە بولادى. ال ءبىزدىڭ كەيىپكەرىمىز بولسا, ۆاحتاعا وسىمەن ءتورتىنشى مارتە ءتۇسىپ وتىر ەكەن.
– ءاۋ باستا مەنىڭ جاقىن تانىستارىمنىڭ ءوزى سەنبەيتىن. «جۇرتتى نەگە الداپ جۇرسىڭدەر؟» دەپ كىنالاعاندارى دا بولدى اراسىندا. قازىر كوبىنىڭ كوزى جەتكەن سياقتى. ايتسە دە ءالى كۇنگە دەيىن ىندەتتىڭ بارىنا سەنبەي, بارىنە سەلسوق قاراپ جۇرگەندەر بار. مىنە, وسىلارعا سانا بەرسە ەكەن دەپ تىلەيمىن. ال ۆيرۋس جۇقتىرىپ جاتقاندار وتە كوپ, – دەيدى دارىگەر.
بايانبەك اسپاندياروۆ ناۋرىز ايىندا پروۆيزورلىق گوسپيتالدا تاۋەكەلى جوعارى توپتا جۇمىس ىستەگەنى ءۇشىن پرەزيدەنت قاسىم-جومارت توقاەۆ ۋادە ەتكەن قوسىمشا 425 مىڭ تەڭگەنى تولىعىمەن العان.
– ماسەلە اقشادا ەمەس. مەنىڭ ارىپتەستەرىم قوسىمشا اقشا تولەنبەسە دە, وزدەرىنىڭ مىندەتىن ادال اتقارىپ شىعۋشى ەدى. دەگەنمەن مەملەكەت تاراپىنان كورسەتىلىپ جاتقان قولداۋ ادامدى قاناتتاندىرادى, مەديتسينا قىزمەتكەرلەرى ەڭبەگىنىڭ لايىقتى باعالانعانى قۋانتادى, – دەيدى كەيىپكەرىمىز.
بايانبەككە قازىرگى جاعدايدا ۇيدەگى ءتورت جانە ءبىر جاستاعى بال قىلىقتى بالالارىن كورمەۋ اۋىر تيەدى ەكەن. ايتەۋىر ءۇي-ىشىمەن كۇندە بەينەبايلانىس ارقىلى حابارلاسىپ تۇرادى. بىراق وسىنداي سىن ساعاتتا اۋىر دەرتكە شالدىققان ادامداردىڭ جانىنان تابىلىپ, ولارعا قولدان كەلگەنشە كومەك كورسەتىپ جۇرگەندەرى شارشاعاندارىن, قينالعاندارىن – ءبارى-ءبارىن ۇمىتتىرىپ جىبەرەتىنىن ايتادى گيپپوكرات انتىنا بەرىك مامان اعىنان جارىلىپ.
قاراعاندى