كوروناۆيرۋستىڭ تارالۋىنا جول بەرمەۋ جونىندەگى ۆەدومستۆوارالىق كوميتەت شىعىس قازاقستان وبلىسىندا تاعى 1 ادامنىڭ كوروناۆيرۋس ينفەكتسياسىن جۇقتىرعانىن حابارلادى.
سەمەي قالاسىندا 1988 جىلى تۋعان ايەل ادامنان پتر دياگنوستيكالىق زەرتتەۋ ناتيجەلەرى بويىنشا COVID-19 ۆيرۋسى تابىلدى.
سەمەيلىك ناۋقاس بۇعان دەيىن كوروناۆيرۋس ينفەكتسياسىن جۇقتىرعان اداممەن قارىم-قاتىناستا بولعان تۇلعا رەتىندە تەكسەرىلدى.
ونىمەن بايلانىستا بولعان ادامداردى ەپيدەميولوگيالىق تەكسەرۋ جانە مەديتسينالىق تەكسەرۋ جۇرگىزۋ ءۇشىن تكقسقب اۋماقتىق باسقارماسىنىڭ ماماندارى مەن مەديتسينا قىزمەتكەرلەرىنەن قۇرالعان ءموبيلدى توپ ۇيىمداستىرىلىپ, وشاقتارعا تولىق زارارسىزداندىرۋ جۇمىستارىن جۇرگىزىپ جاتىر.
ەپيدەميولوگيالىق تەرگەۋ جانە ەپيدەمياعا قارسى شارالار قولعا الىنعان.
وتكەن تاۋلىكتەگى جاعداي بويىنشا وبلىستا كوروناۆيرۋس جۇقتىرعان جالپى 74 ادام تىركەلگەن, ساۋىعىپ شىققاندار سانى — 50.