وبلىس ورتالىعى نەمەسە رەسپۋبليكالىق ماڭىزى بار جولدار عانا ەمەس, اۋدانداردا دا بۇل باعىتتاعى جۇمىستار قىزۋ. اسىرەسە «اۋىل-ەل بەسىگى» باعدارلاماسى اياسىندا اۋىلىشىلىك جولدارعا ەرەكشە ءمان بەرىلگەن.
ماسەلەن, بۇلاندى اۋدانىنىڭ ورتالىعى ماكينسك قالاسىنىڭ جانە التىندى مەن كاپيتونوۆكا اۋىلدارىنىڭ ىشكى جولدارىنا ورتاشا جوندەۋ جۇمىستارى جۇرگىزىلۋدە. ماكينسك قالاسىنىڭ تەك جولاۋشىلار وتەتىن بولىگى عانا ەمەس, تۇرعىنداردىڭ شاعىمى مول تۇسەتىن, كوپتەن جوندەۋ كورمەگەن كوشە جولدارى دا قالىپقا كەلتىرىلۋدە. ورتاشا جوندەۋ كورەتىن جولداردىڭ جالپى ۇزىندىعى 8 شاقىرىمدى قۇرايدى.
– بيىلعى جىلى وبلىستىق بيۋدجەتتەن ماكينسك قالاسىنىڭ كوشەلەرىن ورتاشا جوندەۋدەن وتكىزۋ ءۇشىن 261 ملن اقشا بولىنگەن بولاتىن. قازىرگى تاڭدا كونكۋرستىق شارالار ءوتىپ, كەلىسىم-شارت جاسالدى. جۇمىس باستالىپ كەتتى. شىلدەنىڭ ورتا شەنىندە اياقتايمىز, – دەيدى اۋداندىق تۇرعىن ءۇي-كوممۋنالدىق شارۋاشىلىعى, جولاۋشىلار كولىگى جانە اۆتوموبيل جولدارى ءبولىمىنىڭ جەتەكشىسى كەنجەگۇل پىرىمبەتوۆا.
ءبىر قۋانتارلىعى, بيىل اۋدانعا قاراستى ەلدى مەكەندەردە دە «اۋىل – ەل بەسىگى» باعدارلاماسى اياسىندا جولداردى جوندەۋ جۇمىستارى قولعا الىندى. ماسەلەن التىندى اۋىلىنىڭ كىرەبەرىسى مەن ىشكى جولدارىن جوندەۋگە وبلىستىق بيۋدجەتتەن 120 ميلليون تەڭگە بولىنگەن. مەردىگەر انىقتالىپ, جوندەۋ جۇمىستارى باستالىپ كەتتى. سونىمەن قاتار كاپيتونوۆكا اۋىلىنىڭ جولدارىن جوندەۋگە 80 ملن تەڭگە قاراستىرىلعان. بيىل اۋدان ورتالىعىندا سونداي-اق بلوكتى-ءمودۋلدى بۋ قازاندىعىن سالۋ جوسپارلانىپ وتىر. بۇل ماقساتقا وبلىستىق قازىنادان 250 ملن تەڭگە بولىنگەن.