فيلمگە جازۋشىنىڭ تۋعان جەرى, التايدىڭ عاجايىپ تابيعاتى ارقاۋ بولادى.
بيىل - بەلگىلى جازۋشى, حالىقارالىق «الاش» سىيلىعىنىڭ لاۋرەاتى, كاتونقاراعاي اۋدانىنىڭ تۋماسى ديداحمەت ءاشىمحان ۇلىنىڭ 70 جىلدىعى. وسى مەرەيلى داتاعا وراي قالامگەردىڭ تۋعان توپىراعىندا «Qazaqstan» ۇلتتىق تەلەارناسىنىڭ باستاماسىمەن دەرەكتى فيلم ءتۇسىرۋ باستالدى.
ءبىز قازىر التايدا جۇرگەن دەرەكتى ءفيلمنىڭ اۆتورى, جۋرناليست اينۇر ومارعا حابارلاستىق.
«قازىر جازۋشىنىڭ 70 جىلدىعىنا وراي فيلم ءتۇسىرىپ جاتىرمىز. فيلمگە قالامگەردىڭ شىعارمالارىنداعى كەيىپكەرلەر, تۋعان جەرى, التايدىڭ عاجايىپ تابيعاتى ارقاۋ بولادى.
ديداحمەت ءاشىمحان ۇلىنىڭ شىعارماشىلىعىندا نەگىزىنەن اۋىل ءومىرى قامتىلعاندىقتان قالامگەر تۋىپ-وسكەن مەكەنگە ارنايى كەلىپ, جۇمىس ىستەپ جاتىرمىز. فيلم قالامگەردىڭ تۋعان كۇنىندە كورسەتىلەدى دەپ جوسپارلانىپ وتىر» دەيدى اينۇر ومار.
شىعىس قازاقستان وبلىسى,
كاتونقاراعاي اۋدانى