بۇل تۋرالى قالا اكىمى م.ايتەنوۆتىڭ توراعالىعىمەن شىمكەنت قالاسىنىڭ اۋماعىندا ورمان جانە دالا ورتتەرىن الدىن الۋ بويىنشا ونلاين رەجيمدە وتكەن جيىندا توتەنشە جاعدايلار دەپارتامەنتىنىڭ باسشىسى ن.دەربىسوۆ مالىمدەدى.
ونىڭ ايتۋىنشا, قالا اۋماعىنداعى ورمان قورى جەرلەرىندەگى 406 شاقىرىمدا مينەرالدى جولاق جىرتىلعان. بۇدان بولەك, ەگىستىك القاپتارىندا 400 شاقىرىم, رەسپۋبليكالىق ماڭىزى بار جولداردىڭ بويىندا 65 شاقىرىم جانە جەرگىلىكتى اۆتوموبيل جولدارىنىڭ بويىندا 315 شاقىرىم ورتكە قارسى جولاق سالىنعان.
«ورتكە قارسى مينەرالدى جولاق جىرتۋ جۇمىستارى ساپالى بولۋى ءۇشىن ەنىن كەمىندە 7 مەتر ەتىپ جۇرگىزۋ قاجەت. ورمان-دالا ورتتەرىن دەر كەزىندە ءسوندىرۋ ماقساتىندا اۋدان اكىمدىكتەرى ءتيىستى ەلدى مەكەندەردە 527 ادامنان تۇراتىن 52 ءورت ءسوندىرۋ توبىن قۇردى. ولار 94 بەيىمدەلگەن قوسالقى تەحنيكامەن, 22 ءورت ءسوندىرۋ موتوپومپاسىمەن جانە قولدا بار ءورت ءسوندىرۋ قۇرالدارىمەن جابدىقتالعان. ورمان جانە دالا ورتتەرى ورىن العان جاعدايدا دەر كەزىندە ءسوندىرۋ ءۇشىن ءبىر سوقالى تراكتورمەن بىرگە 3 توننا سۋى بار تىركەمەلى بوشكەلەر مەن 4 ۋاقىتشا باقىلايتىن ءورت ءسوندىرۋ بەكەتتەرى قۇرىلدى», - دەدى دەپارتامەنت باسشىسى.
بۇدان بولەك, ول شىمكەنت قالاسىندا ءورت سانى وتكەن جىلمەن سالىستىرعاندا 20 پايىزعا, ال ادامداردىڭ قازا بولۋى 40 پايىزعا ازايعانىن ايتىپ ءوتتى.ءورت قاۋىپى جوعارى ماۋسىمنىڭ تاياپ تۇرعانىن ايتقان قالا باسشىسى اۋدان قالا اكىمدەرىنە ءوز اۋماقتارىندا ەرىكتى ءورت ءسوندىرۋ جاساقتارىن قۇرۋ جۇمىستارىن جانداندىرۋدى تاپسىردى.
سونىمەن قاتار, جاز ايلارىندا وتە ىستىق, ءورت قاۋىپى جوعارى ءوڭىر ەكەنىنە توقتالعان اكىم, ءورت وقيعاسى ورىن العان جاعدايدا ءبىرىنشى كەزەكتە سول اۋداننىڭ باسشىسى جاۋاپ بەرەتىندىگىن ەسكەرتتى.
جيىندى قورىتىندىلاعان مۇرات دۇيسەنبەك ۇلى اۋدان اۋماعىندا ورنالاسقان بارلىق زاڭدى تۇلعالار اراسىندا ءورت قاۋىپسىزدىگى تالاپتارىن قاتاڭ ساقتاۋ بويىنشا ءتۇسىندىرۋ جۇمىستارىن جۇرگىزىپ, باقىلاۋدى كۇشەيتۋدى جۇكتەدى.