بۇگىن الماتى قالاسى وڭىرلىك كوممۋنيكاتسيالار قىزمەتىنىڭ الاڭىندا وتكەن ونلاين بريفينگتە الماتى قالاسى ءبىلىم باسقارما باسشىسى ءلاززات جىلقىباەۆا قالاداعى مەكتەپكە دەيىنگى مەكەمەلەردەگى ورىن جەتىسپەۋشىلىگى ماسەلەسىنە توقتالدى.
بۇگىندە قالادا 893 مەكتەپكە دەيىنگى ۇيىمدار بار, ولاردىڭ 185 (20%) مەملەكەتتىك بولاپ تابىلادى.
كەزەكتە 1-6 جاس ارالىعىندا 43 مىڭنان استام بالا تۇر, ونىڭ 18 مىڭنان استامى 3-6 جاس ارالىعىندا.
ءلاززات جىلقىباەۆا بالاباقشاعا كەزەكتە تۇرعاندار سانىن ازايتۋ ءۇشىن قالادا تومەندەگىدەي بىرقاتار مەحانيزمدەر جۇزەگە اسىرىلىپ جاتقاندىعىن رەتىمەن باياندادى.
بىرىنشىدەن, بيىل 4 مەملەكەتتىك بالاباقشا قۇرىلىسى اياقتالۋعا جاقىن, تاعى 3 بالاباقشا قۇرىلىسى باستالدى. سونىمەن بىرگە, 6 مەملەكەتتىك مەكتەپكە دەيىنگى ۇيىمنىڭ قۇرىلىسىن جۇرگىزۋ جوسپاردا بار.
ەكىنشىدەن, اعىمداعى جىلدىڭ جاز ماۋسىمىندا 1997-2004 جىلدار ارالىعىندا جەكە ءبىلىم بەرۋ ۇيىمدارىنا جالعا بەرىلگەن 11 مەملەكەتتىك بالاباقشانى قايتارۋدى باستاۋ جوسپارلانىپ وتىر.
ەگەر جالعا الۋشى عيماراتتىڭ ءپروفيلىن بالاباقشا رەتىندە ساقتاپ, ونى جاڭعىرتۋعا (جوندەۋ, جاعدايىن جاقسارتۋ) ءوز قارجىسىن سالۋعا دايىن بولسا, عيماراتتى قايتارماسا بولادى.
ۇشىنشىدەن, جەكەمەنشىك سەكتورعا قولداۋ. ياعني قازىرگى ۋاقىتتا جەكەمەنشىك بالاباقشالاردا اتا-انالارعا تولەمدى ءبولىپ تولەۋ ماسەلەسى قارالۋدا.
سونىمەن 2021 جىلى جوبالىق قۋاتى 2590 ورىنعا شاقتالعان 13 بالاباقشا پايدالانۋعا بەرىلەدى, جەكەمەنشىك بالاباقشالاردا قوسىمشا 8000 ورىن اشىلعان, قايتارۋ جانە عيماراتتى جاڭعىرتۋ جولى ارقىلى قوسىمشا 2200 ورىن قۇرىلعان.
2020-2021 جىلدارى قوسىمشا 12 790 ورىن قۇرىلادى, ول بالاباقشا كەزەگىن 70%-عا ازايتادى.
قازىرگى ۋاقىتتا قالاداعى مەكتەپكە دەيىنگى بارلىق 893 ۇيىمنىڭ جۇمىسى توقتاتىلعان. سونىمەن بىرگە, قالاداعى ەپيدەميولوگيالىق جاعدايدىڭ تۇراقتانۋىنا قاراي, بالاباقشالار جۇمىسىن كەزەڭ كەزەڭىمەن ىسكە قوسۋ قاراستىرىلىپ جاتىر.
الماتى