4 ماۋسىم كۇنى قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسىندا قر مەملەكەتتىك رامىزدەر كۇنىنە ارنالعان ء«ۇمىتىن ەلدىڭ ارقالاپ, ارماننان تۋعان رامىزدەر» اتتى ونلاين فورماتتا دوڭگەلەك ۇستەل ءوتتى. بۇل تۋرالى «قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ كىتاپحاناسى» ءباسپاسوز قىزمەتى حابارلادى.
ءىس-شاراعا قاتىسقان جاستار ۇيىمدارىنىڭ كوشباسشىلارى, ونەر قايراتكەرلەرى, «قازاقستاننىڭ 100 جاڭا ەسىمى» جوباسىنىڭ جەڭىمپازدارى, قازاقستاننىڭ جوعارى وقۋ ورىندارى مەن كوللەدجدەرىنىڭ وقىتۋشىلارى مەن ستۋدەنتتەرى, پەداگوگيكالىق قوعامداستىق وكىلدەرى مەملەكەتتىك رامىزدەردىڭ ماڭىزدىلىعىن قازاقستاندىق پاتريوتيزم مەن ۇلتتىق بىرەگەيلىكتى جاساقتاۋدىڭ نەگىزگى قۇرامداس بولىگى رەتىندە تالقىلادى.
دوڭگەلەك ۇستەلدى ەلباسى كىتاپحاناسىنىڭ ديرەكتورى, ساياسي عىلىمدار دوكتورى, پروفەسسور ءامىرحان راحىمجانوۆ جۇرگىزدى. ول قاتىسۋشىلاردى قازاقستان رەسپۋبليكاسىنىڭ مەملەكەتتىك رامىزدەر كۇنىمەن قۇتتىقتاي كەلە, بۇل مەرەكەنىڭ تاۋەلسىز قازاقستان تاريحىندا ەرەكشە ورىن الاتىندىعىن, شىنايى ەگەمەندىكتىڭ قالىپتاسۋىنداعى ماڭىزدى كەزەڭ ەكەندىگىن اتاپ ءوتتى.
– مەملەكەتتىك رامىزدەر - قازاقستان رەسپۋبليكاسىنىڭ دەربەستىگى مەن تاۋەلسىزدىگىن بۇكىل الەمگە پاش ەتكەن, ءارى مەملەكەتىمىزدىڭ وتكەنى مەن بۇگىنى جانە بولاشاعى اراسىنداعى ساباقتاستىقتىڭ جارقىن كورىنىسى. ء«…بىز تاۋەلسىزدىكتى اڭساپ, زارىعىپ جەتتىك. ەندى سول تاۋەلسىزدىكتىڭ قاسيەتتى بەلگىلەرىن دە ەرەكشە قادىرلەۋىمىز كەرەك. ءاربىر ازامات مەملەكەتتىك تۋدى, مەملەكەتتىك ەلتاڭبانى, مەملەكەتتىك گيمندى شەكسىز سۇيىسپەنشىلىكپەن قاسيەت تۇتۋى ءتيىس. ەلدىگىمىزدىڭ سىنالاتىن ءبىر تۇسى وسى» – دەگەن ەلباسى سوزدەرى ماڭگىلىك ەلدىڭ ماڭگىلىك بويتۇمار-بەلگىلەرىن جەلبىرەتە شارىقتاتىپ, بەرىك قابىرعاداي ەڭسەلەتىپ جانە اسقاقتاتا اۋەندەتۋىمىزدى اماناتتايدى. وسى ورايدا قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن.ءا. نازارباەۆتىڭ جاڭا مەملەكەتتىك رامىزدەردى قابىلداۋعا قانشالىقتى زور ءمان بەرگەندىگىن ايتا كەتكەن ءجون. سول تۇستا جاس ەگەمەندى مەملەكەتتىڭ ساياسي ءمانى مەن ماقساتىن ناقتىلى تۇردە كورسەتەتىن كوركەمدىك شەشىم تابۋ قاجەت بولدى. حالىق سايلاعان قالاۋلىلار ءوز ويلارىن بۇكپەسىز ءبىلدىرىپ, ءوز پىكىرلەرى مەن كوزقاراستارىن باتىل قورعاي وتىرىپ, ورتاق كەلىسىمگە نەگىزدەلگەن شەشىمدەردىڭ قابىلدانۋىنا ايتارلىقتاي ۇلەس قوستى. ەلباسى تۇڭعىش تاۋەلسىزدىك رامىزدەرىنىڭ ءتول تاريحي تامىرى تەرەڭنەن بوي تارتۋىن, ۇلتتىق بولمىسى انىق تا ايشىقتى بولۋىن قاداعالادى. مەملەكەتتىك رامىزدەر – حالقىمىزدىڭ مۇقالماس رۋحىن, قاھارماندىعى مەن دانالىعىن, اسقاق ارمان-تىلەگىن جەتكىزەتىن قۇندى بەلگىلەرى بولىپ تابىلادى. ۇلتارالىق تاتۋلىق پەن بەيبىتشىلىكتى ناسيحاتتاۋ جولىندا جانە مەملەكەتىمىزدىڭ الەمدىك دەڭگەيدە تانىلىپ وزىنە ءتان بەلگىلەرىمەن دامىعان ەلدەر قاتارىنان ورىن الۋى ءۇشىن ءتول رامىزدەرىمىزدىڭ اتقاراتىن قىزمەتى ايرىقشا. ەلىمىزدە تىنىشتىق, بەيبىتشىلىك بولسىن! ازات ەلدىڭ ءانۇرانىن جەلبىرەگەن كوك تۋدىڭ استىندا ماڭگى شىرقاۋعا جازسىن! – دەپ اتاپ ءوتتى ءا.راحىمجانوۆ.
