پارلامەنت سەناتى توراعاسى ماۋلەن اشىمباەۆتىڭ توراعالىعىمەن ءوتىپ جاتقان جالپى وتىرىستا «قازاقستان رەسپۋبليكاسىنىڭ ازاماتتىق پروتسەستىك كودەكسىنە سوتتار جۇمىسىنىڭ زاماناۋي فورماتتارىن ەندىرۋ, ارتىق سوت راسىمدەرى مەن شىعىندارىن قىسقارتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسى زاڭى قابىلداندى.
پارلامەنت ءماجىلىسى ماقۇلداعان بۇل زاڭ جوباسىن سەنات دەپۋتاتتارى بۇگىن ەكى وقىلىمدا قاراپ, كەڭىنەن تالقىلادى.
سەنات سپيكەرى ماۋلەن اشىمباەۆ ازاماتتىق پروتسەستىك كودەكسىنە ەنگىزىلىپ وتىرعان تۇزەتۋلەر مەملەكەت باسشىسىنىڭ تاپسىرماسى بويىنشا ازىرلەنگەنىن اتاپ ءوتتى.
– وزگەرىستەر مەن تولىقتىرۋلار سوت جۇيەسىن ودان ءارى جاڭعىرتۋعا جانە ارتىق سوت راسىمدەرىن قىسقارتۋعا سەپتىگىن تيگىزەدى. سونداي-اق زاماناۋي ەلەكتروندى سەرۆيستەردى ەنگىزۋگە, ازاماتتاردىڭ ەلىمىزدەگى سوت جۇيەسىنە دەگەن سەنىمىن ارتتىرۋعا مۇمكىندىك بەرەدى. سوندىقتان كودەكسكە ەنگىزىلگەن تۇزەتۋلەر سوت تورەلىگىنىڭ جەدەلدىگىن جانە تيىمدىلىگىن قامتاماسىز ەتىپ, سوت جۇيەسىنىڭ ودان ءارى دامۋىنا وڭ اسەر ەتەدى دەپ سەنەمىز, – دەدى ماۋلەن اشىمباەۆ.