تۇركىستاندا بالالار كورمەسى ونلاين ءوتتى

1 ماۋسىم - حالىقارالىق بالالاردى قورعاۋ كۇنىنە وراي ۇيىمداستىرىلعان ونلاين-كورمەگە قورىق-مۋزەي قورىندا ساقتالعان جاس قىلقالام شەبەرلەرىنىڭ جانە 2018 جىلى وتكەن «استانا جانە تۇركىستان» جاس سۋرەتشىلەر بايقاۋى جەڭىمپازدارىنىڭ كارتينالارى, قاسيەتتى قالاعا دەگەن سۇيىسپەنشىلىگىن قىلقالاممەن سۋرەتتەگەن دارىندى جاستاردىڭ كوركەم تۋىندىلارى قويىلدى.

قوجا احمەت ياساۋي كەسەنەسىن ءتۇرلى-ءتۇستى بوياۋلارمەن كەسكىندەپ, تۋعان جەرگە دەگەن ىستىق ىقىلاسىن بىلدىرگەن جاس سۋرەتشىنىڭ ءبىرى  جاماللادين ەسىركەپ ءوز تۋىندىسى تۋرالى ايتىپ بەردى.

«قوجا احمەت ياساۋي كەسەنەسىنىڭ الدىندا تۇرعان قازاقتىڭ حاندارى مەن بيلەرىن, يگى جاقسىلارىن سۋرەتتەپ شىقتىم. ادام بەينەسىن جاساۋ اۋىر ءارى ۇلكەن جاۋاپكەرشىلىك. مەنىڭ ارمانىم سۋرەتشى بولۋ. سوندىقتان ءوز تۋعان جەرىمدەگى بارشا قازاقتىڭ تۇلعالارى ەلىمىزگە اق باتالارىن بەرىپ تۇرعان ءساتىن سەزىنگىم كەلدى. كۇنى-ءتۇنى وسى كورىنىستى ارمانداپ, سۋرەتتەپ شىقتىم», - دەدى جاماللادين.

سونىمەن قاتار تۇركىستاندىق جاس دارىندار سۋرەت سالۋدان شەبەرلىك ساباقتارىن جۇرگىزىپ, ەلىمىزدىڭ تۇكپىر-تۇكپىرىندەگى دوستارىنا ونلايندا كارتينالارى تۋرالى ايتىپ بەردى.

مەرەكە كۇنى بالالارىن دەمالىس ايماعىندا سەرۋەندەتىپ جۇرگەن اتا-انالار مەن قالا قوناقتارى دا كورمەگە قويىلعان 50-گە جۋىق تۋىندىنى تاماشالادى.

ايتا كەتەيىك, «ازىرەت سۇلتان» مەملەكەتتىك تاريحي-مادەني قورىق-مۋزەيى جىل سايىن ءداستۇرلى تۇردە بالالارعا ارنالعان مەرەكەنى نازاردان تىس قالدىرماي, تيىسىنشە ءتۇرلى ءىس-شارالارمەن اتاپ ءوتىپ كەلەدى. مۋزەي ىسىنە, تاريحي ورىندارعا بالالاردىڭ قىزىعۋشىلىعىن ارتتىرا وتىرىپ تانىمىن كەڭەيتۋ, شىعارماشىلىق قابىلەتتەرىن دامىتۋ باعىتىندا سۋرەتشىلەر سايىسى, بالالار كورمەسى, بالاباقشا جانە مەكتەپ وقۋشىلارىنا ارنالعان ەكسكۋرسيالار ۇيىمداستىرىلىپ, ءارتۇرلى تاتتىلەر مەن ءار الۋان بوياۋلى كىتاپتار سىيلىق رەتىندە تاراتىلاتىن.

بيىلعى جىلى ەلىمىزدەگى پاندەمياعا بايلانىستى جاريالانعان ساقتىق شارالارىنا سايكەس كوپتەگەن بالالار ءىس-شاراعا ارنايى كەلە الماسا دا ونلايندا بايلانىسقا شىقتى.