قازىرگى تاڭدا رەسپۋبليكالىق ماڭىزعا يە "اتىراۋ-ورال" اۆتوموبيل جولىندا (75-125 شاقىرىم) قايتا جاڭارتۋ جۇمىستارىن جۇرگىزۋگە ارنالعان جوبالىق-سمەتالىق قۇجاتتامانى (جسق) ازىرلەيتىن كومپانيانى انىقتاۋ ماقساتىندا ءتيىستى پروتسەدۋرالار باستالىپ كەتتى, - دەپ حابارلادى يدم ءباسپاسوز قىزمەتى.
جسق دايىن بولعان سوڭ, جولشىلار تاسجولدىڭ 50 شاقىرىمىندا قۇرىلىس-مونتاجداۋ جۇمىستارىنا كىرىسەتىن بولادى.
"اتىراۋ-ورال" اۆتوموبيل جولى – ەكى وبلىس ورتالىعىن بايلانىستىرۋشى ماڭىزدى ترانزيتتىك كولىكتىك ءدالىز. ول كاسپي تەڭىزىنىڭ پورتتارىنا شىعۋعا مۇمكىندىك بەرەدى. جول وسىدان 15 جىل بۇرىن جوندەۋدەن وتكەن بولاتىن. ءۇشىنشى تەحنيكالىق ساناتتاعى تاسجولدىڭ قۇرىلىمى وستىك جۇكتەمەسى 8 تونناعا دەيىنگى كولىك قۇرالدارىنا لايىقتالىپ, تاۋلىگىنە شامامەن 3000 كولىكتى وتكىزە الادى. بۇگىنگى تاڭدا قازاقستاندا اۆتوموبيل جولدارىن سالۋ مەن قايتا جاڭارتۋ وسكە 13 تونناعا دەيىنگى ەسەپتىك جۇكتەمەمەن جۇزەگە اسىرىلادى. تيىسىنشە, اتالمىش جولدىڭ جاڭعىرتىلۋى قوس ءوڭىر ءۇشىن اسا قاجەت.
جول قايتا جاڭارتۋ جۇمىستارىنان وتكەن سوڭ ءتورت جانە ەكى جولاقتى بولادى. بۇگىنگى تاڭدا اۆتوموبيل جولىنىڭ ۋچاسكەسىندە (75-125 شاقىرىم) قايتا جاڭارتۋ جۇمىستارىن جۇرگىزۋگە ارنالعان جسق ازىرلەيتىن جوبالىق كومپانيا انىقتالعان. جوبا وسى پروتسەدۋرالار اياقتالعان سوڭ ىسكە اسىرىلا باستايدى.
ايتا كەتۋ كەرەك, جوبا اۆتوموبيل جولىنىڭ وتكىزۋ قابىلەتىن ارتتىرۋعا, جولداعى اپاتتىلىقتى تومەندەتۋگە, اتىراۋ جانە باتىس قازاقستان وبلىستارىنىڭ الەۋمەتتىك-ەكونوميكالىق دامۋىن جاقسارتۋعا, سونداي-اق, قازاقستاننىڭ ترانزيتتىك الەۋەتىن ايتارلىقتاي ارتتىرۋعا مۇمكىندىك بەرمەك.
ەسكە سالايىق, "اتىراۋ-ورال" اۆتوموبيل جولى 2020-2025 جىلدارعا ارنالعان "نۇرلى جول" مەملەكەتتىك باعدارلاماسى اياسىندا قايتا جاڭارتىلادى.