گازەت بەتتەرىندە كاسىپتىڭ قاي ءتۇرىن بولسىن ۇرشىقشا ءيىرىپ, ادال ەڭبەگىمەن ناپاقاسىن تاۋىپ جۇرگەن جانداردىڭ جۇمىسىن قالىڭ كوپشىلىككە ۇسىنىپ, كورسەتىپ كەلەمىز.
بۇل جولى دا سول ىزبەن كولىك جوندەۋ ماماندىعىنىڭ قىر-سىرىن مەڭگەرگەن مايتالماندى ماقالامىزعا ارقاۋ ەتپەكپىز. ول – قازتالوۆ اۋىلىنىڭ تۋماسى ەربول يدريسوۆ. ماقالامىزدىڭ باسىن وقىعاندار: «وي, مۇنىڭ نەسى قىزىق, كاسىپ جاساپ اقشا تاۋىپ ءجۇر عوي» دەپ ويلاۋى دا مۇمكىن. بىراق ماقالامىزدىڭ بارىسىندا ەربول بۇل كاسىپتى اقشا ءۇشىن ەمەس, جەكە قىزىعۋشىلىعىنان جاساپ جۇرگەنىنە كوز جەتكىزەمىز.
ەندەشە ءبارىن باسىنان باستايىق. ەربول تالاپ ۇلى ۇزاق جىلداردان بەرى اۋدان ورتالىعىنداعى وبلىستىق توتەنشە جاعدايلار دەپارتامەنتىنە قاراستى №11 ءورت ءسوندىرۋ بولىمىندە كولىك جۇرگىزۋشى بولىپ جۇمىس ىستەيدى. ازاماتتىق قورعاۋ اعا سەرجانتى ەربول كۇندەلىكتى قىزمەتىمەن قاتار كولىك جوندەۋمەن اينالىسادى. كولىك جوندەگەندە ەكىنىڭ ءبىرىنىڭ قولىنان جوندەۋ كەلە بەرمەيتىن سوعىلعان, مايىسقان كولىكتەردى قالپىنا كەلتىرۋمەن اينالىسادى. سونىڭ ىشىندە ءوزى قىزمەت جاساپ جۇرگەن ءبولىمنىڭ 4 قىزمەتتىك كولىگىن جوندەپ, ارىپتەستەرى الدىندا شەبەر رەتىندە تانىلعان. رەتىن تاۋىپ, ماقالامىزدىڭ كەيىپكەرىنە جولىقتىق.
– وقۋشى كەزىمنەن تەحنيكاعا وتە ءۇيىر بولدىم.
تەحنيكاعا دەگەن قىزىعۋشىلىعىم قازىرگى ماماندىعىمدى تاڭداۋىما سەبەپ بولدى. مەن كوبىنە جۇمىستا جۇرگەن كەزىمدە قىزمەتتىك كولىكتەردى جوندەۋمەن اينالىسامىن. ماعان اركەز ارىپتەستەرىم قولداۋ ءبىلدىرىپ, كومەكتەسىپ جۇرەدى. اتاپ ايتار بولسام, بەيبىت وتەباەۆ, ءبىرجان احمەتوۆ, ەربۇلان تىلەكەش, رومان قاراباەۆتاردىڭ ەڭبەگى زور. العاش رەت ءبىزدىڭ بولىمدەگى ۋاز اۆتوكولىگىن جوندەپ, جاڭا تۇسكە سىرلاپ شىقتىق. جامان بولىپ شىقپاعان سەكىلدى. ال ۇيدە جاقىندارىمنىڭ كولىگى بولماسا, باسقا ادامداردىڭ كولىگىن قارامايمىن. بۇل كاسىپ ەمەس, قوسىمشا اۋەستىگىم دەۋگە بولادى. كولىك جوندەپ, تابىس تاپقان ەمەسپىن, – دەپ اعىنان جارىلدى. ەربولدىڭ قايتا جوندەگەن كولىكتەرىن كورگەندە: «جاڭا عانا سالوننان شىققان با؟» دەپ ويلاۋىڭىز مۇمكىن.
ول جاقىندا ارىپتەستەرىمەن بىرگە زيل ماركالى ءورت ءسوندىرۋ اۆتوكولىگىن جاڭا ماشينەدەي جايناتىپ شىعارعان. جۋىردا ولار №11 ءورت ءسوندىرۋ ءبولىمى اتىنان وبلىستىق توتەنشە جاعدايلار دەپارتامەنتى ۇيىمداستىرىپ جاتقان «ۇزدىك جوندەۋ ءبولىمى» سايىسىنا قاتىسادى. سول جەردە وبلىس بويىنشا ارنايى تەحنيكانى جاقسى كۇتىپ ۇستاعان ءبولىم ماراپاتتالاتىن بولادى. ال ءبىزدىڭ كەيىپكەرىمىزدىڭ شەبەرلىگى سول جەردە جوعارى باعاعا يە بولارى ءسوزسىز.
قايرات جاقىپ
باتىس قازاقستان وبلىسى,
قازتالوۆ اۋدانى