ماجىلىستە الەۋمەتتىك-مادەني دامۋ كوميتەتىنىڭ كەڭەيتىلگەن وتىرىسى ءوتىپ, وندا مەملەكەت باسشىسىنىڭ اعىمداعى جىلدىڭ 10 ساۋىرىندە ۇكىمەتكە بەرگەن تاپسىرماسىن ورىنداۋ شەڭبەرىندە مۇقتاج ازاماتتارعا الەۋمەتتىك كومەك ۇسىنۋ تەتىكتەرىن ودان ءارى جەتىلدىرۋ ماسەلەلەرى قارالدى. بۇل تۋرالى ءماجىلىستىڭ ءباسپاسوز قىزمەتى حابارلادى.
دەپۋتاتتار الدىندا ءسوز سويلەگەن ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەرلان اۋكەنوۆ قازىرگى كەزدە مينيسترلىك ازىرلەپ جاتقان جانە وسى جىلدىڭ كۇزىنە قاراي اياقتالۋى جوسپارلانعان «وتباسىنىڭ تسيفرلىق الەۋمەتتىك كارتاسى» اقپاراتتىق جۇيەسى ادامداردىڭ ءال-اۋقاتى دەڭگەيىن بەلسەندى فورماتتا ايقىنداۋعا مۇمكىندىك بەرەتىنىن اتاپ ايتتى. بۇل مۇقتاج ازاماتتارعا الەۋمەتتىك كومەك كورسەتۋدىڭ مالىمدەۋشىلىك مودەلىنەن انىقتاۋشىلىق مودەلىنە كوشۋگە مۇمكىندىك بەرەدى.
وتىرىس بارىسىندا دەپۋتات جانات وماربەكوۆا رەسپۋبليكادا بىلىكتىلىگى جوعارى الەۋمەتتىك قىزمەتكەرلەرگە سۇرانىس وتە كوپ ەكەنىنە توقتالىپ, ولاردىڭ قىزمەتىن جاڭعىرتۋ قاجەتتىگىن ايتتى. سونداي-اق مۇمكىندىگى شەكتەۋلى بالالارعا ارنالعان قاشىقتان وقىتۋدىڭ ارنايى باعدارلاماسىن جەتىلدىرۋدىڭ ماڭىزدىلىعىنا ءمان بەردى.
تۇرعىنداردىڭ مۇقتاج ازاماتتاردىڭ الەۋمەتتىك كومەك الۋى جونىندەگى بارلىق شاعىمىنا, ەسكەرتۋى مەن ۇسىنىسىنا جان-جاقتى تالداۋ جۇرگىزىپ, ءتيىستى شارالار قابىلداۋ قاجەت, - دەدى وتىرىستى قورىتىندىلاعان كوميتەت توراعاسى بەيبىت مامراەۆ.
سونىمەن قاتار دەپۋتات ب. مامراەۆ شالعاي ەلدى مەكەندەردەگى مۇقتاج تۇرعىنداردىڭ الەۋمەتتىك كومەكتى ۋاقتىلى الۋى ماقساتىندا بانك قىزمەتتەرىنىڭ قولجەتىمدىلىگىن قامتاماسىز ەتۋ كەرەكتىگىنە باسا نازار اۋداردى.
جالپى, كوميتەت شىن مۇقتاج ازاماتتارعا الەۋمەتتىك قولداۋ كورسەتۋدىڭ ايقىن تەتىگىن جاساۋدى ۇسىندى. ول كەيبىر ادامداردىڭ تاراپىنان ماسىلدىق پيعىل تانىتۋدىڭ كەز كەلگەن فاكتىسىنە جول بەرمەۋى ءتيىس. سونداي-اق جۇمىسسىز, تابىسى از ازاماتتاردى جانە مۇمكىندىگى شەكتەۋلى ادامداردى ەڭبەككە تارتۋ جانە ولاردىڭ ەكونوميكالىق بەلسەندىلىگىن ارتتىرۋ مۇمكىندىكتەرىن كەڭەيتۋ ماسەلەسىن جۇيەلى تۇردە پىسىقتاۋ ۇسىنىلدى.