بۇدان بىلايعى ۋاقىتتا مالساق قاۋىم توسكەيدى ءتورت ت ۇلىككە تولتىرۋ ءۇشىن عىلىمعا مويىن بۇرۋ قاجەت. ەندىگى ارادا بۇرىنعىداي «سەن سالار دا, مەن سالار» كوزقاراسپەن باعىمداعى مالدىڭ سانىن كوبەيتە المايتىنىمىز بەلگىلى بولىپ وتىر.
وبلىستا اسىل تۇقىمدى مال سانى بىرتىندەپ ءوسىپ كەلەدى. عىلىمنىڭ كەرەگى وسى جەردە. ءونىمى جوعارى بولعانىمەن, بارىنشا كىرپياز, كۇي تاڭداعىش جانۋارلار وزدەرىنە ەرەكشە قامقورلىق جاسالعانىن قالاپ تۇرادى ەكەن. قازىر مال ماماندارى پروفيلاكتيكالىق شارالاردىڭ ءتيىستى دەڭگەيدە ورىندالماي وتىرعانىنا الاڭداۋشىلىق بىلدىرۋدە. ونىڭ ءجونى دە بار. كوكتەم شىعىسىمەن كەنە مەن وزگە دە ۋلى جاندىكتەر كۇرت كوبەيەدى. اشىعىن ايتقاندا, قازىر مال شارۋاشىلىعى سالاسىندا عىلىمنىڭ ۇلەس سالماعى جىل وتكەن سايىن ازايىپ كەلەدى. قولىنداعى قارجىسىن بارىنشا ۇنەمدەپ, پايدا تابۋدى كوزدەگەن شارۋالار پروفيلاكتيكالىق ءىس-شارالارعا كوڭىل بولمەي وتىر. بۇل ورايداعى ءىس وتە قاجەتتى بولعانىمەن, كوپشىلىگى باسى ارتىق شىعىن سانايدى.
– شارۋالار مالدىڭ جەم-شوبىنە عانا ءمان بەرەدى. تولىمدى ءونىم الۋ ءۇشىن بۇرىنعى ادەتتەن ءبىرجولا ارىلۋ كەرەك. مال شارۋاشىلىعى ماڭىنداعى بار شارۋانى تولايىم زەرتتەپ, زەردەلەگەننەن كەيىن ءبىز مال باسىنىڭ ءتۇرلى اۋرۋلارعا قارسى ەكپە قابىلداۋىن نازاردان تىس قالدىرماسا ەكەن دەيمىز. ماسەلەن, شەتەلدەن اكەلىنگەن اسىل تۇقىمدى مال ەڭ الدىمەن ءبىزدىڭ جەرگە جەرسىنۋى قاجەت. كەيدە بىرقاتار اۋرۋلار ەرە كەلەتىنىن دە كورىپ ءجۇرمىز. بۇل جايدى دا مۇقيات ەسكەرۋ قاجەت, – دەيدى مال دارىگەرى جانعابىل اكىمباەۆ.
شەتتەن اكەلىنگەن مالدى شەتەلدىك ءدارى-دارمەكپەن ەمدەپ, اۋرۋدىڭ الدىن الماساڭىز, شىعىنعا بەلشەڭىزدەن باتۋىڭىز دا مۇمكىن. «اسىل كوكشە زووۆەتسناب» سەرىكتەستىگى ەۋروپا مەن اقش-تىڭ ايگىلى ۆەتەرينارلىق كومپانيالارىمەن ىسكەرلىك قارىم-قاتىناس ورناتقان. سەرىكتەستىك ماماندارى مالساق قاۋىمعا عىلىمي كومەك كورسەتەدى. ايتسە دە, مال دارىگەرلەرى مال اۋرۋلارىنىڭ جىل سايىن وزگەرىپ وتىراتىنىن دا ۇمىتپاۋ كەرەگىن ايتىپ وتىر. ورىستەگى اسىل تۇقىمدى مال عانا ەمەس, اۋىل تۇرعىندارىنىڭ باعىمىنداعى بىرەر قاراعا دا قاۋىپ-قاتەر كوپ.
– مالدىڭ ءبارى ءبىر ءورىستى شيىرلايتىندىقتان, جۇقپالى اۋرۋلاردىڭ ەتەك الۋ قاۋپى كوپ. نەگىزىندە ءار وتباسى وزدەرىنىڭ باعىمىنداعى مالدىڭ بارلىعىنا ۆاكتسينا ەگۋلەرى قاجەت. وسىنداي قادامعا بارسا عانا ءتورت ت ۇلىكتىڭ اعزاسىن ارقيلى اۋرۋلارعا ءتوزىمدى ەتەر ەدىك. الدىن الۋ شارالارى مال باسىن ساقتاپ قالۋعا عانا ەمەس, ونىڭ كۇيلى دە ءسۇتتى بولۋىنا وڭ ىقپالىن تيگىزەدى, – دەيدى اۋىل شارۋاشىلىعى ۆاكتسيناسى بويىنشا تەحنولوگ ساراپشى ءماريام ابىشەۆا.
الەمدەگى قالىپتاسىپ وتىرعان تاجىريبەنى تالداپ قاراساڭىز, يممۋنيتەتىن جوعارىلاتۋ باعىتىندا تۇراقتى ۆەتەرينارلىق ءدارى-دارمەك قابىلداعان مالدىڭ ونىمدىلىگى ەمدەلمەگەن مالدان 20 پايىزعا جوعارى ەكەن. ال جۇقپالى اۋرۋلاردىڭ الدىن الۋعا جۇمسالاتىن قارجى كولەمى وتە از. دەمەك, مال باعىپ ءبۇيىرىم شىقسىن دەسەڭىز, باعىمىڭىزداعى ءتورت ت ۇلىكتىڭ جايىن جاڭاشا ويلاۋ قاجەت.
اقمولا وبلىسى