قازاقستاندا مەملەكەتتىك قىزمەتتەردى ەلەكتروندى تۇردە الۋ رەتىن بارىنشا ىڭعايلى ەتۋ ءۇشىن حقو عيماراتىنان تىس جەردە ءوز بەتىنشە قىزمەت الۋعا بولاتىن التى جۇزگە جۋىق egov بۇرىشتارى جۇمىس ىستەيدى. تاياۋ ارادا تاعى 400 بۇرىش اشۋ جوسپارلانعان. وندا كومپيۋتەرى نەمەسە ينتەرنەتكە قوسىلۋ مۇمكىندىگى جوق قازاقستاندىقتار ەلەكتروندىق ۇكىمەت پورتالىندا قولجەتىمدى قىزمەتتەردى وزدىگىنەن الا الادى. بۇرىشتار وبلىس اكىمدىكتەرى, وقۋ ورىندارى, مەديتسينالىق ۇيىمدار, ساۋدا جانە ويىن-ساۋىق ورتالىقتارىنىڭ عيماراتتارىندا ورنالاسقان.
مەملەكەتتىك كورپوراتسيانىڭ باسقارما ءتورايىمى اسەمگۇل بالتاشەۆانىڭ ايتۋىنشا, كوروناۆيرۋس ينفەكتسياسىنىڭ قاۋپى سەيىلمەگەندىكتەن, ونىڭ حقو-دا تارالماۋىنا ەرەكشە نازار اۋدارعان ءجون. «سوندىقتان ءبىز حالىققا قىزمەت كورسەتۋ ورتالىقتارىنىڭ عيماراتتارىندا ازاماتتاردىڭ جينالۋىن بولدىرماۋ جانە ۆيرۋستىڭ تارالۋ قاۋپىن ازايتۋعا مۇمكىندىك بەرەتىن بىرقاتار ناقتى شارا قابىلدادىق. ەندى قازاقستاندىقتار حالىققا قىزمەت كورسەتۋ ورتالىقتارىندا ونلاين تۇردە قولجەتىمسىز «قاعاز» جۇزىندە كورسەتىلەتىن قىزمەتتەر مەن ونلاين راسىمدەلگەن وتىنىشتەردىڭ دايىن ناتيجەسىن الا الادى. بۇل رەتتە, حقو-عا باراتىن ۋاقىت ارالىعىن الدىن الا برونداۋ قاجەت. قازاقستاندىقتار ەلەكتروندى قىزمەتتەردى ءوز بەتىنشە ۇيدە, كەڭسەدە نەمەسە وزىنە-ءوزى قىزمەت كورسەتۋ سەكتورلارىندا الا الادى», – دەدى بالتاشەۆا.
سونىمەن قاتار ول اۋدان ورتالىقتارى مەن اۋداندىق ماڭىزى بار قالالارداعى حقو عيماراتتارىنداعى وزىنە-ءوزى قىزمەت كورسەتۋ سەكتورلارىنىڭ بۇرىنعىداي جۇمىس ىستەيتىنىن ايتىپ ءوتتى. اۋىلدىق وكرۋگتەردە ەلەكتروندىق قىزمەتتەردى جەرگىلىكتى اكىمدىكتەر عيماراتىندا ورنالاسقان egov بۇرىشتارىندا ءوز بەتىنشە الۋعا بولادى.
ال, الماتى قالاسىنىڭ تۇرڭىندارى قالاداعى 20-دان اسا بۇرىشتاردان مەملەكەتتىك قىزمەتتەردى الا الادى.
ايتا كەتۋ كەرەك, قازىرگى ۋاقىتتا egov.kz پورتالىنداعى ۆيرتۋالدى كومەكشىنىڭ كومەگىمەن ەلەكتروندىق تسيفرلىق قولتاڭبانى الۋعا جانە ازاماتتاردىڭ ءموبيلدى بازاسىندا تىركەلۋگە بولادى. ەگەر پورتال قىزمەتى بويىنشا سۇراقتار تۋىندايتىن بولسا, قىزمەت الۋشى 1414 بايلانىس ورتالىعىنا قوڭىراۋ شالىپ, ازاماتتارعا ارنالعانۇكىمەت مەملەكەتتىك كورپوراتسياسى قىزمەتكەرلەرىنىڭ كەڭەسىن الا الادى.
ايتا كەتەيىك, ازاماتتاردىڭ كەلەسى ءۇش ساناتى زەينەتكەرلەر, كوپ بالالى وتباسىلار جانە مۇگەدەكتەرەلەكتروندىق قىزمەتتەردى حالىققا قىزمەت كورسەتۋ ورتالىقتارىنىڭ عيماراتتارىندا بۇرىنعىداي الا الادى. ولار دا كەزەك ۋاقىتىن الدان الا برونداۋى ءتيىس.