بۇگىن, 28 قىركۇيەك كۇنى قازاقستان چەمپيوناتىنىڭ ءبىرىنشى ليگاسىنداعى سايىستا توپ باستاپ كەلە جاتقان قىزىلوردانىڭ «قايسار» كومانداسى قاراعاندىدا جەرگىلىكتى «گەفەست» كلۋبىمەن كەزدەسىپ, ونى 6:0 دەگەن ءىرى ەسەپپەن ۇتتى. بۇل تۋرالى Vesti.kz حابارلادى.
قىزىلوردالىقتار 31-تۋردا ورىن العان وسى كەزەكتى جەڭىسىنەن كەيىن تۋرنير كەستەسىندەگى جاعدايىن بۇرىنعى قالپىندا ۇستاپ قالدى. ول ءوزىنىڭ سوڭىنان كەلە جاتقان اقتاۋدىڭ «كاسپي» كومانداسىمەن ارالىقتاعى 6 ۇپاي ايىرماشىلىعىن بۇزعان جوق. بۇل كۇنى ماڭعىستاۋ فۋتبولشىلارى دا ۇتىسقا يە بولدى. ولار ەلوردادا «استانا-1964» جاساعىنا قارسى ويىندى 2:0 ەسەبىمەن ءوز پايداسىنا شەشە ءبىلدى.
كوش باسىنداعىلار قاتارىنداعى الماتى وبلىسى وتەگەن باتىر كەنتىنىڭ «ىلە-ساۋلەت» ۇجىمى سىر بويى فۋتبولشىلارىنىڭ ەسەبىن قايتالادى. ول ءوز الاڭىندا شىمكەنتتىڭ بيىك كومانداسىن وسىنداي ناتيجەمەن تىزە بۇكتىردى. ال سەنساتسيانى جاساعان جەتىسايدىڭ «ماقتاارال» كومانداسى بولدى. ول پەتروپاۆلدا «قىزىلجاردى» 3:2 ەتىپ ءسۇرىندىردى.
قالعان ويىندار مىناداي ناتيجەلەر اكەلدى:
«ەكىباستۇز» (ەكىباستۇز) - «بايتەرەك» (استانا) 2:0
«سپارتاك» (سەمەي) - «بولات-امت» (تەمىرتاۋ) 2:0
«وقجەتپەس» (كوكشەتاۋ) - «قىران» (شىمكەنت) 1:0
تسسكا (الماتى) – «لاشىن» (قاراتاۋ) 1:1
بۇگىن سونداي-اق پرەمەر-ليگا كوماندالارىنىڭ قوسالقى قۇرامدارى ءوزارا كەزدەستى. بۇل ماتچتاردا مىناداي ەسەپتەر تىركەلدى:
«ۆوستوك» (وسكەمەن) - «اقجايىق» (ورال) 5:0
«ەرتىس» (پاۆلودار) – «شاحتەر» (قاراعاندى) 1:0
«ورداباسى» (شىمكەنت) – «استانا» (استانا) 3:0
«قايرات» (الماتى) – «اقتوبە» (اقتوبە) 3:0
«تاراز» (تاراز) – «جەتىسۋ» (تالدىقورعان) 4:2
«اتىراۋ» (اتىراۋ) – «توبىل» (قوستاناي) 0:1
دامير قوجامقۇل.