وڭىرلەردە گازدىڭ كوتەرمە ساۋداداعى شەكتى باعاسى وسپەيدى

مينيستر حابارلاعانداي حالىققا, ونەركاسىپتىك تۇتىنۋشىلار مەن قازاقستان رەسپۋبليكاسىنىڭ كاسىپكەرلەرىنە قولداۋ كورسەتۋ ءۇشىن ەنەرگەتيكا مينيسترلىگى تاۋارلىق گازعا شەكتى كوتەرمە باعالاردىڭ وسۋىنە جول بەرمەۋ بويىنشا جۇمىستار جۇرگىزدى.

وڭىرلەر ءۇشىن تاۋارلىق گازعا شەكتى كوتەرمە باعالاردى اعىمداعى دەڭگەيدە ساقتاۋ تۋرالى شەشىم قابىلداندى.

اعىمداعى دەڭگەيدە بەكىتىلگەن تاۋارلىق گازعا شەكتى كوتەرمە باعالار حالىق, كىشى جانە ورتا بيزنەس, بيۋدجەتتىك ۇيىمدار ءۇشىن تاۋارلىق گازعا بولشەك ساۋدا باعالارىن تەجەۋگە اكەلەدى جانە مۋلتيپليكاتيۆتى اسەر رەتىندە جىلۋ ەنەرگياسىن وندىرەتىن جانە ەلەكتر ەنەرگياسىن شىعاراتىن وتىن-ەنەرگەتيكالىق كەشەنى ءۇشىن تاريفتەردى تەجەۋگە ىقپال ەتەدى.

بۇرىن 2019 جىلعى 1 قاڭتاردان باستاپ مينيسترلىك تاۋارلىق گازعا شەكتى كوتەرمە ساۋدا باعالارىن وڭىرىنە قاراي 3,8-دەن 17,5% شەگىندە تومەندەتتى. بۇل ەلىمىزدىڭ بارلىق گازداندىرىلعان وڭىرلەرىندە ەلەكتر ەنەرگياسى  مەن جىلۋعا تۇپكىلىكتى باعانى تومەندەتۋگە مۇمكىندىك بەردى.         

مينيسترلىك بەكىتكەن تاۋارلىق گازعا شەكتى كوتەرمە ساۋدا باعاسى 2019 جىلعى 1 شىلدە – 2020 جىلعى 30 ماۋسىم ارالىعىندا دا اعىمداعى دەڭگەيدە ساقتالدى.