قاراعاندى وبلىستىق اكىمدىگىندە وتكەن اپپارات جيىنىندا ءوڭىر باسشىسى جەڭىس قاسىمبەك كوروناۆيرۋس ينفەكتسياسىنىڭ تارالۋىنا جول بەرمەۋ ماقساتىنداعى جۇمىستاردى ءالسىز جۇرگىزگەنى ءۇشىن تەمىرتاۋ قالاسى مەن بۇقار جىراۋ اۋدانىنىڭ اكىمدەرىنە سوگىس جاريالادى.
وبلىس اكىمى سانيتارلىق قىزمەت پەن اكىمدىكتەردىڭ ءىس-ارەكەتتەرىندەگى قاتەلىكتەر اتالعان قالا مەن اۋدان ورتالىعى بوتاقارا كەنتىندە كوروناۆيرۋستىڭ ورشۋىنە الىپ كەلگەنىن اتاپ ءوتتى.
– وتكەن اپتاداعى ناتيجەلەر جەكەلەگەن وڭىرلەر اكىمدەرىنىڭ كوروناۆيرۋستىڭ تارالۋى قانداي قاۋىپ ءتوندىرىپ وتىرعانىن ۇعىنا الماعانىن كورسەتتى. جەدەلدىك, باسقا مەملەكەتتىك ورگاندارمەن ءوزارا تۇسىنىستىك ءىس-قيمىل جوق. تۇراقتى ەپيدەميولوگيالىق جاعدايدى ساقتاۋ بويىنشا جۇمىس السىرەدى. ونىڭ تىكەلەي سالدارى, ناقتىراق ايتقاندا, شارالاردىڭ ۋاقىتىندا قابىلدانباۋى تەمىرتاۋ مەن بوتاقارادا ىندەتتىڭ ورشۋىنە اكەلىپ سوقتى. وسىعان بايلانىستى, تەمىرتاۋ قالاسى مەن بۇقار جىراۋ اۋدانىنىڭ اكىمدەرىنە سوگىس تۇرىندەگى تارتىپتىك جازا جاريالايمىن, – دەپ مالىمدەدى جەڭىس قاسىمبەك.
وبلىس اكىمى وڭىردەگى «نۇرقازعان» كەنىشىندە پايدا بولعان ىندەت وشاعىن دا تىلگە تيەك ەتتى.
– وتكەن اپتادا «نۇرقازعان» كەنىشىندە ينفەكتسيانىڭ ءورشۋ سالدارىنان نەگىزگى ءوسىم بولدى. جۇقتىرعاندار باسقا قالالارعا بارىپ, وتباسىلىق ءىس-شارالارعا قاتىسقانى تۋرالى فاكتىلەر بار. ءبىز بۇل وشاتاردىڭ ءبارىن بىلەمىز. ولار وقشاۋلاندىرىلعان. دەگەنمەن, ەگەر سانيتارلىق دارىگەرلەر مەن اكىمدەر دەر كەزىندە بىرلەسكەن شەشىم قابىلداعاندا, وسىنىڭ الدىن الۋعا بولار ەدى, – دەپ وكىنىش ءبىلدىردى وبلىس اكىمى.
سونىمەن قاتار, ءوڭىر باسشىسى قالانى ارالاعان كەزدە تۇرعىنداردىڭ بەتپەردەسىز, توپتانىپ جۇرگەنىنە قىنجىلىس ءبىلدىردى.
– مەن كەشكە جاقىن قالانى ارالاپ جۇرەمىن. سوندا بايقاعانىم: ماسكانى ەشكىم كيمەيدى, ساياباقتار مەن گۇلزارلاردا ادامدار توپ-توپ بولىپ جينالادى جانە الەۋمەتتىك قاشىقتىقتى ساقتامايدى. قالا جانە اۋدان اكىمدەرى, ولارعا سانيتارلىق تالاپتاردى ساقتاۋ قاجەتتىگىن ءتۇسىندىرۋدى تالاپ ەتىڭىزدەر. سايىپ كەلگەندە, بۇل تۇرعىندارعا كورسەتىلگەن قامقورلىق, – دەدى جەڭىس قاسىمبەك.
اپپارات جيىنىنىڭ سوڭىندا وبلىس اكىمى سانيتارلىق-كارانتيندىك تالاپتاردىڭ ساقتالۋىنا باقىلاۋدى جانە اقپاراتتىق-ءتۇسىندىرۋ جۇمىستارىن كۇشەيتۋدى تاپسىردى.
قاراعاندى وبلىسى