كوكشەتاۋداعى «ەنكي» كىرپىش زاۋىتى قۋاتتىلىعىن 50 پروتسەنتكە ارتتىرماق. وسىعان دەيىن قاپتىرمالى قىش كىرپىش ءوندىرىسىن مىقتاپ جولعا قويعان كاسىپورىن بۇگىندە قاراپايىم كىرپىش شىعاراتىن جاڭا زاۋىتتىڭ قۇرىلىسىن باستاپ كەتتى.
جاڭا زاۋىت جىل سوڭىنا دەيىن ىسكە قوسىلادى دەپ جوسپارلانعان. الايدا, بۇل جوسپاردىڭ ىسكە اسۋىنا قارجىلاي كەدەرگىلەر دە جوق ەمەس. «ەنكي» كىرپىش زاۋىتى قازاقستاندا عانا ەمەس, ورتا ازياداعى ىرگەلى زاۋىتتاردىڭ بىرىنەن سانالادى. كاسىپورىن جىلىنا 60 ميلليون كىرپىش وندىرەدى. ءارى جىل وتكەن سايىن ساتىلىم اۋماعىن كەڭەيتىپ, جاڭا ءونىم تۇرلەرىن كوبەيتىپ كەلەدى. نارىقتاعى سۇرانىسقا وراي كاسىپورىن بيىل قاراپايىم كىرپىش شىعاراتىن جاڭا زاۋىتتىڭ قۇرىلىسىن باستاپ كەتتى.
–بىلتىر قۋاتتىلىعى جىلىنا 30 ميلليون كىرپىش بولاتىن جاڭا زاۋىتتىڭ قۇرىلىسىن جوسپارلاعان بولاتىنبىز. بۇگىندە بۇل جۇمىس باستالىپ كەتتى. جوسپار بويىنشا جىلدىڭ اياعىندا ىسكە قوسىلۋى ءتيىس. بىراق, قارجىلاي قيىندىقتارعا تاپ بولىپ وتىرمىز. سوندىقتان, قۇرىلىستىڭ ناقتى قاشان اياقتالاتىنىن ءدوپ باسىپ ايتا المايمىز,- دەيدى زاۋىتتىڭ باس ينجەنەرى مارات كەسەكپاەۆ.
قازىردە زاۋىتتىڭ سىرتقى قاڭقاسى دايىن. قارجىلاي قيىندىققا بايلانىستى قۇرىلىس قارقىنى ءسال باسەڭدەگەن. جالپى, كوكشەتاۋدىڭ قامتاما كىرپىشى قازاقستاننىڭ بارلىق وڭىرلەرىندە ۇلكەن سۇرانىسقا يە. ەندى قاراپايىم كىرپىش ءوندىرىسى ىسكە قوسىلسا, زاۋىتتىڭ قۋاتتىلىعى 50 پروتسەنتكە ارتا تۇسەدى. قازىردە جاڭا زاۋىتقا قاجەت قوندىرعىلارعا تاپسىرىس بەرىلگەن. ولاردىڭ ءبىرازى جەتكىزىلدى.
–جاڭا زاۋىتتا كىرپىشتىڭ بىرنەشە ءتۇرى شىعارىلادى. شامامەن, 75-80 جاڭا جۇمىس ورنى اشىلادى,–دەيدى ءوندىرىس تسەحىنىڭ باستىعى ەرلان شاكەنوۆ.
وتاندىق وندىرىس ءوسىپ-وركەندەسە, ەلىمىز يمپورتقا دەگەن تاۋەلدىلىكتەن ارىلادى. سوندىقتان وڭىردەگى زاۋىت نارىقتاعى سۇرانىستى تولىق قاناعاتتاندىرۋدى ويلايدى. قاراپايىم كىرپىش ءوندىرىسىن جولعا قويۋ سول ماقساتتان تۋىنداپ وتىر.