پرەزيدەنت قاسىم-جومارت توقاەۆ ەلباسىنىڭ باستاماسىمەن قۇرىلعان اكادەميانىڭ 10 جىلدىق مەرەيتويىنا وراي قۇتتىقتاۋ حات جىبەردى. بۇل تۋرالى اكادەميانىڭ رەسمي سايتى حابارلادى.
ء«Cىزدى جانە ءسىز باسقارىپ وتىرعان ۇجىمدى ورتاق قۋانىش – تۇركى اكادەمياسىنىڭ 10-جىلدىق مەرەيتويىمەن شىن جۇرەكتەن قۇتتىقتايمىن!
قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان ءابىش ۇلى نازارباەۆتىڭ باستاماسىمەن قۇرىلعان ينستيتۋت كۇللى تۇركى الەمىنىڭ ىنتىماعىن نىعايتۋ ىسىنە سۇبەلى ۇلەس قوسىپ كەلە جاتقان بەدەلدى عىلىمي ورداعا اينالدى.
اكادەميا باۋىرلاس حالىقتاردىڭ تەرەڭنەن باستاۋ الاتىن ورتاق تاريحى مەن تامىرىن جاڭعىرتۋ, وركەنيەتى مەن مادەني قۇندىلىقتارىن ناسيحاتتاۋدا تولايىم تابىستارعا قول جەتكىزۋدە. كوپتەگەن زەرتتەۋلەر مەن اعارتۋشىلىق جۇمىستار ناتيجەسىندە تۇركىتىلدەس مەملەكەتتەردىڭ باي مۇراسى تورتكۇل دۇنيەگە پاش ەتىلىپ, اتا-بابادان ميراس بولىپ قالعان تۋىستىق ءوزىنىڭ باياندى جالعاسىن تابۋدا.
وسى رەتتە, اكادەميا قىزمەتكەرلەرىنىڭ تۇششىمدى ويى مەن ساليقالى ەڭبەكتەرى تۇركى دۇنيەسىمەن عانا شەكتەلمەي, حالىقارالىق قاۋىمداستىققا كەڭىنەن تانىلىپ, جوعارى باعاسىن العانىن ەرەكشە اتاپ ءوتۋ ورىندى.
بۇل باعىندىرار بەلەستەر تۇركى الەمىنىڭ مەرەيىن ۇستەم, بىرلىگى مەن بولاشاعىن بەرەكەلى ەتۋ جولىنداعى قاجىرلى جۇمىستىڭ جارقىن كورىنىسى ەكەنى ءسوزسىز.
بۇگىنگىدەي ايتۋلى كۇندە سىزگە جانە اكادەميا ۇجىمىنا قولعا العان ىستەر مەن باستامالارىنا ساتتىلىك, سونداي-اق شىعارماشىلىق تابىس تىلەيمىن» دەپ تىلەك ءبىلدىردى مەملەكەت باسشىسى.