بۇگىندە وبلىس بويىنشا 100 مىڭنان استام ادام تەگىن ءدارى-دارمەكپەن قامتاماسىز ەتىلەدى. وڭىردەگى ەمحانالار جانىنان دارىحانالىق بەكەتتەر بىرىڭعاي جۇيە بويىنشا جۇمىس ىستەپ تۇر.
وڭىردە تەگىن ءدارى-دارمەك الۋعا مۇقتاج جانداردىڭ قاتارى كوپ. ارنايى بوساتىلىممەن بەرىلەتىن دارىلەردىڭ كەيبىرىنىڭ باعاسى سىرقات جاندار ءۇشىن تىم قىمبات ەكەنى دە راس. اسىرەسە, سوزىلمالى اۋرۋ دياگنوزى قويىلعانداردىڭ قالتاسىنا اۋىر تيەدى.
كوكشەتاۋ قالاسىنداعى №1 ەمحانادا تەگىن-ءدارى-دارمەك الاتىنداردىڭ تىزىمىندە 19 مىڭنان استام ادام بار. ال, مەملەكەت تاراپىنان تەگىن ۇلەستىرىلەتىن پرەپاراتتاردىڭ ءتىزىمى 14-15 اۋرۋدىڭ ءتۇرى بويىنشا بەرىلەدى.
– 8500 سىرقاتقا ءدارى-دارمەك قان قىسىمىنىڭ تومەندىگىنە بايلانىستى بەرىلۋدە. سونداي-اق يشەميالىق جۇرەك اۋرۋى, ارتەريالىق گيپەرتونيا, اريتميا, سوزىلمالى جانە ونكولوگيالىق اۋرۋ تۇرلەرى بويىنشا دا ءدارى-دارمەكتەر تەگىن بوساتىلادى. ولارعا بايلانىستى الدەبىر قيىندىقتار تۋىنداپ وتىرعان جوق. بارلىعى جەتكىلىكتى مولشەردە, – دەيدى №1 قالالىق ەمحانانىڭ پروۆيزورى اننا يۋحا.
دەنساۋلىق ساقتاۋ باسقارماسى كارانتين كەزىندە دە تەگىن ءدارى-دارمەكتەردى جەتكىزۋدە ەش قيىندىقتىڭ بولماعانىن ايتادى. شەتەلدەن شىعارىلعان پرەپاراتتار دا جەتكىلىكتى. بيىل وبلىس بويىنشا تەگىن ءدارى-دارمەك ساتىپ الۋعا قازىنادان 5 ملرد تەڭگە بولىنگەن.