پارلامەنت ءماجىلىسىنىڭ جالپى وتىرىسىندا «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكس جوباسى ەكىنشى وقىلىمدا ماقۇلداندى.
كودەكس جوباسى جونىندە بايانداما جاساعان ءماجىلىس دەپۋتاتى زاۋرەش امانجولوۆا دەپۋتاتتار ەنگىزگەن تۇزەتۋلەر دەنساۋلىق ساقتاۋ جۇيەسىن زاڭنامالىق تۇرعىدان جاقسارتۋعا باعىتتالعانىن ايتتى.
اتالعان قۇجات بويىنشا جۇمىس توبىندا مۇددەلى مينيسترلىكتەر مەن ۆەدومستۆولاردىڭ, مەديتسينالىق جانە عىلىمي قوعامداستىقتىڭ, ۇكىمەتتىك ەمەس قوعامدىق بىرلەستىكتەردىڭ وكىلدەرى مەن تاۋەلسىز ساراپشىلاردىڭ قاتىسۋىمەن 1200 ۇسىنىس قارالعان. ناتيجەسىندە 717 تۇزەتۋ قابىلدانىپ, 2 تۇزەتۋ قابىلدانباعان.
قابىلدانباعان تۇزەتۋلەردىڭ ءبىرى پروفيلاكتيكالىق ەكپەلەر جۇرگىزۋدى «مىندەتتى» دەگەن ءسوزدى «قۇقىلى» دەپ وزگەرتۋ تۋرالى بولسا, ەكىنشىسى ەكپە جاسالماعان بالالاردىڭ بالاباقشالارعا بارۋىن تىياتىن نورمالاردى الىپ تاستاۋ جونىندە بولدى.
ءماجىلىس دەپۋتاتى زاۋرەش امانجولوۆا بۇل ماسەلەنى جۇمىس توبىنىڭ مۇشەلەرى جان-جاقتى زەردەلەگەنىن, سونداي-اق حالىقارالىق تاجىريبە ەسكەرىلگەنىن اتاپ ءوتتى. ناتيجەسىندە بارلىق ەكپە مىندەتتى جانە ەرىكتى بولىپ ناقتى بولىنەدى. ال بالالاردىڭ بالاباقشاعا بارۋى «ۇجىمدىق يممۋنيتەتتىڭ» دەڭگەيىنە بايلانىستى جۇزەگە اسىرىلادى.
بۇل تۇزەتۋلەردى ەنگىزۋدى دەپۋتات بەكبولات تىلەۋحان ۇسىنعان ەدى. ول وتىرىس بارىسىندا ءماجبۇرلى ەكپەگە قارسى ۇستانىمىندا قالاتىنىن اڭعارتتى, بىراق بۇل تۇزەتۋلەردى دەپۋتاتتاردىڭ كوپشىلىك داۋسىنا سالۋدى سۇراعان جوق.