سولتۇستىك قازاقستان وبلىسى پوليتسيا دەپارتامەنتىنىڭ جەرگىلىكتى پوليتسيا قىزمەتى باسقارماسىنىڭ حابارلاماسىنا قاراعاندا جىل باسىنان بەرى وبلىس جولدارىندا جول قوزعالىسى ەرەجەلەرىنىڭ 13 مىڭ 789 بۇزۋشىلىعى تىركەلگەن ەكەن. بارلىق 74 جول-كولىك وقيعاسىنىڭ سالدارىنان 12 ادام كوز جۇمىپ, 102 ادام جاراقات العان.
جەرگىلىكتى پوليتسيا قىزمەتى باسقارماسىنىڭ باستىعى, پوليتسيا پودپولكوۆنيگى ايدىن بايماتوۆ بۇل تۋرالى سولتۇستىكقازاقستاندىق سپورتتىق اۆتوكلۋبتاردىڭ قاتىسۋشىلارىمەن بولعان كەزدەسۋدە بايان ەتتى. بۇل كلۋبتار «JZ», «Mersedes», «BMW» جانە «Subaru» سياقتى شەتەلدىك اۆتوكولىكتەردىڭ اتاۋلارىمەن اتالعان. ء«بىزدىڭ باستى مىندەتىمىز بۇزۋشىلاردى توقتاتىپ, جاۋاپقا تارتۋ عانا ەمەس. تاپ قازىر سىزدەردىڭ باستارىڭىزدى قوسىپ, بارلىق تۇيتكىلدى ماسەلەلەردىڭ باسىن اشىپ العان ءجون دەپ سانايمىز, ال سىزدەر باسقا اۆتو اۋەسقويلارعا كەزدەسۋ قورىتىندىلارىن, بۇزۋشىلىق ءۇشىن كوزدەلگەن جاۋاپكەرشىلىك جايىندا ايتىپ جەتكىزەدى عوي دەگەن سەنىمدەمىز», - دەپ اتاپ ءوتتى ايدىن بايماتوۆ.
كەزدەسۋ بارىسىندا سپورتتىق ماشينالارداعى شۋ باسقىش رەتىندە پايدالانىلاتىن تيۋنينگ اتريبۋتتارىن پايدالانۋعا قاتىستى ماسەلەلەر ەگجەي-تەگجەيلى تالقىلاندى. پوليتسەيلەر كولىكتى زاڭسىز قايتا جابدىقتاۋ اكىمشىلىك قۇقىق بۇزۋشىلىق تۋرالى كودەكستىڭ 590-بابى بويىنشا جاۋاپكەرشىلىك جۇكتەيتىنىن ەسكەرتتى. وسى باپپەن وندايلارعا 15 ايلىق ەسەپتىك كورسەتكىش كولەمىندە ايىپپۇل سالۋ قاراستىرىلعان. كەزدەسۋدە قايتا جابدىقتالعان كولىك قۇرالدارىنىڭ قاتتى دىبىسى تىنىشتىقتى بۇزاتىنى جانە بۇل بۇزۋشىلىققا جاتاتىنى ەسكەرتىلدى. ەگدە جاستاعى قالا تۇرعىندارى, سابيلەر تۇنگى ۋاقىتتاعى كۇشەيە تۇسەتىن شۋدان زارداپ شەگەدى.
اۆتوكلۋب مۇشەلەرى دە كوكەيلەرىندە جۇرگەن سۇراقتارىن جاۋدىردى. ايتىلعان ۇسىنىستار پوليتسەيلەردىڭ نازارىنان تىس قالعان جوق.
پەتروپاۆل