ادامنىڭ يممۋن تاپشىلىعى ۆيرۋسى بويىنشا وبلىستا ەپيدەميولوگيالىق جاعداي تۇراقتى. دەسە دە, اتالعان ىندەتكە بايلانىستى جاڭا دەرەكتەر بار. ماسەلەن, سوڭعى 4 ايدا وڭىردە جاڭادان ۆيچ جۇقتىرعان 42 ناۋقاس تىركەلگەن.
قازىرگى قوعامداعى دۇشپانىڭا دا تىلەمەيتىن اۋرۋدىڭ ءبىرى – ادامنىڭ يممۋن تاپشىلىعى ۆيرۋسى, ياعني «ۆيچ» جۇقپاسى. بۇرىن بۇل سىرقات كوبىنە ەسىرتكىقۇمارلار مەن جەڭىل جۇرىستىلەردە كەزدەسسە, قازىر ول ادام تالعامايتىن بولعان. مەديتسينا ماماندارىنىڭ ايتۋىنشا, بۇل ىندەت ينفەكتسيا جۇقتىرعانداردىڭ جەكە باس قايعىسىنا اينالماۋى ءتيىس, وعان كوپشىلىكتىڭ نازارىن اۋدارتۋ قاجەت. بۇگىندە وبلىس بويىنشا 735 ادام ۆيچ ينفەكتسياسىن جۇقتىرعان دەگەن دەرەك بار.
– ناۋقاستاردى ءبىز تىركەۋگە الىپ, مەملەكەت ەسەبىنەن ەمدەيمىز. ولارعا جاڭا ءدارى-دارمەكتەر دە بەرىلەدى. ماسەلەن, بيىل ناۋقاستار وسى دارىلەردىڭ ارقاسىندا ءوز دەنساۋلىقتارىن ءبىراز جاقسارتىپ الدى. جالپى, ۆيچ ينفەكتسياسىن ەمدەيتىن دارىلەر وتە قىمبات. بىراق ولاردىڭ بارلىعى مەملەكەت ەسەبىنەن ساتىپ الىنادى,–دەيدى وبلىستىق سپيد-پەن كۇرەسۋ جانە ونىڭ الدىن-الۋ ورتالىعىنىڭ باس دارىگەرى قۇرمانبەك بۇرماعانوۆ.
وتكەن جىلدىڭ وسى مەرزىمىندە قاۋىپتى ىندەتتى جۇقتىرعان 45 ازامات تىركەلگەن. دارىگەرلەردىڭ ايتۋىنشا, سوڭعى جىلدارى ۆيچ-ينفەكتسياسى بەي-بەرەكەت جىنىستىق قاتىناس ارقىلى تاراۋدا. ادامنىڭ اعزاسىن يممۋن تاپشىلىعىنا ۇشىراتاتىن دەرتتىڭ داۋاسى بۇگىنگە دەيىن تابىلماي تۇر.