قىزىلجار اۋداندىق پوليتسيا ءبولىمىنىڭ كەزەكشى بولىمىنە «كراحمال-اگرو» جشس بريگاديرىنەن شاحوۆسكوە اۋىلىنان 10 كم جەردەگى جايىلىمنان سەنبى كۇنى جوعالعان 310 باس قوي تابىلدى, – دەپ حابارلايدى Polisia.kz.
اتالعان فاكتى قىلمىستىق كودەكسىنىڭ 188-1-بابى 4-بولىگى 2-تارماعى (مال ۇرلاۋ) بويىنشا سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىنە ەنگىزىلدى. قىزىلجار اۋدانى شاحوۆسكوە اۋىلىنداعى وقيعا ورنىنا شۇعىل جەدەل-تەرگەۋ توبى باردى.
ماتەريالداردى جيناۋ بارىسىندا تۇستەن كەيىن باقتاشىنىڭ ۇيىقتاپ قالعانى, قويدىڭ جوعالعانىن انىقتاعان سوڭ, ءوزى ىزدەگەنى بەلگىلى بولدى. ەكى تاۋلىك وتكەننەن كەيىن قويدىڭ جوعالعانى تۋرالى باسشىلىعىنا حابار بەرگەن. پوليتسەيلەر قىزمەتتىك–ىزدەستىرۋ يتتەر مەن كۆادروكوپتەردى پايدالانىپ ىزدەستىردى. ىزدەۋ توپتارى قۇرىلىپ, قويلاردى ىزدەۋگە اققايىڭ اۋدانى, ماعجان جۇماباەۆ اۋدانى پوليتسيا بولىمدەرىنىڭ جانە «كراحمال-اگرو» جشس قىزمەتكەرلەرى شىعادى, بۇدان بولەك جاقىن ماڭداعى ەلدىمەكەندەردىڭ ادامدارى كومەككە كەلگەن. ورماننان, سۋ ماڭىنان ىزدەگەن كەزىندە اققايىڭ اۋدانى گريگورەۆكا اۋىلى ماڭىندا ۇساق مالدىڭ ءىزى انىقتالعانى تۋرالى اقپارات كەلىپ ءتۇستى. قىزىلجار اۋدانى پوليتسيا ءبولىمى باسشىسىنىڭ ورىنباسارى ارمان جەتەپوۆتىڭ جەتەكشىلىگىمەن جەدەل-تەرگەۋ توبى حابارلانعان جەرگە شىعىپ, ورماننان جوعالعان قويدى انىقتايدى.
قوي شاحوۆسكوە اۋىلىنان ورمانعا قاراي 50 كم جەرگە ۇزاپ كەتكەن. قازىرگى ۋاقىتتا قويلار ايداپ اكەلىنىپ, جوعالعان مالدىڭ قۇنىن 7 750 000 تەڭگەگە باعالاعان جشس باسشىلىعىنا, ياعني يەلەرىنە قايتارىلدى. قىلمىستىق ءىس قىلمىس قۇرامىنىڭ بولماۋىنا بايلانىستى توقتاتىلدى, الايدا, تەرگەۋ ورگاندارى مال باعۋدى ۇيىمداستىرۋ كەزىندە جاۋاپكەرشىلىكپەن قاراۋ جايلى جاۋاپكەرشىلىگى شەكتەۋلى سەرىكتەستىك باسشىلىعىنىڭ اتىنا حات جولداۋدى جوسپارلاپ وتىر.
قىزىلجار اۋدانى پوليتسيا ءبولىمىنىڭ باسشىسى ءاليحان بايقاداموۆ ءۇش تاۋلىك بويى اياقتارىنان تىك تۇرىپ مالدى ىزدەگەن قىزمەتكەرلەردى ماراپاتتاۋعا ۇسىنىم دايىنداپ جاتىر. پوليتسەيلەر مال يەلەرىن مالدى ۇيىمداستىرا وتىرا باعۋعا شاقىرادى, سەبەبى مال ۇرلىعى اۋىل تۇرعىندارى ءۇشىن كەلتىرىلگەن ۇلكەن شىعىن.