كەڭسەلەردە قىزمەتكەرلەردىڭ جارتىسى قاشىقتان جۇمىس ىستەۋى ءتيىس. بۇل تۋرالى دەنساۋلىق ساقتاۋ ءمينيسترى ەلجان ءبىرتانوۆ ايتتى.
«كوپ ناۋقاس جۇمىس ورنىندا اۋىرعاندىقتان قازىر ءبىز باس سانيتارلىق دارىگەردىڭ قاۋلىسىمەن وسى جۇمىس ورىندارىنداعى ازاماتتاردىڭ سانىن ازايتۋىمىز قاجەت. مۇمكىندىك بولسا ينتەرنەت ارقىلى, قاشىقتان جۇمىسقا كوشۋىمىز كەرەك. مىسالى, وفيستىك جۇمىستاردا 50% قىزمەتكەر قاشىقتان جۇمىس ىستەۋى كەرەك. ازاماتتار اراسىندا قاشىقتىق ساقتالىپ, ينفەكتسيانىڭ تارالۋى توقتايدى. كەيبىر جاعدايدا ونداي شەكتەۋ ەنگىزۋ قيىن, مىسالى, ءبىزدىڭ كوپ كاسىپورىندار ۆاحتالىق رەجيمدە جۇمىس ىستەيدى. ونداي كاسىپورىنداردى توقتاتۋعا مۇمكىندىگىمىز جوق. سونىمەن, بۇل كاسىپورىندار دا وتە ماڭىزدى سانيتارلىق جانە دەزينفەكتسيالىق شارالاردى قابىلداۋى ءتيىس», - دەدى مينيستر.
رەيد جۇرگىزۋ بارىسىندا سانيتارلىق تالاپتاردى ساقتامايتىن كاسىپورىندار انىقتالعان.
«سوڭعى اپتادا رەيد جۇرگىزدىك. وكىنىشكە قاراي, كوپ جاعدايدا كاسىپورىنداردا سانيتارلىق شارالار قابىلدانبايدى. وتە ماڭىزدى پروفيلاكتيكالىق شارا بولعاننان كەيىن بارلىق كاسىپورىن باسشىلارى, كاسىپ يەلەرى دۇرىس ءتۇسىنۋى كەرەك. بۇل – حالىقتىڭ دەنساۋلىعىن ساقتاۋ ءۇشىن ماڭىزدى شارا», - دەدى ەلجان ءبىرتانوۆ.