كەشە ەل پرەزيدەنتىنىڭ قاتىسۋىمەن ۇلتتىق قوعامدىق سەنىم كەڭەسىنىڭ ءۇشىنشى وتىرىسى ءوتتى. بۇل باسقوسۋ, نەگىزىنەن, دەنساۋلىق ساقتاۋ مەن ءبىلىم بەرۋ سالاسىنىڭ ماسەلەلەرىنە ارنالدى. جيىندا مەملەكەت باسشىسى وسى اتالعان سالالاردى ودان ءارى رەفورمالاۋ بويىنشا ناقتى ۇستانىمدارىن جاريا ەتتى. كەڭەس مۇشەلەرى دە ءوز ويلارىن ورتاعا سالىپ, پىكىرلەرىمەن ءبولىستى.
ۇلتتىق قوعامدىق سەنىم كەڭەسى قوعامداعى وزەكتى ماسەلەلەردى ۋاقتىلى كوتەرۋىمەن ەرەكشەلەنىپ كەلەدى. بۇل پرەزيدەنت ايتقان «حالىق ۇنىنە قۇلاق اساتىن مەملەكەت» تۇجىرىمداماسىنىڭ ىسكە اسىپ وتىرعانىنىڭ كورىنىسى. سەبەبى قوعامدىق ماسەلەلەردىڭ كوشەدە ەمەس, وسىنداي كەڭەستە دەر كەزىندە تالقىلانىپ, شەشىمدەردىڭ ۇسىنىلۋى وتە ماڭىزدى دەپ ەسەپتەيمىن.
پرەزيدەنتتىڭ ناقتى تاپسىرمالارى زاڭ نورمالارىندا كورىنىس تابۋى كەرەك. سوندىقتان بيىل پارلامەنتكە وسى اتالعان ماسەلەلەردى قامتيتىن بىرنەشە زاڭ جوباسى كەلىپ ءتۇسۋى مۇمكىن. مىسالى, ءبىلىم سالاسىنا قاتىستى, ونىڭ ىشىندە جوو وقىتۋشىلارىنىڭ جالاقىسىن, پەداگوگيكالىق ماماندىقتار بويىنشا ءبىلىم الاتىن ستۋدەنتتەردىڭ شاكىرتاقىسىن كوتەرۋگە بايلانىستى زاڭدار ازىرلەنۋى ىقتيمال.
قازىردىڭ وزىندە ماجىلىسكە عىلىم ماسەلەلەرى بويىنشا زاڭنامالىق اكتىلەرگە وزگەرىستەر مەن تولىقتىرۋلار ەنگىزۋدى كوزدەيتىن زاڭ جوباسى كەلىپ ءتۇستى. سوندىقتان پرەزيدەنتتىڭ كوتەرگەن باستامالارى مەن بەرگەن تاپسىرمالارىنىڭ زاڭ نورمالارىمەن بەكىتىلۋى اسا ماڭىزدى.
مۇرات باقتيار ۇلى,
پارلامەنت سەناتىنىڭ دەپۋتاتى