ەلىمىزدە «اقتوبە-اتىراۋ-رف شەكاراسى (استراحان)» اۆتوجولىن جاڭارتۋ جۇمىستارى جالعاسىپ جاتىر. وڭىردەگى تاسجولدىڭ جالپى ۇزىندىعى - 277 شاقىرىم. بۇل تۋرالى يدم ءباسپاسوز قىزمەتى حابارلادى.
جوبا 6 ۋچاسكەگە بولىنگەن. جولدىڭ 833-853, 853-893 شاقىرىمدارى ارالىعىندا قوزعالىس بيىل اشىلادى. بۇگىنگە دەيىن ونداعى جۇمىستاردىڭ 50% اياقتالعان. 12 كوپىر جانە 22 سۋ وتكىزۋ قۇبىرى سالىندى. جولدىڭ 648-693 شاقىرىمىندا بۇرما جولدى قۇرىلىس جۇمىستارىنا دايىنداۋ, جول-قۇرىلىس ماتەريالدارىن جيناۋ, سونداي-اق جەر قازۋ جۇمىستارى جۇرگىزىلىپ جاتىر.
بۇدان بولەك, جاڭارتۋ جۇمىستارى شەڭبەرىندە جولدا قيىرشىق تاستى-ماستيكالىق اسفالت-بەتوننان جاسالعان جول جابىندىسى جاڭارتىلىپ, 2 جول وتپەسى, 20 كوپىر, 36 اۆتوبۋس ايالداماسى جانە 80 سۋ وتكىزۋ قۇبىرى سالىنادى. سونداي-اق 14 دەمالىس الاڭىن سالۋ جوسپارلانعان.
جاڭارتۋ جۇمىستارىنان وتكەن سوڭ ءىىى ساناتتاعى تاسجول ءىى تەحنيكالىق ساناتقا سايكەستەندىرىلەدى. جوبا اياسىنداعى جۇمىستارعا 740 ادام مەن 560 تەحنيكا جۇمىلدىرىلادى.
ەسكە سالايىق, اتىراۋ وبلىسىنداعى رەسپۋبليكالىق ماڭىزى بار جولداردىڭ جالپى ۇزاقتىعى 1120 شاقىرىم. ولاردىڭ 98,6% - جاقسى جانە قاناعاتتاندىرارلىق جاعدايدا.