الەمگە تانىمال ءانشى, كومپوزيتور جانە كوپ اسپاپ مامانى, قازاقستاننىڭ ەڭبەك سىڭىرگەن قايراتكەرى ديماش قۇدايبەرگەن دوڭگەلەك ۇستەل قاتىسۋشىلارى مەن بارشا قازاقستاندىقتارعا ءوزىنىڭ بەينە قۇتتىقتاۋىن جولدادى:
– قۇرمەتتى وتانداستار! سىزدەردى قازاقستان رەسپۋبليكاسىنىڭ مەملەكەتتىك رامىزدەر كۇنىمەن شىن جۇرەكتەن قۇتتىقتايمىن! ەلىمىز بەن حالقىمىزعا بەيبىتشىلىك پەن وركەندەۋ تىلەيمىن. وتانىمىز بار ماقساتىنا جەتىپ, گۇلدەنە بەرسىن. بار اسىل ارماندارىمىز ورىندالىپ, ەلىمىز ءاردايىم بيىكتە بولسىن!
قازاقستان جاستارى كونگرەسىنىڭ اتقارۋشى ديرەكتورى توقتار بولىسوۆ مەملەكەتتىك رامىزدەردىڭ جاستار ءۇشىن ماڭىزدىلىعىنا ارنالعان سوزىندە مەملەكەتتىك رامىزدەر كۇنىن مەرەكەلەۋدىڭ باستى يدەياسى - جاستار ءپاتريوتيزمى مەن بارلىق ەتنوستاردىڭ بىرلىگىن نىعايتۋ, تاۋەلسىز ەلدىڭ قۇندىلىقتارى مەن جەتىستىكتەرىن ناسيحاتتاۋ ەكەنىن اتاپ ءوتتى.
قازاقستان حالقى اسسامبلەياسىنىڭ «جاڭعىرۋ جولى» رەسپۋبليكالىق جاستار قوزعالىسىنىڭ, رەسپۋبليكالىق «جاراسىم» جاستار ۇيىمىنىڭ توراعاسى تيمۋر جۇمىرباەۆتىڭ پىكىرىنشە مەملەكەتتىك رامىزدەر قوعامدىق كەلىسىم مەن جالپىۇلتتىق بىرلىكتىڭ ماڭىزدى قۇرامداس بولىگى سانالادى. ول «كەز كەلگەن ەتنوس وكىلى ءۇشىن قازاقستاننىڭ مەملەكەتتىك رامىزدەرى ماقتانىش پەن قۇرمەتتىڭ كورىنىسى بولا بەرمەك», - دەپ اتاپ ءوتتى.
«ۇلان-عايىر دالا ەلى» قوعامدىق بىرلەستىگىنىڭ توراعاسى, قازاقستان رەسپۋبليكاسىنىڭ پرەزيدەنتى جانىنداعى جاستار ساياساتى جونىندەگى كەڭەس مۇشەسى ءۋاليحان باحرەتدينوۆ «جاستار تاربيەسىندەگى قازاقستان رەسپۋبليكاسىنىڭ مەملەكەتتىك رامىزدەرىنىڭ ءرولى» تاقىرىبىندا, №54 مەكتەپ-ليتسەيىنىڭ ديرەكتورى, «قازاقستاننىڭ 100 جاڭا ەسىمى» جوباسىنىڭ جەڭىمپازى شاكارىم سەيسەنباي «ۇلتتىق قۇندىلىقتارعا نەگىزدەلگەن تاربيە» تاقىرىبىندا بايانداما جاسادى. «جاستار» تەاترىنىڭ اكتەرى, «التىن جەبە» ۆولونتەرلەر ۇيىمىنىڭ نەگىزىن قالاۋشىلاردىڭ ءبىرى, «قازاقستاننىڭ 100 جاڭا ەسىمى» جوباسىنىڭ جەڭىمپازى الىبەك نۇربەك «مەملەكەتتىك كوك بايراق الەم ساحناسىندا» بايانداماسىمەن ءسوز السا, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ 2 كۋرس ستۋدەنتى, ەلباسى كىتاپحاناسىنىڭ ۆولونتەرى ءانۋار جۇمابەكتىڭ بايانداماسىنىڭ تاقىرىبى «مەملەكەتتىك رامىزدەر – جاستاردىڭ پاتريوتتىق تاربيەلەۋدىڭ بىرىكتىرۋشىلىك باستاۋى» بولدى.
سونداي-اق, دوڭگەلەك ۇستەلگە بەينەبايلانىس ارقىلى اۋعانستاننان كەلىپ, قازاق ۇلتتىق اگرارلىق ۋنيۆەرسيتەتىندە (الماتى ق.) وقىپ جاتقان ماگيسترانتتار قاتىستى.