قوماقتى قارجى بولىنەدى

سوندىقتان بۇگىنگى كۇن تارتىبىندەگى باستى ماسەلە – ادامي كاپيتالدى دامىتۋ. ال ادامي كاپيتالدى كوتەرۋ ازاماتتاردىڭ ءبىلىم مەن دەنساۋلىق ساپاسىن ارتتىرۋمەن تىكەلەي بايلانىستى. سوعان وراي ۇلتتىق قوعامدىق سەنىم كەڭەسىنىڭ كەشەگى وتىرىسىندا بىرقاتار شەشىم قابىلداندى. ەڭ باستىسى, عىلىمعا بولىنەتىن قارجىنىڭ كولەمى وسەتىنى بەلگىلى بولدى. 

مەملەكەت باسشىسى قاسىم-جومارت توقاەۆ جاڭا احۋال ءبىلىم بەرۋ جانە عىلىم جۇيەسىن تۇبەگەيلى رەفورمالاۋدى تالاپ ەتەتىنىن ايتتى. ياعني, 2025 جىلعا دەيىن ءبىلىم سالاسىنا بولىنەتىن قاراجات 6 ەسە, عىلىم سالاسىنا 7 ەسە وسەتىنىن حابارلادى. بۇل ەلدەگى عىلىمنىڭ دامۋىنا ۇلكەن سەرپىن بولماق. سونىمەن بىرگە اۋىل مەن قالا مەكتەپتەرىنىڭ احۋالى تەڭەستىرىلىپ, تەحنيكالىق مۇمكىندىگىن جۇيەلەۋ قاراستىرىلادى. ەلدى مەكەندەردە شىعارماشىلىق ورتالىقتار سانىن كوبەيتۋ تاپسىرىلدى. ءۇش اۋىسىمدا ءبىلىم بەرۋ توقتاتىلىپ, الداعى 4 جىلدا 650 000 ورىندىق 800 مەكتەپ, 700 سپورت كەشەنى سالىناتىنى ايتىلدى. بۇل كەلەر ۇرپاقتىڭ جاقسى ءبىلىم الۋىنا مۇمكىندىك اشپاق. تاعى ءبىر ايتىپ وتەتىنى, اۋىل مەن قالاداعى ينتەرنەت بايلانىسىنىڭ تەڭەستىرىلۋى دە قۋانارلىق جاڭالىق. قازىر تسيفرلى تەڭسىزدىك دەگەن ۇعىم بار. ەندى ول جويىلىپ, اۋىل بالالارى دا ينتەرنەتكە قول جەتكىزەدى دەگەن سەنىمدەمىز.

ال ەندى بۇگىننىڭ باتىرلارى – مەديتسينا قىزمەتكەرلەرىنە دە باسا نازار اۋدا­رىلدى. دارىگەردىڭ جالاقىسى ورتاشا جالاقىدان 2,5 ەسە جوعارى بولاتىنى ءمالىم بولدى. «بۇل كورسەتكىشكە 2023 جىلعا قاراي قول جەتكىزۋ قاجەت. وسى كۇردە­لى كەزەڭدە بارشامىز مەديتسينا ماماندارىنىڭ قاجىرلى ەڭبەگىنە كۋا بولدىق», – دەدى پرەزيدەنت.

پاندەميا كەزىندە بارلىعىمىز, مۇعالىم مەن دارىگەردىڭ ءبىزدىڭ قوعامداعى ورنى ەرەكشە ەكەنىن, قاراپايىم جۇمىس­شىلاردىڭ ەڭبەگى ەرەن ەكەنىن تۇسىنگەندەي بولدىق. سوندىقتان قاراپايىم ەڭبەك ادامىنىڭ الەۋمەتتىك دەڭگەيىنىڭ جوعا­رىلاۋىن ماڭىزعا الۋىمىز كەرەك. سول كەزدە ەلىمىزدە الەۋمەتتىك تەڭدىك تە, دامۋ دا بولماق.

ەرلان سايىروۆ,

ۇلتتىق قوعامدىق سەنىم كەڭەسىنىڭ مۇشەسى